نور۔۔۔۔۔۔۔۔۔!!
رُژنائی ءِ شیدائیں سر
تو چو کندیل ءِ بالو ءَ پہ رُژن ءَ ھُدوک اِت ئے ، ءُ ھما داب ءَ چو پروانگ ءَ رُژن ءِ پلگارگ ءَ گوں ڈیھ ءَ وارتگیں کَول ءُ مُسام ءِ پاسداری کُت۔۔۔۔۔۔۔۔۔۔۔۔۔
من وھدے شھید کماش رھمت ءِ اکس وتی اسٹیٹس ءَ اِیر کُتگ اَت۔۔۔۔۔۔۔۔۔، گُڑا تو گُلاب ءِ پُلّے روان دات ءُ ھمے نبشتگ اَت
” کماش!
من مُوتک آرگ نہ زان آں ،
نیکہ پہ تئی زمین ندْر بُوَگ ءَ بژنیگ آں۔۔۔۔۔۔۔۔
بلکیں شات آں ،
شات پرے ھاتر ءَ کہ تو وتی تُپنگ دُژمِن ءِ دیم ءَ چگل نہ دات ءُ پہ وتن نمیران بوت ئے۔۔۔۔۔۔۔۔۔۔۔۔۔
باز ءَ ترا گنوک گْوشت ءُ باز ءَ ترا ملنگ ءُ دِیوانگ ،
بلے تو پہ راستی ملنگ ءُ گنوگے اِت ئے۔۔۔۔۔۔۔۔!!
بلے کئی گنوک۔۔۔۔۔۔۔۔۔۔؟؟
ھانُلیں ڈگار ءِ۔۔۔۔۔۔۔۔۔۔۔۔۔۔
نیلّیں زِرّ ءِ۔۔۔۔۔۔۔۔۔۔۔۔
ڈیھ ءِ ھساریں کوھانی۔۔۔۔۔۔۔۔۔
بِہ گْوش۔۔۔۔۔۔۔۔!!
من چِتور مُوتک بِیار آں۔۔۔۔۔۔۔۔۔۔؟؟
مُوتک پہ ھما روچ ءَ کہ تو دُژمِن ءِ وش آتک ءَ مُرادیگ بوتین ئے ،
کماش!
پہ ترا زامران ءُ مِسکیں ڈگار ءِ ھر دمک ءُ دَر نازینک گْوپگ ءُ پِربندگ ءَ اِنت ، گُڑا من پرچا مُوتکیگ بِہ بَہ آں۔۔۔۔۔۔۔۔۔۔۔۔۔۔۔؟؟
من پرچا پُرس ءِ پتّرے تالان بِہ کن آں۔۔۔۔۔۔۔۔۔۔۔۔۔؟؟
تو زان ءِ آشوبی ءُ پہ ڈیھ ءِ آجوئی ءَ ندْر بوتگیں سرانی جون ماں جید ءَ چتور برگ بَہ اَنت۔۔۔۔۔۔۔۔۔۔۔۔۔۔۔
پہ چاپ ءُ نازینک۔۔۔۔۔۔۔۔، پہ ڈُھل ءُ سُرنا۔۔۔۔۔۔۔۔۔، گوں توپ ءُ تُپنگانی زمین جمب ءُ آزمان جکسیں توار ءَ۔۔۔۔۔۔۔۔۔۔۔۔
چی ءَ کہ تو نہ مُرتگ ئے۔۔۔۔۔۔۔۔!
بلکیں پہ وتن سالونک بوتگ ئے۔۔۔۔۔۔۔۔۔۔۔۔۔۔۔۔
تئی اے اھد سازیں کارِست داں بلوچ مان اِیت۔۔۔۔۔۔۔چیدگ ءُ ابدمان اِنت۔۔۔۔۔۔۔۔۔۔۔۔۔
کماش تو زِندگ ئے
گم مہ کن۔۔۔۔۔۔۔، من تئی دیوان ءَ الم کا آں۔۔۔۔۔۔۔
پہ زھیروک ءُ اھدی شَیرانی گوشدارگ ءَ۔۔۔۔۔۔۔۔۔
سلام کن سنگتاں
شُما رپتگ ءُ ما کا اِیں۔۔۔۔۔۔۔۔۔۔۔۔ "
نور۔۔۔۔۔۔۔۔۔۔!!
