روھیل اُو روھیل
گوں بُرزیں توارے ءَ من ءَ گَپ ءَ اَت .۔۔۔
تو منی توار اُش نہ کنگ ءَ ئے ؟ مرچی من اَتکگ آں ۔۔۔۔ تئی گورا ءُ
پد ءَ من گوں تو گلھے ھم ھست۔۔
سنگت دْراہ واب اَنت۔۔ تو شپ ءَ تاں دیر ءَ نِنّد ئے من گُشت بلکیں تو آگھ بَہ ئے . من پمشکا اَتک آں
دمانے ءَ رند پدا….! یار منی راہ سک درو اِنت من رَوَاں عبدلمالک شپ ءَ پاس کنت . پادانی ٹپ ئِے انگت وش نہ اَنت۔ درمان چرپ کنگ لوٹ اَنت ۔کوٹک ءَ گاڑی ءِ پُشت ءَ بستگ ءُ گِرّ کُتگ .
یا اللہ ھیر …. منی گُد چہ ھیداں میچل اِت اَنت ۔۔۔ گُشئے زاناں منی سر ءَ آپ رِتکگ ۔
نواز تو ئے؟
ھو من اوں !
دنیا ءُ واب زاناں انچو وشّ اَنت منی گُٹّ شُت پہ کُوکار . ءُ تو ھِچّ نہ گُش ئے ۔۔
بکش یار من گُشت زان ءَ من وابے گِندَگ اوں.
کَندت ءُ گُشت ئِے۔۔۔۔۔۔ بوت کنت .
نواز تو ھیری ؟ سَپر وشّ بوتگ تئی سنگت جوڑ اَنت .
شکر اِنت ! من ءَ گلاب بُگُش من ءَ پاٹی ءِ نام ءِ دوست تر بیت .اڑے گنوک نواز ءَ کہ زانت ؟
نورا چون اِنت؟ بکش بکش پیرک
وشّ اِنت۔۔۔ ٹیٹ اِنت بلے ترا سلام ئِے نہ کُت ۔۔۔
بگندئے اے وھد ءَ منی واب سر ءَ زور اَت .
بیا من ءُ تو دیوانے کن آں۔۔ من ءَ گُشت ئِے .
آپ وَر ئے ؟ ترماس ءِ چاہ اِش وَ وارتگ اَنت
من نہ لوٹاں چاہ ءُ آپ .
تو منی سر ءَ چیا زھر ئے۔۔۔ من جست کُت
آ گپ ءَ ترا گُش آں دل ءَ بِدار
جلدی کن تو چیا انچو دَست جن ئے من ءَ گُشت ئِے ۔
من زوت رَواں کہ منی براس پاساں پاد کیت .
سگریٹ ءَ بہ زور گوں ۔
من دست موش کُت سگریٹ ءُ لیٹر دست ءَ کُت آں۔۔۔ ءُ پاد شپاد ءَ لوگے چت ءَ شُت ایں .
من چارد دور دات . ایشی سرءَ بہ نِنّد جگر .
تئی واب اَنگت نہ پْرشتگ؟ من ءَ جست کُت ئِے. اِناں من آگھ آں ۔
یار اودا من ءَ ھِچّ وشّ نہ بیت
ناں وتی باجہ گوں اِنت ناں سگریٹ ھست پہ آزاتی ءِ روچانی نزیک کنگ ءَ ۔ گیشتر پہ سنگتانی دیواناں زھیر کنت .
عبدلمالک ءِ ٹپ !!!!تو چے گُشت چون اَنت؟
مئے ٹپ وش بنت یک روچے الّم .
بلے ناسرپد گِریت ماس پرچہ منی چارَگ ءَ نیتکگ. ھر شپ پاساں بس ھمے گپ ءَ کنت .
من دوشی پیرک ءَ پاد کُت . پیرک ءَ گُشت اگاں تئی ماس نیتکگ ۔۔ منی پس نہ نیتکگ گُڈا من بہ گریواں ؟ مومن ءَ سر چست کُت ءُ گُشت واھئے واھئے منی شومیں نسیب شُما اَنگت گل بوتین اِت کہ شُما وتی لوگ ءِ دیم ءَ اِت . منی ناں ماس آتک . ناں من پس دیست ءُ ناں من ءَ سلو ءِ دیدار نسیب ءَ بوت .
