تَنگوَیں راجءِ رھبر اِنت مَھرنگ
اِزّت ءُ شانءِ گْرُھبر اِنت مَھرنگ
بی بی گُل بی بی درور اِنت مَھرنگ
بانَڑی دْروشُم زاھِر اِنت مَھرنگ
دزگُھاران پیسر اِنت مَھرنگ
جنگ اِنت گوں دھرءِ رستراں مَھرنگ
پْروشتگ آنت گبّ ءُ چوڑیگ دستانی
سنگ سرءَ میڑینتگ ستاھانی
ساھگءَ شِیر اِش مِتکگ زھمانی
گْوازی گوں زَرمُشتیں سگارانی
سمّیء دِین محمد سِپاہ دار اِنت
پِسّءِ شوھازءَ بزّگ ءُ وار اِنت
اندواں راج ئیگاں شریدار اِنت
سُمّعیہ مِکّ اِنت چو کہ البُرزءَ
شِنگ کنت اھوالاں نہ وشّیناں
سامیہ، ماہ زیب، سائرہ لالیں
پادا تئی راج وار ءُ بدھالیں
بچّ بیگواہ انت مئے کسان سالیں
زنچکءَ گپتگ مات پیرزالیں
ناشریں ھیرہ منڈیءِ بچّءَ
ناکو مَیار پیریں مِکّ اِنت چو مَچّءَ
در پہ در گرداِیت ناراِیت پہ بچّءَ
واجہ مولا بکش سراں پیری
جُھدءِ ھمراہ اِنت گوں گُرّگاں شیری
بالاچءِ سوزماناں جگر بُرّیں
نئے تْرھیت روچءَ نئے شپاں وابیں
ماہ نور ھمراہ اِنت کسان سالیں
پِسّ ے بیگواہ انت گیش ھپت سالیں
سعیدہ سدگنجیں سد سَتاھانی
لشکرءِ پیشوک اِنت سِپاھانی
دھرءِ لینگاٹ شِرّ اَنت چم جَھلیں
مات زان انت ءُ نئے گھار پُلّیں
نئے اِزّت ءُ ننگءِ پردگءَ داراَنت
ووٹءِ شوھازءَ مست ءُ بے سار اَنت
مڈیءِ گرداپءَ گرپتار اَنت
راجءِ دیواناں سِلّ ءُ مُردار اَنت
شَیتان آبادءِ رستر ھونوار اَنت
لشکر اِش شو٘ر داتگ ھراب کاریں
زُلم ءُ زوراکی چو یزیدانی
چنگیز ءُ ھلاکوءِ مریدانی
شَیتان آبادءِ دُزّ ءُ ڈُنگانی
ھیرہ منڈیءِ لشکر ٹیکانی
مات داراِیت ءُ نئے گھارءَ زانت
نئے پدر داراِیت نئے مکھیں ماتے
ھیرہ منڈیءِ اولاد کم زاتیں
بَیرک مِکّ اِنت مئے شیر زالانی
چاکرءِ پدریچ انت مُرادانی
گْوھرامءِ زُریات انت سَرادانی
ماں تھار ماھاں پُلیں مَھکانی
سر بُلند بیتگ سر بُلندانی
پاسپان انت راجءِ رنگانی
پاسپان انت راجءِ نَنگان
***
