پاکستان کے صوبہ خیبرپختونخوا کے شہر لکی مروت میں گذشتہ رات پولیس تھانے پر حملے اور اس کے بعد پولیس کی گاڑی پر ہونے والے آئی ای ڈی دھماکے میں ڈی ایس پی لکی مروت سمیت 4 پولیس اہلکار ہلاک اور پانچ زخمی ہو گئے ہیں۔
تحریکِ طالبان پاکستان کی جانب سے جاری اعلامیے میں اس حملے کی ذمہ داری قبول کی گئی ہے۔
پولیس کے مطابق حملہ آوروں کی جانب سے پہلے بھاری ہتھیاروں کے ساتھ گذشتہ رات ایک بجے تھانہ صدر پر حملہ کیا گیا جس میں پانچ پولیس اہلکار زخمی ہوئے۔ اس کے بعد واقعے کی اطلاع ملنے پر ڈی ایس پی لکی مروت اقبال مومند پولیس نفری کے ساتھ تھانہ صدر روانہ ہوئے تو راستے میں روڈ پر آئی ای ڈی دھماکے میں چار پولیس اہلکار ہلاک اور ڈرائیور زخمی ہو گیا۔
ہلاک ہونے والے پولیس اہلکاروں میں ڈی ایس پی لکی اقبال مومند، کانسٹیبل وقار، کانسٹیبل علی مرجان اور کانسٹیبل کرامت اللہ شامل ہیں۔
