من ءَ اگاں یات بِہ بیت فروری ماہ اَت یاکہ مئی . وھد بگاہ ات .
ولید اَتک منی لوگ دپ ءَ اوشتات ءُ شوتارے (ھارن) جت ئِے۔ ولید منی جُھد ءِ اولی ھمراہ اِنت . من دروازگ ءِ تاکے داشت ءُ گُشت بیا ڈے لوگ ءَ
ناہ من اشتاپ آں ۔۔۔۔۔۔۔ تو بیا کمو ڈنّ ءَ .
من دراَتک آں ۔۔۔۔پدا گُشت بیا آپے بِہ ور ۔۔
آئی گوشت اناہ من ترا ھالے کناں رواں ۔ من ءَ جھلیں توارے ءَ گُشت ئِے واجہ گُشتگ باندا بیا اِت ھالے کناں من گُشت شرّ گِڈا باندا . نہ بوت کہ من ئِے جُست بہ کن آں ۔۔۔۔۔باندا چِہ وھد ءَ ؟ پیسر ءَ
گُشت ئِے ساھت 9:00 یا 10:00 ءَ من کا آں ،ولید وتی کُتگیں اکرار ءَ اَتک ءُ ما سیکل ءَ جماز بوتیں ءُ شوتیں پہ پیر جان ءِ ھلاکہ . اودا مئے ٹکانہ ھدامرزیگیں ٹیلگ ءِ بیٹک اَنت . (ھدامرزی اے واستا کہ لگور بوت )
ما رست ایں
سلام دُوا ءَ پد آپ ءُ چاھے وارت کندگ ءُ مزاک اَت . 2/3 ادار پہ انچو گوست ۔ سیکلے ءَ دَر ءِ دَپ اتک ءُ شوتارے دات چیرمین ءَ سر کشّ ات ءُ گُشت ئے پیرک اِنت ما اِے نام اولی رند ءَ اِش کُتگ اَت ۔۔ ما دویناں ھوری ءَ گوشت پیرک کے اِنت؟؟؟
اڈے نورا . نورا ماسٹر ءِ برات . ما وتی وتی جُل چست کُت اَنت ءُ پہ اشتاپ اشتاپ ءَ دیم شود ءَ شُت ایں ( گسل خانہ ) ما اِے وھد ءَ نوک جُھد ءَ ھوار بوتگ اَتیں . ما گُشت مارا کم ءَ چہ کم مردم بہ گندیی ءُ بزانت . من ءُ منی ہمراہ دیم شود ءَ چیر بوتیں .پیر جان اَتک ءُ نشت ما نوں اولی رند اِنت کہ پیر جان ءِ توار ءَ اِش کنگ ءَ اَت ایں ۔ کساس دوءُ نیم یا سے ادار ءَ پد داں پیر جان ءَ کسّے ءَ ڈنّ ءَ لوٹ اِت ءُ آ شوت . ما شُگرے گپت ءُ دراَتک ایں داں دگہ نوکین چاھے ٹیلگ آرتگ اَت بلے نوں سرد اَت ما کوپے کوپے چاہ وارت ءُ پد ءَ مجلس بنا بوت ۔ ولید گون واجہ ھال ءُ اھوال ءَ ڈنّ ءَ شُت . دیر نہ گوست ولید اَتک گُشت ئِے رَو اِیں کہ شپ بیت. منی دل مان اَت انشپی مردم ٹیلگ ءِ مہمان بیت ۔ بلے ولید ءَ زور کُت کے رَو ایں دیر بیت من دَر اَتک وتی نیمگ ءَ ۔۔۔۔ راہ ءَ منی ءُ آئی بنگپّ پیر جان اَت . بلے من پیر جان ءِ دیم انگت نہ دستگ اَت۔ وھد گوزان اَت۔۔۔۔۔۔۔۔ مارا یک روچے چیرمین ءَ ھال کُت شما بیا اِت مئے نیمگ ءَ ۔ سنگتے ءَ پسے داتگ وران ئِے ۔ من ءُ ولید پد ءَ ہما پیشیگیں وڑا شُت ایں۔۔ بلے اے رندا مارا پیر جان ءِ لوگ ءِ ڈسّ دیگ بوتگ اَت . ما کہ لوگ ئِے سر بوتیں ۔مارا گُشگ بوتگ ۔ سنگت شُتگ اَنت گُشتگ اِش بیا اِت پیرجان ءِ