مرچی تو وتی گْوشتگیں دانکانی پد ءَ گوں سالونکیں سنگتاں کماش ءِ ھنکین ءَ رپتگ ئے۔۔۔۔۔۔۔۔۔۔۔۔،
من زان آں۔۔۔۔۔۔۔۔!!
تو گوں کماش ءَ گْورامباز بِہ بَہ ئے ، تئی اولی گپ ھمے بیت ، کماش پہ تئی زھیروکاں سک زھیریگ بیتگ آں۔۔۔۔۔۔۔۔۔
مئے سلامی ءَ دِگہ توپ ءُ تُپنگانی دپ لگوشگی نہ اِنت۔۔۔۔۔۔۔۔، پہ مئے وش آتک ءَ بس گوں وتی شیرکِنیں توار ءَ زھیروک ءُ مُلّا کمالان ءِ سَوتے ءَ شِن۔۔۔۔۔۔۔۔۔۔۔۔۔۔۔۔
من زان آں۔۔۔۔۔۔۔!!
کماش ھم پہ ٹھک ءُ بِچکند۔۔۔۔۔۔۔۔۔۔۔۔۔۔، پہ شان ءُ مڑاہ گوں مُلّا کمالان ءِ سَوت ءُ تاھیر بکشیں زھیروک ءَ شُمارا وش آتک کنت۔۔۔۔، اے دمان ءَ کُلّیں شھید شُمئے مجلِس ءُ دیوان ءَ وشنود بَہ اَنت ءُ ھمے ھال اھوالاں ءَ پُرس اَنت۔۔۔۔۔۔۔۔۔۔۔
چون اِنت مئے آپ داتگیں کِشار۔۔۔۔۔۔۔۔۔۔۔۔؟
چون اَنت مئے راجی منگھیں سر۔۔۔۔۔۔۔۔۔؟
چون اِنت براس ءِ کاروان۔۔۔۔۔۔۔۔۔۔۔۔۔۔۔؟؟؟
ھمے دیوان ءَ لاگر بالاد ءُ سُھرگیں ورنائے ( چیسل واکیہ ) پہ پُر بِچکندیں دپے پُرس اِیت۔۔۔۔۔۔۔۔۔،
ھاں ڑے پیرک۔۔۔۔۔۔۔۔۔!!
ھالاں دے باگیں زامران ءَ ھَوراں گْورتگ ءُ بھارگاہ اِنت ، بلے منی ارواہ ھمود ءَ کلّ اِنت۔۔۔۔۔۔۔۔۔۔۔۔۔۔جزمّاں ھوشامی نہ بیت۔۔۔۔۔۔۔۔
من زان آں۔۔۔۔۔!!
تو چیسل ءَ چے پسّو دے۔۔۔۔۔۔۔۔
چیسُو۔۔۔۔۔!!
دِل تپرکہ مہ بُو ، تئی ارواہ بھارگاھی رگامانی سرتّلاں آپ کنت۔۔۔۔۔۔۔۔۔ھینّار نہ بیت۔۔۔۔۔۔۔۔۔۔۔
داں بلوچ ءِ ارواہ باتِن ءَ ساڑی اِنت دُژمِن کدی چینکاں نہ بیت ، بلکیں باگیں زامُران چو بھشت ءَ سمبھ اِیت ءُ تو ماں ھساراں چیدگ بَہ ئے۔۔۔۔۔۔۔۔۔۔۔۔۔
ھمے گپ گپ ءِ تہ ءَ سمّؔو ءِ مستیں توکلؔی ( یونس توکلی ) الھان کنت ءُ گْوش اِیت۔۔۔۔۔۔۔۔۔۔۔۔پیرک!
دیوان بے شَیرے ءَ وش نہ اِنت۔۔۔۔۔۔۔۔۔۔۔۔۔۔۔
من زان آں!
