پاکستان کے صوبہ سندھ کے ضلع شکارپور میں نامعلوم مسلح افراد نے جیکب آباد پولیس سے اسلحہ سے بھری گاڑی چھین کر فرار ہوگئے جبکہ واقعے کے بعد سب انسپکٹر، ہیڈ محرر اور محرر کو گرفتار کر لیا گیا۔
جیکب آباد تھانہ صدر پولیس نے 2 اکتوبرکو دوران چیکنگ اسلحہ اسمگنگ کی کوشش ناکام بنائی تھی۔
رپورٹ کے مطابق کارروائی کے دوران پولیس نے 138 عدد نائن ایم ایم پستول اور 30 بور کے میگزین برآمد کیے تھے۔
حکام کے مطابق اسلحہ لاڑکانہ لیبارٹری میں چیکنگ کے لیے بھجوانے کے دوران شکار پور کی حدود میں مسلح افراد اسلحے سے بھری گاڑی چھین کر فرار ہوگئے۔
رپورٹ کے مطابق سینئر سپرنٹنڈنٹ پولیس (ایس ایس پی) نے کہا کہ اہلکاروں کو معطل کردیا گیا ہے، تفتیش مکمل ہونے کے بعد گرفتار اہلکاروں کو قانون کے مطابق سزا دی جائے گی۔