زی ءِ باگ ءَ ۔۔۔۔۔۔۔۔۔۔۔۔ ما شُت داں کُل سنگت ھمودا اَنت ۔۔۔۔۔۔۔۔۔۔۔ ما وتی دیم بستگ اَت چیرمین مئے دیم ءَ اَتک ۔ پہ کندگ گُشت ئے مرچی شُمئے رازداری نہ بیت دیماں پچ کن اِت . ما دل ڈَڈّ کُت ءُ دیم پچ کُت اَنت شُت ایں پہ باگ ءَ ۔ من وتی اسکول ءِ دور ءِ ھمتبکیں سنگتے دیست۔ سنگت دیست سک گل بوت آں مُدتّے ءَ رند ما یکے دومی ءَ دوچار کپتگ اَتیں . آئی من ءَ دِیست ءُ گُشت ئِے ۔ ھاں ڈےےے تو کدی پہ ؟ ما دست ماں دست بوت ایں ءُ شُتیں پہ ساھگے ءَ نشت اِیں . گُڑا ہما مرد ءِ توار منی گوشاں کپت کہ ہما رندی من چم شود ءِ توک ءَ آئی توار اِش کُتگ ءَ اَت من ءَ ھم ھدوناک اِت آں پہ پیرک ءِ گندگ ءَ .
آئی کوکار ءَ کُت گُشت۔۔۔ گلاب ءَ بُگُش ڈیو بیار گوں . دیر نہ گوست پیرک وت اَتک ءُ گُشگ ءَ اَت پس بے ڈیو ءَ وش نہ انت ۔ وتی بڈ ءِ G3 توپکے گوں مَچے تکا دات۔ مارا روک روک ءَ چارت ءُ گُشت ئِے دِزی سرمچاراں چے ھال اِنت ؟
گوں ہمے گپ ٹَھکے دات ئِے . من ھمدا مارت کہ پیرک توازابازیں مردمے . وھدے وَرگ تیار بوت اَنت سنگت پرزونگ ءِ گرد ءَ نشتگ اَنت ۔ پیرک مئے دیم پہ دیم نشتگ اَت۔وتی دیم ءِ گوشت ءَ سندان ءُ مئے دیم ءَ دور دیان اَت ۔۔۔۔ گُشت ئِے بُور اِت بُور اِت پدا باریں اِے پیمیں پس دست کپیت یا ناہ. من پد ءَ دل ءَ جیڑ اِت کہ مھروانی یے ھم ھست انت ۔ پدا ما دیر ءَ یک دومی گوں دوچار نہ کپت ایں . ھمے وھد ءَ کہ پاد ءَ تیر وارت ئِے۔ ھمے وھد ءَ پدا ما یگجا بوت اِیں ۔ من ءَ دیر اَت کہ من وتی ھندی مردم نہ دستگ اَت ۔ گُڈا من ءَ ھال اِش دات کہ پیرک ٹپّی اِنت سنگتاں گون اِنت ۔۔۔ پیداک اَنت . من گل بوت آں ءُ پریشان ھم باریں چون ٹپی اِنت ؟ بیگاہ ءِ وھد ءَ آ آتک ءُ سر بوت اَنت۔ من اَتک آں ءُ پادوم ءِ نشت آں من جست کُت چون ئے ؟
وش آں برابر آں۔۔ تو چون ئے؟
من وش آں
تو ھال کن ترا چے بوتگ ؟ کندگے جت ءُ گُشت ئے من ءَ(اندھی گولی)یے ءَ لگت ءَ من ہم آئی گپ ءَ دل وش بوت آں ءُ بچکند اِت . شپ ءَ من شُتاں کُڈّ ئِے من مزنیں جست ءُ پدے کُت سنگتانی ۔۔۔۔۔ ھلاکہ ءِ ۔۔۔۔۔ کے مرتگ۔۔۔۔۔ کے اَتکگ ۔۔۔۔کے شُتگ
۔۔۔ اے شپ ءَ من چہ گلءَ زمیں ءَ جاگہ نہ کُت گُشئے زاناں من ءَ چاڑے رستگ اَت .
