منی راجءِ دگہ تْرندیں توارے شُت
وتن دیوانگیں یک سرمچارے شُت
منی شوانگ، منی بگجَت، منی میدءِ
گم ءُ رنجانی سِتکیں رازدارے شُت
مُلور انت جِنّ ءُ اِنس ءُ گُنگدام شہرءِ
کہ چو منصورءَ حقءِ پاسدارے شُت
پدا بژنیگ منی راجءِ یلیں کوہ مرد
پدا مئے راجی پِربندانی یارے شُت
پچ اِنت پتّر پدا پُرسءِ بلوچڈیھءَ
عطا ءُ پازُلیں یک یادگارے شُت
په زوراک ءُ لگوریں راجی رہشوناں
دگہ زاگ داتگیں زِبریں سگارے شُت
زبان ءُ راج ءُ لبزانکءِ کَرُتک بُرجے
بلوچڈیھءِ دگہ مئے دوستدارے شُت
تئی پولگ، تئی وانگ، تئی زانگ
منی ڈیھءِ ملنگیں پولکارے شُت
گمیگ انت سمّی ءُ سازین ءُ دُربی بی
گریب ءُ بزگرانی سِتریں شارے شُت
***
