لبزانک جنزاں رودین اِیت | هسا بجار

0
41

بی این ایم ءِ هستیں وهد ءِ بنجاهی کابینہ ءِ رهشونانی هزمت ءَ سلام انت۔ الم! داد دیگ لوٹ اِیت اے وڑیں جاورانی تہ ءَ گلکاری کنگ ءُ سنگت ءُ باسکانی سیاسی رُدوم دیگ ءِ هاتر ءَ لبزانک ءِ نیمگ ءَ دلگوش کنگ یک انچیں گامگیجے کہ پہ چونیں یک سیاسی گلے ءَ سکیں هژدری ئیں کارے کہ پیش ءَ اے داب ءَ بھ ماں بلوچ راجی جنز ءِ تہ ءَ گندگ نہ بیت –


البت بی ایس او ءَ اے نیمگ ءَ دلگوش داتگ ، بلے بد نسیبی ءَ بس یکیں بی ایس او بیتگ ءُ بی ایس او ءِ سنگت کہ چہ وانگ ءَ گیش اِتگ انت تہ آ اگاں کوه ءَ شتگ اَنت هم نبشتہ کنگ ءَ مکن کنگ بیتگ اَنت ءُ اے نیمگ ءَ بلوچانی بی این پی ءِ وڑیں پاکستانی گل آهانی وش اتک ءَ ساڑی بیتگ اَنت۔ اود ءِ روگ ءَ بی ایس او ءِ پنت ءُ ڈیھ دوستی ءِ درورنت دل ءَ روان بیتگ اَنت ءُ مدان مدان ءَ کامریڈیں سنگت کٹریں پاکستانی جوڑ بیتگ اَنت-

وهدے کہ شھید پدا اهمد گوں وتی همرهاں همے سنچ ءِ دارگ ءِ هاتر ءَ بی این وائی ایم ءِ وڑیں گلے ٹھین اِیت کہ چہ وانگ ءَ گیشتگیں مردماں یک سیاسی پڑے بہ بیت ءُ آشوبی سنچ ءِ ردوم بہ ود اِیت ، بلے پاکستان زیت پدا اهمد بلوچ ءِ وڑیں زانوگر ءُ وانندگے ءَ شھید کنت پہ بلوچ سیاست ءِ تمکاری ءُ آشوبی لبزانک ءِ در ءَ چٹا بند کنت-


سرکار زانت کہ لبزانک هما راه اِنت کہ آئی ءِ همک کشک ءِ منزل رُژناه اِنت- ( روس ءِ آشوب ءِ وهد ءَ کروشیپ (خروشچف) ءَ گْوشتگ اَت کہ اگاں آ وهدی چیزے ندکار کُشگ بہ بیتیں تہ بہ گندئے روس ءَ آشوب مہ یتکیں – ) (1)
چہ شھید پدا اهمد ءَ رند دوار شھید واجہ گلام مھمد هما مِرمِرانکیں چراگ ءَ روک کنت ءُ یک برے پد ءَ بلوچ چاگرد گوں آشوب ءَ همراه ء لبزانک ءَ هوار کپ اِیت۔ ءُ همک میتگ ءُ هلکاں کتابجاه ءُ گل ءِ کارگس ٹهینگ بہ اَنت، بلے اد ءَ هم سرکار همائی ءَ کنت کہ گوں شھید پدا اهمد بلوچ ءَ کتگ اَت ئےِ۔ گوں وتی داشتگیں بلوچ ندکاریں وزیر ءِ همشوری ءَ شھید واجہ گلام مھمد ءَ گوں وتی همراهاں شھید کنت ءُ کتاب ءُ کتابجاهانی ماندارگ ءَ بنا کنت ءُ بلوچ سیاست ءُ آشوبی لبزانک ءَ ماں شھر ءُ میتگاں سر زاهر ءَ هلاس کنت-


شھید گلام مھمد ءَ پد بی این ایم ءِ شھیدیں رهشون داکتر منان جان گوں وتی همراهاں ماں شھر ءُ میتگاں آشوب ءَ برجاه دار اِیت- ( شھید منان جان ند ءِ واک ءَ سرپد اَت ءُ آئی ءِ رودپتر نزآرگ بہ بہ اَنت وت یک درونتے انت پہ چونیں یک سیاسی رهشون ءُ باسکے ءَ۔)


