پشتون تحفظ موومنٹ کے سربراہ منظور پشتین کو بلوچستان کے سرحدی علاقے چمن سے گرفتار کرلیا گیاہے۔
ا س سلسلے میں پشتون تحفظ موومنٹ کی سینٹرل کمیٹی کے ممبر زبیر آغا شاہ نے سوشل میڈیا پلیٹ فارم ایکس پر اپنے ایک پوسٹ میں منظور پشتین کی گرفتاری کی تصدیق کرتے ہوئے کہا کہ پی ٹی ایم قائد مشر منظور کو چمن میں گرفتار کرلیاگیا ہے۔
ان کا کہنا تھا کہ منظور پشتین کو اگرجلد از جلد رہا نا کیا گیا تو شدید ردعمل دیں گے۔
انہوں نے اپنے پوسٹ میں کارکنان کوپرامن رہنے کی اپیل کرتے ہوئے کہا کہ پی ٹی ایم کی مرکزی کورکمیٹی کی جانب سے نئے لائحہ عمل کا اعلان جلد کیا جائے گا۔
اب تک یہ معلوم نہیں ہوسکا کہ انہیں کس فورسز نے گرفتار کیا ہے۔
منظور پشتین چمن دھرنے میں شرکت کیلئے بلوچستان میں موجود ہیں۔
منظور پشتین نے چمن دھرنے میں شرکت کے بعد جاری بلوچ لاپتہ افراد کے لواحقین کے جاری دھرنے میں شرکت کیلئے تربت جانے کا اعلان کیا تھا۔
واضح رہے کہ منظور پشتین کے بلوچستان میں داخلے پر محکمہ داخلہ نے پابندی لگائی ہوئی تھی۔
اس حوالے سے ذرائع کا کہنا ہے کہ انہیں متعدد مرتبہ پابندی کے حوالے سے آگاہ کیا گیا۔
اس سے قبل منظور پشتین پر تربت دھرنے میں شرکت کیلئے جاتے ہوئے راستے میں فائرنگ کا نشانہ بھی بنایا گیا، جس میں وہ بال بال بچ گئےاور اس حملے میں 4 افراد زخمی ہوگئے۔
دوسری جانب سے پشتون تحفظ موومنٹ کی جانب سے منظور پشتین کی گرفتاری کی شدید الفاظ میں مذمت کرتے ہوئے کہا گیا ہے کہ منظور پشتین کی گرفتاری غیر آئینی اور غیر قانونی ہے۔
انہیں فوری طور پر رہا کیا جائے بصورت دیگر مرکزی کابینہ کے فیصلے کے مطابق شدید ردعمل دیا جائیگا۔
