پاکستان کے صوبہ خیبر پختونخوا میں افغانستان سے متصل قبائلی سرحدی ضلعے خیبر میں پیر کو فوج کے ایک قافلے پر عسکریت پسندوں نے حملہ کیا جس سے 8 اہلکار ہلاک ہو گئے ۔
عسکری حکام نے حملہ اور 8 اہلکاروں کی ہلاکت کی تصد یق کردی ہے۔
عسکری حکام کے دعوے کے مطابق فوج کا یہ قافلہ انسدادِ دہشت گردی کی ایک کارروائی کے بعد واپس اپنے اڈے کی جانب لوٹ رہا تھا۔
اس حملے میں تین فوجی اہلکار زخمی بھی ہوئے ہیں جن میں ایک کی حالت تشویشناک ہے۔
سیکورٹی ذرائع نے دعویٰ کیاکہ عسکریت پسندوں کے حملے کے بعد ہونے والی جھڑپ میں متعدد حملہ آور بھی ہلاک ہوئے ہیں۔
پاکستان کی فوج کے شعبہ تعلقاتِ عامہ آئی ایس پی نے اب تک اس حوالے سے کوئی بیان جاری نہیں کیا ہے۔