وھد ءِ ھمرائی ءَ گون وتی کار ءُ زمہ داریاں برے ھلاکہ ءُ ھندے ءَ اَت ۔ برے بلیدہ برے زامران برے پروم اَت . پدا منی سر ما نیٹورک والا ھلاکہ یے ءَ کپت کہ اے وھد ءَ پیرک ءَ بلیدہ ءِ زمہ داری گون اِت اَنت . ھر وھد ءَ نیٹ ورک ءَ اَتک منی گوما ھالے کُت جست ءَ پدے کُت سنگت ھلاکہ مسلہ ءُ جیڈاہانی بابت ءَ full update ءِ گپت ءُ چہ نٹورک ءَ شُت ۔۔۔ من ءَ گون پیرک ءِ کندگ ءَ سکیں بلاہیں مھرے ھست اَت. منی گوما کجام وھد ءَ کہ وٹسپ ءَ ھالے کرتگ اَت گُڈا من گوشتگ : اڈے پیرک کندگے رَوان دئے: برے برے کندگے نیتک اَت بلے منی ھاترا کندگ ءِ جُھدے کُت من زانتگ اَت کہ منی ھاترا گپتگ کہ کندگ ءَ اِنت ۔ پدا یک شپے منا گُشت ئِے تو کندگی ویڈیو دیم بدے من چاران ئِے گُڈا پہ تو کنداں. من دو سے کندگی ویڈیو ایر کُتگ اَت کہ پیرک نیٹ ورک ءَ کیت من ایشان دیم دیاں بلئے پہ من ءَ کندگ دیم دنت .
من ءَ اِے شپ انگت یاد اِنت . منیگ ءُ پیرک ءِ ماں وٹسپ ءَ ھال ءُ اھوال بوت
پیرک : سلام پُل
من : و سلام جگر تو چون ئے وش ئے ؟ سنگت وش اَنت ؟ ھیر اِنت تو دیریں گار بوتگ ئے
پیرک : ھو یار من دِگہ نیمگے ءَ بوتگ آں اودا نیٹ ورک نہ بوتگ . نیٹ وَ وتی جاگہ ءَ .
من: من تئی پہ تو ویڈیو ایر کُتگ دیم ایش بِہ دیاں؟
پیرک : نہ کنئے ڈے چُش من مرد ءِ باگ ءِ توک آتکگ آں درچک ءِ سر ءَ لونجان اِنت مرد ءِ وئی پائی دُوزتگ ایشی کُچک منی سر ءَ وَکّگ ءَ اِنت من بہ کند آں بزان منی انشپی ھال نہ بوت .
من : گُڈا مرچی منی سوب ءَ داتگ .
من میسج دیم دات ءُ میسج ءِ دُمب ءَ دو ویڈیو دیم دات .
من ءَ انگت یاد اِنت 21 کترہ (سیکنڈ) ءِ توار بندے کمے رند ءَ اَتک . من ھمے سرپد بوت آں بہ گُشیت من مرچی تئی ویڈیو ءَ پچ کُت نکن آں بلے چوش نہ اَت .
21 یکیں کترہ (سکینڈ)تواربند بس کندگے اَت ۔کککککککککککککککککککک .