پیرک ءَ دیم گردینت ءُ گُشت بشام زاناں منی مات ءُ عبدلمالک ءِ پت تئی مات ءُ پت نہ اَنت . مومن ءَ کندگے جت ءُ گُشت ۔ من زاناں چے گُشت ؟ من بس عبدلمالک تسالہ دات. ھمے گپاں گوں گُلاب یک لھزایے ھاموش بوت . ءُ پد ءَ گُشت ئِے
کوم ءِ ھالاں بدئے مئے بابت ءَ چے گُش اَنت ؟ مئے جنگ ءَ پروم جسکینت گندئے.۔۔۔۔؟ ھاھاھاھاھاھاھاھا . ھر وھد ءَ مارا مشکے ءُ آوران ءِ سنگتاں شیگان جت کہ پروم جنگ نہ بیت ۔۔۔۔۔۔۔۔
من پہ ٹھلے گُشت
شما قوم یک رندے پد ءَ چو شھید گُلام مھمد ءُ شھید اکبر بگٹی ءِ وڑا پاد کُت ءُ شُت اِت. نہ کن ئے ھاھاھاھا ھو ڈےے ما . ھمے گپ ءِ سر ءَ سیمھے بہ بیت (سگریٹ ) من رُوک کُت ءُ دات ڈَڈّیں سوٹے گپت ئِے ءُ دُوتے بُرز ءَ ھوپ کُت اَنت .
وتی جنگ ءِ ھالاں بِدئے من جست کُت.
مارا آستوکی مارے ءَ پہ نامردی جنائینت . بلے ھیر آزادیانی جنگاں چُش بوتگ ءُ بیت.
جنگ ءِ گڈی مردم تو بوتگ ئے ؟؟
ھھھھھھ۔۔۔ ھو من اِت اوں . منی گونڈل وَ اولی لھزاں ءَ شہید بوت مومن ٹپی اَت . من ءُ پیرک ءَ لھتیں جت ءُ لوگ وتی مورچہ کُت
پیرک تاں کہ روچ ءِ دہ بج ءَ جَنگ کُت بلے مئے تیر ھلاس بوت اَنت لشکر ءَ مارا مارٹر ءُ گیس جت پیرک گُشت من ءَ گیس بے ھوش کن اَنت من وت ءَ جن آں۔۔۔ گُڈا من ھمے گُشت منی دیم ءَ وت ءَ بہ جن من ترا بگنداں ءُ نزور مہ باں تاں گڈی تیر ءَ جَنگ بکن آں . پیرک ءَ کملہ آرت ءُ من ءَ گُشت ئےِ نواز نامردمی نہ کن ئے دست ءَ ندئے وت ءَ ٹھک !!!!!!! جت ئِے وت ءَ را ۔
منی زبان ءَ بس ہمے در آتک مارا اے کوٹک ءَ تباہ کُت .
بلے من وت ءَ تسلی دات مئے ھون زوال نہ بنت مارا پُشت ءَ پاٹی یے ھست. کس اِد ءَ میر ءِ شِنک نہ بیت نہ نِنّد اِیت.
من گُشت۔۔۔۔ ھو راست گُش ئے .
گُڈا پیرک چہ رند من دو دِگہ کلاش والا جت ءُ تیر آرت اَنت. گڈا دلجم بوت آں کہ ٹُکورے ءَ جنگ ءَ داشت کن آں . نیم روچ ءِ وھد ءَ تیر ھم کمّ بوت اَنت ءُ ھیلی کوٹک آتک اَنت ۔ من گُشت نواز شپ ءِ درکپگ ءِ پروگرام ھراب بُوت نوں ترا نیل اَنت.
من یکے وتی نیمگ ءَ آیگ ءَ دیست . من بان ءِ دریگ مورچہ کُت ءُ جِت بلے تیراں نہ گپت.
