بلوچستان کے کٹھ پتلی وزیر اعلیٰ جام کمال نے بلوچستان کے تحفظات کے خاتمے کیلئے پاکستان کے وزیر اعظم عمران خان سے اسلام آباد میں ملاقات کی ہے ۔
میڈیا ذرائع کے مطابق وزیراعظم عمران خان نے وفاقی منصوبوں کے حوالے سے بلوچستان کے تحفظات کو دور کرنے کی یقین دہانی کرواتے ہوئے کہا ہے کہ بلوچستان کے عوام کی فلاح و بہبود اور صوبے کی سماجی و معاشی ترقی اولین ترجیحات میں شامل ہے جس کیلئے صوبائی حکومت کو ہرممکن تعاون فراہم کیا جائے گا۔
وزیراعلیٰ بلوچستان جام کمال خان کی قیادت میں ملاقات کرنے والے وفد میں وفاقی وزیر برائے دفاعی پیداوار زبیدہ جلال، ارکان قومی اسمبلی سردار اسرار ترین، نوابزادہ خالدمگسی، سینیٹر انوار الحق کاکڑ، احمدخان خلجی اور تاج آفریدی بھی موجود تھے۔
جام کمال نےبلوچستان کی مجموعی صورتحال بالخصوص کورونا وائرس کی روک تھام کے حوالے سے اٹھائے جانے والے اقدامات اوربلوچستان میں جاری ترقیاتی منصوبوں کے حوالے سے وزیراعظم کو آگاہ کیا۔
کٹھ پتلی وزیراعلیٰ نے وفاقی پی ایس ڈی پی میں بلوچستان کو نظرانداز کرنے سے آگاہ کرتے ہوئے وفاقی پی ایس ڈی پی میں بلوچستان کو اس کا جائز حق دینے کے حوالے سے بات چیت کی۔
اس موقع پر گفتگو کرتے ہوئے پاکستان کے وزیراعظم عمران خان نے کہا کہ بلوچستان کے عوام کی فلاح و بہبود اور صوبے کی سماجی و معاشی ترقی اولین ترجیحات میں شامل ہے جس کیلئے صوبائی حکومت کو ہرممکن تعاون فراہم کیا جائے گا، بلوچستان پاکستان کا مستقبل ہے صوبے کو کسی صورت بھی نظر انداز نہیں کریں گے۔