دومی توار بند ءَ گُشگ ءَ اَت ۔۔۔۔تو وتی شرّیں کار کُت اَنت وائی پائی ءِ مرد گوں کُچک ءَ پیداک اِنت. من شُت آں گُڈا . من کمے جیڑ اِت تو شرّ نہ کُت سنگت باریں چون اَتکگ ھمے وائی پائی یے شوہاز کُتگ تو گوں وتی بچکیاں مرد تاچینت . بلے من ھمے کندگ شپ ءَ 50 ءَ رند ءَ گیش گوش داشت ءُ وت کند اِت . ہمے توار بند من کسے ءِ سر ءَ دیم دات کہ ایشی وتی کرّا پہ اَنامتی ایر کن بلے من ءَ نوں ھِچّ ھوش نہ بیت آ کے اَت . وھدے ہمرائی ءَ پیرک ءِ کار ءُ زمہ داری گیش بوان اِت اَنت . آ گیش تر دست گٹ بوان اَت.
من پیرک ءِ وڑیں کندگ اولی ءُ گُڈّی رندا اِش کُتگ اَت .
منی سر ءَ سالے ءُ 3 ماہ ساری یک جیڑھے (مسلہ) کپتگ اَت منی نزیک ءَ چہ نزیک تریں مردماں من ءَ یلہ کُت ءُ من ایوک بوت آں .
اتا شاد گُشیت (زیمیں دل ءَ کُجا براں تیر وتی جگر وتی ) پہ من ھمے وڑ اَت . من ءَ اے ساھت ءَ ماسٹر ءِ سک باز دل بڈی ءُ کمک گون اَت ۔ بلے من ءَ انگت پیرو ءِ دل بڈی ءُ تسلھاں پہ وت سک کمی مارت۔۔ بلے پیرو اے وھد کیز اَت .بزاں بند اَت. من ھر وھد ءَ کہ گیش تکانسر ءُ پریشان بوت آں ایوکی مارِت پیرو ءِ وٹیسپ ءِ last seen چارت ءُ ہمے گُشت کہ باریں کدی بیت رمس ءِ جاگہ today نبشتہ بیت من پیرو ءَ گون وتی بزگی ءَ درنگازاں ۔۔۔۔ بلے پنچ ماہ ءَ ھِچّ وڑیں ھالے نیست اَت ھر کس ءَ کہ من جست کُت ۔۔۔۔گُشت اِش اللہ ھیر کنت شما دعا بکن اِت . من دل پہ دنتان داشتگ ات ءُ برے برے دعا ھم کُت اللہ ایشی ءَ پہ سلامتی واترین .
پہ وَدار وھد گوزان اِت اَنت .
یک روچے چہ بھرین ءَ سنگتے ءَ پہ من اکسے دیم داتگ اَت من سرپد بوتاں اَنچیں لس اکسے بیت من دلگوش نہ کُت. پدا لھزایے ءَ پد کلوھے(میسج) کُت ئِے پیرک کدی دراَتکگ من کلوہ دیست من ءَ گُشئے زان آں گارین ھزانگے دست کپت من زوت زوت ءَ اَکس پچ کُت داں پیرو ءِ فیس بُک ءِ اَکس اِنت بلے نوکیں اکسے من گُشت باریں من ھالے گیراں. من ہما لھزا ءَ سنگت ءَ را جست کُت پیرک ءِ ھال بدئے گُشت ئے پیرک مرچی دراتکگ۔۔۔ من گُشت پہ من وٹسپ نمبر ءِ روان بدئے گُشت ئِے آئی کرّا مردم ھست گیش آں نمبر ءِ دیم دیاں . من کمے وادر کُت بلے دل من ءَ وار دیگ ءَ نہ اَت ۔
من فیس بک ءَ سلام دیم دات منا جوابے کُت
تو چون ئے ۔۔۔۔۔۔ من وش آں ۔۔۔۔۔۔۔۔۔ تو ھال کن شما چون اِت ؟۔۔۔۔۔۔۔۔۔۔۔۔ من گُشت کہ من بے تو سک ایوک بوتگ آں آئی direct پہم اِت کہ من ءَ چے گوشگ لوٹ ایت ۔۔۔ اِدا گپ نہ بیت من ترا وٹسپ نمبرا دیاں ھمودا ھال کن ایں ۔
ھو گُڈا زوت کن نمبر ءَ دیم دئے ۔ 10/15 دمان (منٹ)ءَ ندر ماں وٹسپ ءَ کلوہ اَتک۔۔۔ من پیرک
جوڑی تیاری ءَ پد من ءَ گُشت ئِے منی اِے پنچ ماہ ءِ گاری یے نہ بوت پہ من نہ سیاد پشت کپتہ نیکہ لیڈر . سیاد منی جیڑہ ءِ نیمگ ءَ اشارگے اَت ءُ لیڈر استاد اسلم اَت۔
یار گون تو سک باز گپ ھست ۔۔۔۔ گُشتے گیشّ آں ترا ھال کن آں .
