سرگرم و متحرک انسانی حقوق وسیاسی کارکنان اور بلوچ یکجہتی کمیٹی کے رہنماڈاکٹر ماہ رنگ بلوچ اور سمی دین بلوچ نے پشتون قومی جرگے کیخلاف ریاستی کریک ڈائون کی مذمت کی ہے۔
ڈاکٹر ماہ رنگ بلوچ نے سوشل میڈیا پلیٹ فارم ایکس پر اپنے ایک پوسٹ میں کہا ہے کہ میں پشتون قومی جرگہ کو روکنے کی کوشش میں پشتون تحفظ موومنٹ (PTM) کے خلاف سیکورٹی فورسز کی جانب سے طاقت اور تشدد کے استعمال کی شدید مذمت کرتا ہوں۔
انہوں نے کہا کہ پی ٹی ایم کے سیاسی کارکنوں پر تشدد اور منظور پشتین پر قاتلانہ حملہ پشتون عوام کی آواز کو خاموش کرنے کی کوششیں ہیں۔ پشتون سیاسی کارکنوں کے خلاف طاقت کا استعمال فوری طور پر بند کیا جائے۔
ان کا کہناتھا کہ میں انسانی حقوق کی تنظیموں سے اپیل کرتا ہوں کہ وہ سیاسی اور انسانی حقوق کے کارکنوں کے خلاف ریاستی تشدد اور طاقت کے استعمال کا فوری نوٹس لیں۔
اسی طرح سمی دین بلوچ نے سوشل میڈیا پلیٹ فارم ایکس پر اپنے ایک پوسٹ میں کہا ہے کہ پشتون تحفظ مومنٹ کے خلاف کریک ڈاؤن اور قومی جرگے کو روکنے کے لیے ریاستی طاقت کا استعمال کی شدید الفاظ میں مذمت کرتی ہوں ۔
ان کا کہنا تھا کہ اس وقت پی ٹی ایم کے کئی رہنماؤں اور کارکنوں کی گرفتاری اور انکے گھروں میں چھاپے چادر اور چاردیواری کے تقدس کی پامالیوں کا سلسلہ بھی جاری ہے۔
سمی بلوچ نے کہا کہ بلوچ اور پشتون اپنی سرزمین پر کوئی سیاسی جلسہ پروگرام کا انقاد بھی اپنی مرضی سے نہیں کرسکتے اگر پرامن سیاسی جرگہ یا جلسے کا اعلان کریں تو بھرپور ریاستی طاقت کا استعمال کیا جاتا ہے مشکل کی اس گھڑی میں اپنے پشتون بھائیوں کے ساتھ کھڑے ہیں اور جبر کے خلاف مزاحمت پر فتح مظلوموں کے حصے میں آتی ہیں ۔
