بی ایس او نے ضلع گوادر کے تحصیل پسنی کے علاقے بیلار کلانچ سے پاکستانی فورسز کے ہاتھوں جبری گمشدگی کے شکار تنظیم کے مرکزی رہنما کے بھائی اور کزن کی با زیابی کیلئے کل لائحہ عمل تشکیل دینے کا علان کیا ہے۔
بلوچ سٹوڈنٹس آرگنائزیشن کے مرکزی ترجمان نے اپنے جاری کردہ بیان میں کہا ہے کہ بی ایس او کے مرکزی جونیئر جوائنٹ سیکرٹری ابوبکر کلانچی کے بھائی اور کزن بیبگر اور اعجاز بلوچ کو آج دن دھاڑے ان کے گھر میں گھس کر فورسز نے جبری طور پر اغوا کیا اور تاحال ان کے اہلخانہ کو کسی بھی قسم کی معلومات نہیں دیا گیا ہے۔
ان کا کہنا تھا کہ تنظیمی عہدیداران، کارکنان اور ان کے اہلخانہ کو ایک عرصے سے ہراساں کر کے انہیں پر امن سیاسی جدوجہد سے دستبردار کرانے کی کوشش کیا جارہا ہے۔ ایسے ہتھکنڈوں سے نہ ہم اس سے قبل دستبردار ہوئے ہیں اور نہ آگے کبھی ہونگے۔
ان کا مزید کہنا تھا کہ کل تک دونوں افراد کو بازیاب کرایا جائے بصورت دیگر کل تنظیم کے مرکزی قائدین پریس کانفرنس کے ذریعے اپنے آئندہ کے لائحہ عمل کا اعلان کریں گے۔