من گُشت تئی وَدار اِنت جگر .
دومی روچ ءَ من ءُ آئی ءَ چَہ ادارے (گنٹہ)ءَ گیش گپ ءُ ھال کُت. بلے گُشتے کسّے پیداک اِنت منی چارگ ءَ من ترا پد ءَ ھال کن آں. وھدے من موبائل چہ گوش ءَ ایر کوت گُشئے منی درد ءُ دور کمتر بوت اَنت . پیرو ءِ اِے دانک من ءَ انگت یاد اَنت اِے جُھد مارا شمارا دیم ءَ بَرَگی اِنت . من گوں تو دست بنداں باز مہ جیڑ ھُدا ھَیر کنت۔ منی ھبرے کُجا داں روت من کوشست کناں بلے چَہ جُھد ءُ جَنگ ءَ چہ دور ءُ گستا مہ بِہ اِت . اے جَنگ ءَ وتی بکن اِت اِے مئے شمئے کوپگان اِنت . کسے کنت یا نہ کنت بلے من تو بہ کن آں ۔۔۔ وھد ہر کسی راستی ءَ پدر کنت . بس سبر ءُ اوپار لوٹیت۔ تھمبل ءِ سر ءَ کار بکن . کسے تئی گپ ءَ زوریت آئی سر ءُ سوج بکن . دل بڈی یے ءِ ہمرائی منی راہ شونی یے کُت . بلے پد ءَ منی گوما اِے بابت ءَ ھال ءُھبرے نہ بوت .
منی بُرّ ءُ بین (آپریش) ءَ نوکی دو سے روچ بوتگ اَت ۔ من چہ نادراھجاہ ءَ گیش اِتگ اَنت آں . من ءَ یکے ءَ ھال کُت کہ پیرک اَتکگ ۔ منی دل سک مان اَت من ئِے بہ گنداں . نہ بوت ک من ھال ئِے بکن آں من ءَ کسّے چہ ڈَنّ ءَ توار کُت ۔۔۔۔۔ پیرک ءُ دِگہ دو سنگت اَنت اَتکگ اَنت من سک وش بوت آں شرّیں کہ من دیست ۔ اَتک اَنت منی ھال اِش گپت ءُ پد ءَ زوت شُت اَنت . سک زھیر کُتگ ءِ منی ھیال ءَ پہ زامران ءُ بلیدہ ءِ کوھ ءُ کلگ ءَ زوت شُت ۔۔۔۔۔۔۔۔۔ پہ محاذ ءَ. ہمے میان ءَ منی دیرا داں گون آئی ھال نہ بوت ۔۔۔ نہ دیستگ اَت ھم . یک روچے من راھے ءَ رَوَگ ءَ اِت آں داں من ءَ پون ئِے کُت. پدا ھما جُست ءُ پد سنگت مہلوک چپ ءُ راست ءِ ھال ءُ اھوال ءَ پد من ءُ آ گپے ءِ سر ءَ اَڑتین من زھر گپت آں ءُ فوں کٹ کُت . پدا من ءُ پیرو داں 4 5 ماہ ءَ ھال نہ کُت .
