،
اے چونیں دورءِ گردِشاں
اے چونیں وھدءُ نوبتاں
اے چونیں دورءِ گردِشاں
اے کُشتءُ کوش
اے پروشتءُ پروش
اے رونءُ موش
جنگءُ چوپءُ وت شموش
کیپءُ کدھاں ھنوش
پدجنَیءُ ایرموش
گُنگّیءُ اے دستءُ گوش
جندءِ پوستءَ وت لگوش
ھمے اے اھدءِ رستّر شُبینیں ٹیکّیاں
اے چونیں وھدءُ نوبتاں
اے چونیں دورءِ گردِشاں
اِشک دروگیں کِسھانی چیدگاں
مھر ھُشکیں کاگدانی گرنچاں بستگیں
ادِا چون مردم زندگی بہ کنت؟
وتا گوں وت مِڑگءُ کُشتءُکوش؟
جندءِ لاش پہ کوپگےءِ ایر بہ بیت کُنڈےءَ؟
پہ کبرءُ کسارتءَمئیت کسے میّتءَ؟
پِت پہ جِندءِ پُسگاں تیر دَر بہ چِنت
گوں زرکریدیں ٹولیاں بھا بہ بیت پہ چانوگے
ھزار ھیپءُ لانھتیں رستّر زادگیں بنی آدماں
اے چونیں وھدءُ نوبتاں
اے چونیں دورءُ گردِشاں
اے ھاک سُرمگیں ماتیں مکھیں
اے زمینءِ سرمتاب کُل آدمءِ پُسگاں
درُست براتءُ یکیں کوپگاں
دُرست اے آجوئیءِ مُکمیں لڑّاں
تو وتا زنڈیں سوھوءُ کواسے لیکھے ماں دپتّراں
منی تئی آ کوپگیں چِراگ کُشتءُ کوشیاں
کارچ جنگیءُ موشتءُ موشیاں
منءُ تو ندارھی انِت پرچیا؟
منءُ تو نہ کنزیں دیمءَ پرچیا؟
بلکیں بھا کُتگ وتا پہ چِنکےءَ
اے چونیں وھدءُ نوبتاں
اے چونیں دورءُ گردِشاں
تو ڈاکٹر اللہ نزرءُ من ھیربیار
تو اکتر ندیمءُ من براھمدگاں
تو چیرمین خلیل ءُ من ھمل ھیدر آں
تو بیبگرءُ من سرباز
تو آزادءُ من فِلان
تو گوس آزُمءُ من شاھءِ نازُم
اے جنگءِ نوکیں چھر ءُ دروشماں
اے مِسکیں ھاکءِ دامنءَ
ھزاراں شھیدانی مستگیں ھون رِتکگاں
ما مھلبیں ھونانی شرپ کُتیں کموکے
