"االم کیت بھارگاھے”
جنگان دشتی
بچیگ منی شھیدیں دیدوک
ساھ ءُ منی ھم نپسیں چمروک
سالونکیں ناجدِ منی راجءِ سروک
من ھر شپ لُنجمیں نھنگاماں
پتو نیکیں دُھا کتگ اللہ ئی
شاھیں ھالکءِِ ماں درگاھاں
کہ بچیگ زیت بہ بیت ورناہ نوں
بہ سبزیت چو گواڑگءَ ماں پیشگاھاں
منءَ کولیں کہ دیانیں ماں پہ راجءَ
پہ وتی ھاکءِ پدریچانی وشیں بانداتءَ
دُھا منی مُستجاہ کُتاں دُریں ھاوندءَ
آ پاکیں مھربانءَ بُرزیں شاھانی
بچیگ گوں گنگلاں آ کوھ گولیں
ماتبندءُ ھشیمءُ آ تیھریں دَرنگاں
باگیں بُلیدہءُ شُھدائے ناگءِ آپریچاں
گوں براسءِ جگر دِرّءُ سرچوٹیں بیرگیراں
کپتاں ڈِیک گوں چانوگریں زر زیراں
آ دَجّالءِ پلیتّیں ھونوارءُ بے پیراں
جنگ بوت داں چُنت کلاک یکجاھی
پنچ مئے سالونک بیت شھید ھمراھی
چمءَ جتگءَ اَت منی زیکیں بانگوھیں
انچو ھال بیت شھیدانی ھر جاھی
کہ سالونکیں منی ناجِد پُر مڑاھانی
گوں ھمبلاں چاریں بور سوارانی
میرانءُ دولت رسول آ سرمتابانی
یوسُپ کُردءُ شکیل دشتی سرمچارانی
دُژمنءِ باجو ھم باز جتے یکجاھ
باز تتک جنگجاھ باز بیت تاھ تاھ
ھون شھیدانی سبزانَتءُ میزاراں ھر جاہ
من شھید ناجِد جانءِ مکھیں ماتاں
من نھاں بژنیگءُ من نھاں موتکیگ
من نھاں ارسیگءُ من نھاں پُرسیگ
چار ورناھءُ دو ھانیءُ مھناز است دگہ
پہ مرزبومءَ نَدرءُ کولیگءِ کناں انگت
پھر من بنداں چُشیں پُسگاں شیریں
پہ مکھیں ماتءُ گُھارانی گیرتءُ لجّءَ
پہ وتن ماتءِ گنجّانی موکگءَ بیلاں
سر بکشاتءُ ھون ریتکاں پُلءُسوگاتیں
اے منی دروتءُ پیگامیں پہ بلوچ راجاں
پہ شھیدانی مکھیں ماتءُ زرگلُیں کاڑاں
پہ شھیدانی کِبلھیں پِسءُ بھمبیں براتاں
جنگ آجوئی سرءَ کپتگ کُل بلوچانی
کس پہ گَلھے ھیشءُ لِزتاں کُربان نہ کنت
شادھیں زندءُ وشدلیں باریگ ھرکسءَ دوستاں
بکملیں کمبلءُ گورکیں چارکُل نباں ایرموش
بلے چی بہ کنت مردم چی نون پشتکپتگ
نئے پیرءُ ورناھ است نئے مکھیں مادر
نئے کمبرءِ لجّانی دیمپانیں شَدّرءُ شاری
نئے کُڑکّءُ کرگین نئے گِدانے است بزگریں راجءَ
نئے مکتبجاھے پہ بانداتءِ چِراگیں پدریچاں
درُست بِباہ داتاں اَھدءِ رستّر گونگّیں ھیکّاں
زندمان کھریں زِندانے پھک زِندانیں
سَدّکیں مارا کہ لُنجمی نہ مانیت تاں زنِد
الم کیت بھارگاھے پہ وھدءُ مولمءُ باریگ
الم کیت بھارگاھے پہ وھدءُ مولمءُ باریگ