کساس 26 روچ ساری من ءَ نوکیں نمبرے ءَ کلوھے اَتک
سلام
من والیک کُت ۔۔۔۔۔۔۔ چون ئے وش ئے؟ من جُست کُت
تو ؟؟؟
گُشتے پیرک
من کندگے جت ءُ پاد اَتکاں شُت آں ایوک ءَ نشت آں من گُشت بلکیں پون کنت من جست کُت کدی اَتکگ ئے نیٹ ورک ءَ ۔۔۔۔۔۔
3 روچ بیت ۔۔۔۔
۔۔ ماس کماش مھلوک چون اَنت ؟ کُل برابر اَنت ۔ سمو دیستگ چون اِنت ؟
بس ہمے گُشت ئِے ندستگ . اے رندی یکے اَھدے ءِ وڑ ءَ من ءَ ھالے کُت دِگہ موھے نہ دات کہ off line بوت منی دل ءَ لوٹ اِت گیشتر گپ بہ کنت آں . من دل ❤ دیم دات ہما دمان ءَ چارتے ءُ ھِچّ ئِے نہ گُشت………….
اے رندی نہ من آئرا گُشت کندگے دیم بدے ءُ نا آئی چُش گُشت کندگ ءِ واستا ویڈیوے دیم بدے من چاران ءُ پہ تو کندگے دیم دیاں.
ہما دل کہ من ھاس پہ پیرو ھمے واستا دیم داتگ اَت کہ ایشی جواب ءَ بلکیں چیزے دیم بدنت۔۔۔ بلے آ دل انگت نپس کشگ ءَ اَت من چارت انگت ساھے مان اِنت مزن ءُ کسان بوھگ ءَ اِنت بلے پیرو ءَ ھدا reply ءِ ھاٹیگ نداتگ اَت .
اے رندی اللہ ءَ مارا زُرتگ اَت نماز روچک کُل گون پابندی ءَ بُوّگ ءَ اِت اَنت من سھور کُت نماز ونت موبائل بند کُت کسے منی واب ھراب مہ کنت پیشیم ءِ بانگ منی گوشاں کپت من پاد آتک موبائل ھر روچیگیں وڑا پچ کُت بلے نچارت دلمانگ اِت آں نمازے کناں گُڈا کلوھاں چاراں بلے وٹسپ ءِ سک باز کلوہ ءَ توار کُت ۔منی دل ءَ من ءَ وار نہ دات .من دست پہ موبائل نہ برتگ اَت داں ڈَنّ ءَ سنگتے ءِ نمبر ءَ رینگ وارت . من چست کُت ھلو ۔۔۔۔۔
چون ئے وش ئے ؟
پروم ءِ جنگ ءِ ھالاں بدئے ۔
منی دپ پچ ات پہ گیھاسگ ءَ. منی دپ بند بوت .چونیں جنگے ؟
من ترا جست ءَ آں ۔۔۔۔۔۔تو من ءَ جست کن ئے۔
شمئے سنگت اَنت تو زاناں سھی نہ ئے ؟ من گُشت اِناہ ۔۔۔ من نوکی چہ واب ءَ پاد آتکگ اَنت . ھال ئے بگر من ءَ ھال بدئے پون ئِے کٹ کُت . من زوت زوت ءَ پونے جت سنگتے ءَ گوں ھال کُت اِے چونیں ھالے باریں ؟
گوشت ئِے ھال بدیں ھالے .