من میگزین چارت 8 یا 10 تیر ءِ کَچ ءَ مان اَت ئِے ھیلی ءَ جنگ شروع کُت . من ءَ پیرک ءِ گپ یات آتک ۔۔من توپنگ وتی زنوک ءَ دشت کلمہ ونت آزاد بلوچستان زندہ باد گوں مزنیں توارے ءَ گُشت ءَ ٹیگر زور دات . ھمے تیر ءَ بان ءِ چت ءَ دنز کُت من کپت آں . منی چمانی دیم ءَ دیدگ ءُ عبدل زاھر اِت اَنت ۔ گُشت اِش ابا ابا مارا دُکان ءَ بر گوں .
تو پُرس ءَشُت ئے ۔۔۔ من جست ئِے کُت .
ھو من۔۔۔۔۔من شُتاں۔
اے جست ءَ گوں منی جان ءَ یک تُرسے
ایر کپت .
من نہ لوٹ اِت اِے گپ دیم ءَ بہ روت
ترا چہ من چونیں گلھے ھست ؟
کککککککک اڑے شُما دْراہ مردگ پرست اِت .
بلے تو گنتر .
من ؟ دْراہ کے ؟
ھو تو .
تو من ءَ سال ءِ سر ءَ یک برے فونے نہ کُتگ مرچی ترا من بڈ ءَ آں گرداں . من ھیران آں ۔ اِنچو مردگ پرستی گُڈا. دِگہ لھتیں ھست زندگی ءَ مارا مردم اِش ھساب نہ کُتگ. نوں سُھب ءَ یک اسٹیٹسے ءُ بیگاہ ءَ یکے.
ھمبلو تو مارا یلا کُت ۔۔۔ جگر تو سکّ دور شُتے . تو پرچہ چُش اشتاپ کُت۔۔۔
اگاں ما اشتاپ کُتگ منی ءُ پیرک ءِ زھگ ھمود ءَ اَنت.
منی دست ئِے زُرت ءُ وتی دست ءَ کُت . اسٹیٹس والا وتی دوستی ءَ ھمودا پیش بدار اَنت .(من زاناں منی زھگ چُش چیسو ءِ زھگانی وڑا منی ھمک ھمراہ ءَ بگنداں دلمانگ بنت)
شما اسٹیٹس ءِ درد وار اِت بس .
مارا دِگہ چیز ءَ بے زار اِنت۔ بس وتی جُھد ءَ بہ سمبال اِت . ھور ءُ یک جاھی ءِ سر ءَ کار بکن اِت . جُھد ءَ ادارھی رنگ ءُ دروشم ءَ دنیا ءِ دیم ءَ بیار اِت . گوں شما دست بندی اِنت منی کلوہ ءَ سر کن مستر ءُ کماشاں کہ جُھد ءَ پردی رنگ ءَ مضبوط مہ کن اِت۔ ورنہ ما شمارا ھچ بِر معاف نہ کن اِیں. ارس ئِے ٹُپ ٹُپ ءَ منی دستانی سر ءَ گپت ءَ اِت اَنت .
من دپ کار بست پہ جست کنگ ءَ کہ من ءَ پیرک ءَ پرچہ سلام نہ کُت ؟
منی ھبر ءَ چہ ساری گشت ئِے ۔
پاکٹ ءَ سگریٹ مان ؟ من سگریٹ ءُ لیٹر دات اَنت گپّڈے ءَ ھاموش بوت . سگریٹے ھلاسی ءَ کُلّگ ءَ لگ اِت . گُشت ئِے چیزے روچ سگریٹ نہ کِشتگ سینگ بھتریں. پاد اتک ءُ اوشتات من ءَ گوں اِرسی ئیں چماں چارت ءُ گُشت ئے
اے ائید ءَ دیدگ ءُ سمو ءَ گُد ھست ؟؟؟
من چم منڈی منڈی ءَ جَھل کُت اَنت ءُ گُشت نہ زاناں گلاب جان .
بلے
پیرک ءَ پرچہ من ءَ سلام نہ کُت ؟
ھِچّ ئے نہ گُشت
سر چست کُت من ایوک اِت آں ۔
سگریٹ ءُ لیٹر منی چادر ءِ سر ءَ اِت اَنت
