گُڈّی مُلّا | میجر مجید

0
258

(شھید رئوپ برکتؔ ءِ ناھکّیں کوش ءِ پُژدر ءَ)

راج ءِ تلاہ ءُ تنگوئیں
گیدی ءِ سَولیں پُسّگے
چُکّے چہ مات ءَ کُت جتا
بْرات ءَ ءُ آریپیں پت ءَ
لاڑیں گْھار ءَ دتّکیں
بش بش ور اَنت لنجیں شپاں
گْریو اَنت ءُ پیھانک جن اَنت
اللہ کُتگ ما چے گناہ؟
ارزان اِنت ھون پرچا مئے
دلبند چاک کُت تُربتؔ ءِ
یاتے پِداؔ ءِ نوک کتگ
کسّہ ھمیدؔ ءِ در کتگ
مُرگ ءَ پہ آسے روک کتگ
کوہ ءِ امامؔ برّ ءِ کھیرؔ
شیریں دوکُرمؔ بژنیگ کتگ
اے مات ءَ گُد دوچی کتگ
پیریں پت ءَ دار گُڈّ اِتگ
وانینتگ بچّے پہ مُراد
پیریں وتی دست ءِ ھسا
رودینت پہ وار ءُ بزّگی
تیرگوار کتگ مُلّا چے ءَ؟
چے اِنت ھتا چے اِنت گناہ؟
دین ءِ مھمدؔ چو نہ اِنت
درّیں نبی رازی نہ اِنت
اسلام ءِ پرمان چو نہ اِنت
نَے کہ کُران ءُ سُنّت اِنت
ھچ مزھب ءَ جائز نہ اِنت
تو مادنیں راہ ءَ رد ئے
بچّاں بلوچ ءِ تو کُش ئے
ھوناں وتی دیم ءَ مُش ئے
دائم چو نرپیلّ ءَ جُش ئے

ھوش کن تو مُلّا گُڈسری
پنجاپ ءِ بیل ءُ ھمبل ئے
چو مادیان ءَ گندل ئے
کاردار ئے ھیرامنڈیؔ ءِ
دزبوج ئے روالپنڈیؔ ءِ
ھرچے ترا واجہ گُش اِیت
پہ مال ءُ زرّ ءَ تلوس ئے
جند ءِ وتی بْراتاں کُش ئے
شیتان ءِ دوست ءُ سنگت ئے
آس ءَ تو گرمیں دوزہ ءِ
داں کہ دوسد کرن ءَ سچ ئے
جنّت ھرام اِنت پہ ترا
ھونواریں اھد ءِ رستر ءَ
دھر ءِ یزیدیںؔ نَر ھَر ءَ
ھون ءِ ھسنؔ ھون ءِ ھُسینؔ
ھون ءِ رئوپؔ یکّیں وڑ ءَ
جزماں کہ روچے مھشر ءَ
اللہ جنت مئے ، تئی شَر ءَ
بیت جست ءُ باوست چہ ترا
ھون ءِ ھساب ءَ گیپت ترا
ھون ءِ ھساب ءَ گیپت ترا

٭٭٭

LEAVE A REPLY

Please enter your comment!
Please enter your name here