من گشت چے ھال اِنت بلے تو من ءَ وَ بِہ گُش ! گُشت ئِے نورا گوں سنگتاں دوشی ساھت 3:00 ئیگ اِنت جنگ ءَ اِنت . من گُش گُڈا۔۔۔۔۔ گُڈّی چے ھال ھست۔۔۔۔۔۔ من ءَ کسے ءَ انچو گوشتگ نورا ءِ تیر کم بوتگ اَنت وت ءَ جتگ ئِے
من پہ زھر گُشت بکواس مکن ۔۔۔۔۔ من ءَ وت ءَ باور نہ بیت بلے گپ ہمے وڑ اِنت ۔۔۔۔۔۔ منی دست ءَ چہ موبائل کپت من وتی نپادانی سر ءَ دست سر ءَ کُت ءُ نشت آں . مات ءَ دروازگ پچ نہ کُتگ ءُ گُشت ئِے پاد ءَ نوں پیشیم اِنت نماز نہ کن ئے؟۔۔۔۔۔۔ بلے مات ءَ زانت من ءَ زور ءِ نماز ھِچّ تب نہ بیت. گپے ھلاسی ءَ گوں دروازگے پچ کُت ءُ من ءَ دست ماں سر ءَ اِت آں ارس یلہ اِت آں . دور ئِے کُت پہ من ترا چون اِنت؟،،،،،،،،، من نہ بوت آں ،،،،،،،،،، پروم چونیں ھالے من شُتگ آں سہبی ہمسایگ گپ ءَ اِت اَنت پروم جنگے بوتگ ولید وش اِنت ؟ کجا اِنت منی برات وش اَنت ؟ مات ءِ دپ ءَ ھر کسی نام کیت نام ءِ گپت ءُ من ءَ جست کنت من چوں کُنٹ ءَ ھوشک اِت آں . تو چیا گپ نہ کن ئے ؟ چے بوتگ مات ءَ پدا یک رندے من بج ءَ گپت ءُ جست کُت. من گُشت پیرک ۔۔۔۔۔۔اما پیرک شہید بوتگ۔۔۔۔۔ منی دل ءَ گُشت ہمے وھد ءَ پریات کن چہ مات ءَ گیشتر بگریھ بلے من چُش نہ کُت وت ءَ سمبال ات پون پد ءَ دست ءَ کُت دِگہ کسے ءِ سر ءَ پون کُت ۔ پیرکے ہمراہ کے اِنت؟ گُشت ئِے گلاب اِنت ءُ گلاب ءِ برات عبدلمالک اِنت ۔ چہ منی دپ اوپے دراَتک ءُ زبان گونگ بوت۔۔۔۔۔۔۔۔ بلے منی اے اوپ ءِ اِش کُت یک لھزایے ھاموش بوت ءُ پدا گُشت ئِے دِگہ یک سنگتے بلیدہ ءِ ہم گون اِنت من پد ءَ زبان کار بست ءُ گُشت چار سنگت اَنت ؟؟؟ گُڑا چاریں شہید بوتگ اَنت ؟
گُشت ئِے بلے گلاب انگت گوں سنگتاں ھالے توک ءَ اِنت انگت شھیدی ءِ ھالے نیست . من direct دست چست کُت اَنت اللّٰہ پاک ءَ چہ ہمے دعا لوٹ اِت. یا اللّٰہ اے ھبراں دروگ بہ کن اگاں دروگ نہ بنت ۔۔۔گلاب ءَ ھِچّ مہ بات کہ سلامتی ھالے ہست اِنت ۔ من پاد اتکاں ءُ دزنمازے گپت ءُمسلہ تالان کُت نمازے وانت ءُ اللّٰہ پاک ءَ چہ ہمے دعا لوٹ اِت نواز ءَ ھچ مہ بات تاوان پیرو ءِ بس اِنت یکیں کہول ءِ 3 مردم یکجا مہ بر تو بادشاھے ئے تو ھر چیز کُت کن ئے . بلے گُشئے اللّٰہ ءَ منی دعا سر نہ بوت اَنت. من زوت زوت ءَ مُسّلہ پیتک ءُ موبائل زُرت من ءَ ہمے ھال رس اِت کہ گلاب ھم ھک پھلی کُتگ گُشتگ ئِے منی تیر کم اَنت ءُ ھیلی ھم سر بوتاں. بلے دو تیر اِشتگ کہ اے من وتی جند ءَ پہ ایر کُتگ اَنت . دو تیر ہمے واستا بلکیں یک تیرے miss fire بہ بیت .من مرگ ءَ منّ ءَ بلے وت ءَ دشمن ءِ دست ءَ ندیاں ۔۔۔۔ ھمے گپاں پونے کٹ بوتگ . سنگتانی دل ءَ اوپار نہ شُتگ پدا نمبر اِش جتگ داں دَری زبانے ءَ گپ کُت بزاں پنجابی یے ءَ ۔۔۔۔۔ دراھ دل یکیم بوتگ اَنت کہ گلاب ھم وت ءَ شھید کُتگ .