بد نسیبی ءَ بلوچ ءِ آشوبی لبزانک ردانک ءِ تہ ءَ نسیتی ءَ هساب اِنت، چیزے نبشتانکی کتاب ءُ واجہ ابدلنبی بنگلزئی ءُ واجہ کامریڈ واهد کمبر ءِ گلگدار انت ءُ کمانڈر کادر مری ءِ کتاب انت البت ءَ اے تک ءَ سنگر ءِ جھد هچ وڑ ءَ پراموش کنگ نہ بیت، بلے چوشیں مزنیں مڈی یے ردانک ءِ دروشم ءَ کسھی لبزانک ءِ تہ ءَ ناں چوشیں مزن ءُ بازیں گدارے گندگ بیت ءُ ناں کہ درکسھی لبزانک ءِ تہ ءَ مزنیں کچے ءَ نبشتانکی کتاب یا کجام ٹوهیں رهشونے ءِ زندگ نامگ یا آهانی وتی نبشتگیں رودپتر ءُ سرگوستے هست –


شھید منان جان ءَ پد دژمن وتی کاررهبنداں تْرند تر کنت ءُ بی این ایم چیر ءُ زیر بیگ ءَ لاچار بیت۔
ءُ سنگت ءُ رهشون چہ وتی هلک ءُ دمگاں لڈ ءُ بار کنگ ءَ لاچار بہ اَنت۔ مدان مدان ءَ بی این ایم دیم پہ درانڈیهی ءَ سپر کنت-


اد ءَ بی این ایم ءِ کہ هستیں وهد ءِ کابینہ ٹھ اِیت تہ آهانی تہ ءَ کُل چہ بی ایس او آزاد ءِ کُٹ ءَ ردوم زرتگیں وانندگ ءُ زانوگر ءُ شیواریں ءُ چہ سرکار ءِ چیریں زنداناں زندانی بیتگ ءُ لٹ وارتگیں ٹولی یے ٹھ اِیت ءُ دومی اشانی تہ ءَ بازیں سنگتے ءِ سیادی وڑے ناں وڑے ءَ گوں ندکاری ءَ اِنت- ءُ اشانی تہ ءَ سنگت داکتر جلال ءِ وڑیں لبزانک ءِ بستار ءَ سرپدیں مزنیں ندکارے هوار ءُ آئی ءِ هواری هما توم کہ بی ایس او ، شھید پدا اهمد ، شھید واجہ گلام مھمد ءُ شھید منان جان ءَ کشتگ هما درچک ءَ جوانیں وڑے ءَ چو یک پهتویں دهکان کارے ءَ وش سمات ءُ آپ کنان ءُ ردوم دیگ ءَ انت-
گوں داکتر ءَ هوار لبزانکی ءُ وانندگ ءُ هنرمندیں سنگتانی یک ٹوهیں لڑے کہ هرکس وتی تک ءُ وتی ادارگانی تہ ءَ گوں زیبائی ءَ کار ءَ انت-


چہ همد ءَ گلکاری ءِ زگریں دروشم سھر ءَ بیت ءُ بی این ایم دیم پہ ادارگ سازی ءَ جنزان کنت ءُ وتی میّاد ءِ گونڈ تریں بھرے ءَ بازیں ادارگے ٹهینت ءُ همے ادارگانی سنگتانی زهمت کشی ءَ مروچی بی این ایم لبزانک ءِ پجی ءَ دیم پہ سپارتکاری ءَ جنزان اِنت –

بلوچ راجی جنز میزران بات –
بلوچستان آجو بات –

***

…………………………..

(1) سرشون : سے ماهی ” نیاورق "
ممبی
بیست ءُ پنچمی تاک
ابدُسمد کُنج . (داکتر ھمایوں ءِ کتگیں ردانک ءُ آشوب ءِ سیادی ءِ جست ءِ پسو ءَ ابدُسمد همے گپ ءَ کنت-

LEAVE A REPLY

Please enter your comment!
Please enter your name here