درد انت کہ ایرموش نہ بنت
ٹپ انت کہ سرپوش نہ بنت
بلوچءِ فلسفہ انت کہ اگاں دژمنے بیت، گڑا نسب دارے بہ بیت، حیادارے بہ بیت۔ بلوچ وتی دژمنءَ کم نسب ءُ بے حیا گندگ نہ لوٹیت، پرچا کہ نسب داریں دژمن ترا اگاں جنت، ترا کُشیت، بلئے تئی عزتءِ پردگءَ کنت۔ کم نسبیں دژمن تئی عزتءِ پردگءَ نہ کنت۔ بلوچءَ وتی عزت، وتی ننگ ءُ ناموس سک دوست انت۔
بلوچ گشیت مرد پہ نام مریت، نامرد پہ نان۔
بلوچ یکجھتی کمیٹی شالءِ زھرشانیءِ ندارگءَ ما شما کُلاں دیست کہ یزیدی لشکرءِ ھیرامنڈیءِ ڈُنگ ءُ ٹیکاں مئے بلوچ شیرزالیں مات ءُ گھارانی چِہ وڑا بے عزتی کرت!؟ اے نزارہءِ چارگ پہ غیرت مندیں بلوچءَ سک گران انت۔ بگندئے بلوچءِ جدوجھدءِ اندرا اے اولی ویل انت کہ بلوچ شیرزالےءِ گُشان اے رنگءَ ژپگ بیتگ۔
بلوچ شیرزالاں پیشءَ ھم انگریزءِ دؤرءَ جدوجھدءَ بھر زُرتگ، بلئے انگریز نسب داریں قومے بیتگ، بلوچ ے جتگ، کُشتگ، بلئے بلوچءِ عزتءِ پردگ ءُ حیال ے کتگ۔ بکشوءِ یزیدی لشکرءَ وتی اصلیت پیش داشت کہ منی نسب چی انت!؟
منی تنگویں بیلاں! شیرزالیں بانک بیبوءِ گُشانءِ دست جنئگ لس بلوچ مات ءُ گھارانی پاکیں گُشانءِ بے عزتی ءُ بے حرمتی انت کہ بلوچ اے ھبرءَ سک دلرںج بیت، بلئے چہ کےءَ امیت دارئے؟ جنگ گوں کےءَ انت؟ انچو کہ من شمارا گْوشت کہ جنگ گوں کم نسبیں دژمنے انت تہ الم انچو بیت۔
سلام، سد سلام منی شیرزالاں! منی مات ءُ گھاراں! کہ اے یزیدی ناروائیں دژمنءِ دیمءَ شما چو کوہء البرزءَ مک ات، بلوچءَ نوکیں ویژنے، بزاں دیدانک ءُ پجارے داتگ۔
منی شیرزالیں مات ءُ گھاراں! مرچی پدا بانک بانڑی شیھک، پاتمہ ھالی، بانک گل بی بی یارمحمدزئی، بانک مریمء شاھو نورھاتون کمال، شھید بانک کریمہ مِھراب، شھید شیرزال بانک ملک ناز، شھید بانک شاری ءُ شھید بانک سُمیہءِ کبر شما نوک کت انت۔ اے رنگیں درور ماں بلوچ راجدپترءَ سک باز انت کہ بلوچ شیرزال گوں وتی پت ءُ براتاں ماں جنگءِ پڑءَ ھمراہ ءُ ھمکوپگ بیتگ انت۔
جنگءِ پڑءَ بانک بانڑی دیم پہ دیم ات دژمنءِ قوتءَ گوں، گڑا دژمنءِ کماندار گوں بانک بانڑیءَ دیم پہ دیم کہ بیت، دژمنءِ کماندارءَ گْوشت کہ چہ منی دیمءَ ٹگل کہ تو جنینے ئے۔
شاہءَ گوں زِبریں دھشتاں بستگ
کہ تو جنینے ئے کِر کن منی راہءَ
چو جواب داتگ بانڑی شیھک
من جنینے آں، تئی جنءِ ھَزماں
جن ھما انت کہ میتگاں نندانت
پن ءُ مزواک انت، مھپراں رندانت
گوں وتی جوداں دزگلائیش انت
اے جواب ات جنگءِ پڑءَ بانک بانڑیءِ پہ دژمنءِ سپاھاں۔
مردم وھدے کہ وتی شیرزالانی کردءَ گندیت، سر چہ پھرءَ انچو برز بیت کہ گوں آزمانءَ ڈیک وارت۔
بلوچ زندگ انت، نہ مرتگ، بلوچءِ کسانیں چکے پہ پھر ءُ شان گْوشیت کہ من ڈاکٹر مھرنگ آں! من سمی آں! من بیبو آں! من بانک فوزیہ شاشانی آں، من بانک ھزاران آں! اے رنگیں گِھیں نامانی اِشکنگءَ دل گُشئے گرگے جنت۔
بکشوءِ دلار ءُ ربال مروچی ٹک ءُ نشان انت، دیم اش سیاہ انت ءُ بلوچ شیرزالاں مئے کلیں زالبول چہ وابءَ آگہ کت انت ءُ یک گوانکےءَ رمب بند انت ءُ وتی زھرشانیءَ درشان کننت۔
بلوچ مرچی بژنیگ انت کہ مئے شیرزالیں مات ءُ گھار نہ روچءَ دیستگ انت نہ ماہءَ، بلئے مروچی یزیدی لشکرءِ ھیرامنڈیءِ لونڈوے ماں شالءِ دگانی سرا آیانی گُشاناں چہ سرءَ دیر کنت ءُ لٹ جنت۔
بلوچ زالبول بانک مھناز گْوشیت کہ:
من ھما انجیراں پتن تاکیں
برز ھما کوھانی شمءَ رُستاں
سر منی ھچ گْواتءَ نہ چَنڈینتگ
بُنڈ منی ھچ ھارءَ نہ ملّینتگ
بیدء شھدادءِ نوگلیں ریشاں
ادا بچار کہ بلوچ زالبول چے گْوشیت!
بلوچ شیرزالانی ھمت ءُ جُرأتءَ بلوچ راجدپتر زندگ کتگ ءُ بلوچءَ را نمیران کتگ۔ بلوچ مرچی پھر بندیت وتی بانکیں شیرزالانی سرا، بانکیں گھارانی سرا۔۔۔!
بلوچی سبز ءُ مَیزران بات
بلوچستان آجو بات
تپاکی آجویءِ مانزمان اِنت
٭٭٭