اِے روچ پہ من ءَ چونیں روچے اَت آئی من گھتر زاناں بلے دومی نیمگ ءَ من پھر ھم بنداں .اے منی ہمراہ اِنت منی گَل ءِ سنگت اِنت وتی جان اِش ندر کُت پہ زمین ءَ بلے وت ءَ دشمن ءِ دست اِش نہ دات . دومی روچ ءَ من دست داں بی ایل ایف ءَ سنگت وتی کُتگ اَنت پھر بندگ ءَ اِنت کہ منی سنگتاں سر داتگ بلے زمین نہ دات. ءُ منی وش ٹھکیں پیرو ءَ میجر ئے گُشتگ گلاب ءَرا لیفٹینٹ ءِ ایزاز داتگ.
زی سُہب ءَ من ءَ میجر نورا ءِ گُڈّی کلوہ دست کپت پہ گوشدارگ ءَ گُڈا منی سر گُشئے چہ پیشیگ ءَ چست تر بوت . پرچہ کہ من ءُ نورا سنگت اِت ایں . نوار ءِ گُڈّی کلوہ گُشئے ہما گپ اِت اَنت کہ من ءَ چہ زندان ءِ در اَیگ ءِ وھد ءَ گُشتگ اِت اَنت ئِے۔۔۔۔۔۔ اے جنگ مارا شمارا کنگی اِنت بِلے ھر کس چے کہ بِہ گُشیت وھد ھر کس ءَ وت پدر کنت مرچی وھد ءَ نورا میجر نورا کُت . چہ میجر ءَ من یک گپے الم در برتگ ءُ آئی کردی دروشم ءَ کُتگ ءُ پیش داشتگ کہ سبر ءُ تھمبل ءَ گون کار بکن ءُ بازیں جیڑہ ءِ توجیل پہ وھد ءَ ایر بکن آیانی توجیل ءَ وھد وت کنت انچو کے مرچی ھر کس پھر بندیت کہ میجر منی سنگت بوتگ منی چُک بوتگ۔ برات ۔ناکو۔ ناکوزتک گھارزتک۔سیاد دوست ھمتبک (کلاس فیلو) ءُ دستیگیں مردم بوتگ پھر بند اَنت.
بلے انگت یک گپے من ءَ بے تاھیر کنت.
من سک پشومان آں اے پشومانی منی سرجاہ ءِ کُنٹگ اَنت من ءَ آرام ءَنیل اَنت.
کہ من گُڈّی رند ءَ پرچہ پیرو ءَ نہ گُشت .
( اڈے پیرک کندگے روان دئے)
اے منی اولی نبشتاک انت .
من پہلی لوٹاں چہ میجر ءَ اگاں منی
گپانی توک کمی گیشی یے بوتگ من ءَ پہ ھق ءُ دل پہل بکنت تی منت وار باں . ءُ دومی من منت وار آں وتی کستریں استاد سر ءُ سوج کنوک بانک سنگین ءِ کہ آئی ءِ کڈّن کنگ ءَ من اے نبشتاک نشتہ کُتگ . من گُشت من کجا ءُ نشتہ کجا ؟ گُشت تو جھد بہ کن بے مزّ نہ بئے . پیرک ءِ اکس ءَ دیم ایر کن تو وت بنشتہ کنے . بلے من بے اکسءَ وتی کورین جُھدے کُت۔