تو پہ مھرے دیم ءَ گوں توکلی ءَ کن ئے ءُ گْوش ئے بِہ وان یونس جان کہ دیر اِنت چہ تئی شھدیں زُبان ءَ تئی شَیر گوش نہ داشتگ اَنت۔۔۔۔۔۔۔۔۔۔۔۔۔
گُڑا توکلی پہ شاکارگ دیم ءَ کِنز اِیت ءُ وتی آشوبی شَیر ءَ وان اِیت کہ ھر بند ءِ تہ ءَ مِسکیں ھاک ءِ وشبوئی سرّیچ اِنت۔۔۔۔۔۔۔۔۔۔۔۔۔۔
بلے نور۔۔۔۔۔۔۔۔۔۔!!
گُڈّی ءَ ترا گپّے گْوش آں ،
مرچی تئی گوں سنگتاں وتن نمیرانی ءِ کِسّہ آسریچ اِنت ، چاڑانی ابیتکیں زیمر زِرد ءَ اِیمن کرار شکساھگ ءِ بدل ءَ گوں آسی زِھاں پیڑان اِنت ۔
دِل ءَ کہ کھرشانیں ھیال تاب ءُ ریس وارت گُڑا ھما دمان ءَ تئی گوں کماش ءَ گْوشتگیں دانک دیدگاں اُوستانی مُھکمیں کلاتے مِکّ کنت۔۔۔۔۔۔۔۔۔۔
پمیشکا۔۔۔۔۔۔۔۔۔!!
من اُوں ترا ھمے گْوش آں ،
پہ تئی وتن نمیرانی ءَ من پرچا موتکیگ بِہ بَہ آں۔۔۔۔۔۔۔۔۔۔۔
چی ءَ کہ تو چہ وتی راجی لیکہ ءُ مکسد ءَ پدگرد نہ بوتگ ئے ، بلکیں پہ راجی آکبت ءُ سُھر دپیں بامگواہ ءَ کَولیگ بوتگ ئے۔۔۔۔۔۔۔۔۔۔۔۔۔۔
پہ اے ھبر ءَ من شات بِہ بَہ آں ءُ پھر بِہ بند آں کہ منی ھمبل ءَ رستریں دُژمِن ءِ گون ءَ جنگ کنان ءَ وتی سر باھینت ، بلے سرجھل نہ بوت۔۔۔۔۔۔۔۔۔۔۔۔۔۔
اے راستے من ءَ تئی گوں سنگتاں۔۔۔۔۔۔۔۔۔۔۔۔شھیدی ءَ اندر ءَ پُروشتگ ، بلے اے ھبر ءَ من وتی بالاد ءُ لُنٹانی میار کُت نہ کن آں۔۔۔۔۔۔۔۔۔۔۔۔۔۔۔۔۔۔۔۔داں زُبان ءَ در کپتگیں تئی دانکانی کم سنگی مہ بیت۔۔۔۔۔۔۔۔۔۔
چی ءَ کہ آ گوھریں دانک انگت منی زِرد ءِ رودپتر ءَ نبشتگ ءُ لیکو ءِ گْرنچ ءَ ایر اَنت ، کُجام وھد ءَ سنگتے کہ پہ ڈیھ ءِ دیمپانی ءَ کَولیگ بیت گُڑا ھما دمان ءَ من زِرد ءِ رودپتر ءَ بوجان ءُ تئی گْراں بهائیں دانکانی وانگ ءَ بِندات کن آں۔۔۔۔۔۔۔۔۔
بلے مرچی۔۔۔۔۔۔۔۔!!
تو ھم پہ وتن نمیران بوت ئے ءُ نوکیں کِسّویے رَتک۔۔۔۔۔۔۔۔۔۔۔۔
اے کِسّہ ءَ سمّو الم وان اِیت ءُ پہ پھر گْوش اِیت۔۔۔۔۔۔۔۔۔۔۔، منی ابّا بامردے۔۔۔۔۔۔۔۔۔۔۔۔۔۔۔، منی ابّا بامردے۔۔۔۔۔۔۔۔۔۔۔۔۔۔۔۔۔
