بلوچستان ءُ بلوچ ءِ زِندمان | جنگی ورنا

0
127

اے بلوچستان اِنت، جی ھو اے ھما بلوچستان اِنت کہ اے ھند ءِ مردُم بے میار ءَ کُشگ بنت یا کہ گار ءُ بیگواہ کنگ بنت۔ اے ھمے بلوچستان اِنت کہ ھر روچ بلوچانی ھون چو کَور ءِ آپ ءَ تاچینگ بُوَگ ءَ اَنت، اَرس ءُ ھون ءِ ھار اِنت، ھر گْور ءَ کُوکار ءُ زار اِنت، کسے پہ زھگ ءَ، کسے پہ پِس ءُ کسے پہ براس ءَ ودارِیگ اِنت، اے کِسّہ یک ءُ دو مردُم ءِ کِسّو نہ اِنت۔۔۔۔۔۔۔نا کہ یک ءُ دو سالیگ اِنت، اے کِسّہ ھزارانی کچّ ءُ کِساس ءِ مردُمانی اِنت، ءُ اے کِسّہ ءَ بیست سال ءَ گیش بیت کم نہ بیت کہ ھرروچ ودّان ءُ گیش بُوَگ ءَ اِنت۔۔۔۔۔۔۔

اے یک انچیں آسشانیں دردے دانکہ مردُم زندگ اِنت ءُ ھرروچ آئی ٹپُ نوک بنت، بلے اے مردُمانی دردوار کس نیست۔ ھرکس بس ھمُک مردُمانی ھمے ٹپّاں کُدین اَنت ءُ آیانی درداں گیش کنگ ءَ اَنت، تھنا ھما مردُم اے ٹپّانی درداں مارِ اِت کنت کہ آ وت ھمے جاوراں گْوزگ ءَ اِنت۔ اے جھان ءَ کس دومی ءِ درداں گوں ھوار نہ بیت،

انچو گْوش اَنت کہ دوست ھما اِنت گم ءُ سکّیاں گوں تو وت ءَ ھوار بہ کنت، وشیاں چوناھا ءَ ھر کس وت ءَ ھوار کنت، بلئلے لھتیں انچیں گَم ءُ درد بنت کہ مردُم آیاں وتی دل ءِ تہ ءَ جاہ دنت ءُ وت ءَ گوں پُر مھریں بچکنداں پدّر کنت، بلے پُر مھریں پچکندانی پُشت ءَ انچیں درد بنت کہ آ درداں کس مارِ اِت نہ کنت، بلے لھتیں درد ءُ رنج ھست اِنت کہ آیاں کُلیں جھان گِند اِیت آئی ءِ درداں، بلئے جھان وت ءَ پھک ءَ کَرّ ءُ کور کنت۔

اے ھما بلوچستان اِنت کہ اِد ءَ بلوچ زالبُول دگّانی سر ءَ آزار دیگ بنت ءُ آیانی سر ءَ تیرگواری کنگ بیت، آوانی سریگ پُلَگ ءُ کودکّیں زھگ جَنَگ ءُ ٹپّی کنگ بنت۔ نودربر چہ زانشجاھاں جَنَگ بنت، بلوچ ءِ دود لگتمال کنگ بیت، بلے پھک بے توار اَنت۔۔۔۔۔۔۔۔۔چی ءَ کہ اے بلوچستان اِنت، اِد ءَ بلوچ ءَ بہ کُش بہ رو کس جست نہ کنت، بلے ھما کہ بے میار اِنت آ گِرگ ءُ جَنَگ بیت۔

ھمے بیگواھیں مردُمانی لڑ ءَ یکّے ماھل بلوچ شھید ندیم بلوچ ءِ لوگبانک پاکستانی لشکر ءَ چہ شال ءَ آئی گِس ءَ آئرا گوں آئی دوئیں زھگاں ھوار پنچ مردُماں آوار جنت بارت پد ءَ ماھل ءِ کسانیں زھگ نازینک ءُ نگرہ ءَ ھوار آ دِگہ چاریں مردُماں پاکستانی لشکر سرجمیں شپ آزار دیگ ءَ پد دومی روچ ءِ سُھب ءَ یل کنت ءُ ماھل ءَ بیگواہ کنت، پاکستانی لشکر ءِ بلوچ جنینانی بیگواہ کنگ ءُ دُروگیں بُھتام ءَ چہ پدّر بیت کہ پاکستانی لشکر ءَ چہ اے جنگ ءَ پُروش وارتگ، اے تھنا ماھل نہ اِنت بلکیں ایشی ءَ پیش ھم بلوچستان ءِ جتاھیں ھنداں پاکستانی لشکر ءَ بلوچ جنیں آوار جَنَگ ءَ پد بیگواہ کُرتگ ءُ آزار دیگ ءَ پد یل کُرتگ اَنت۔

اے آجوئی ءِ جنگ ءِ پِڑ ءَ ورناھانی دیمونیاں ھوار بلوچ جنینانی ھم دیمونی ھست اَنت کہ آ وتی راج ءِ ورناھانی آجوئی ءَ مُدام گوں وتی راج ءَ ھمکوپگ بوتگ اَنت ءُ آوانی کُمک کُرتگ اِش، انچو کہ پہ بیگواھیں مردُمانی آجوئی ءَ ماھل مُدام بیگواھیں مردُمانی کھولانی گماں ھوار بوتگ ءُ مرچی ماھل ءِ آجوئی ءَ پہ کُل بیگواھیں مردُمانی کھول ھوار ءُ زھرشانی کنگ ءَ اَنت۔

مارا کُلّاں یک بُوَگ ءُ پہ بیگواھیں ماھل ءَ ھوار کُل بندیانی آجوئی ءَ توار چست کنگی اِنت، داں ما کُل یک نہ بَہ اِیں گُڑا ھرروچ اے لگوریں دُژمِن چو ماھل ءِ رنگ ءَ مئے بلوچ زالبُولانی کمشرپی ءَ کنت آواں بیگواہ ءُ شھید کنت، دُژمِنیں لشکر ھمینچو چم جھل ءُ کمشرپ بوتگ کہ بلوچ زالبُولانی کمشرپی ءَ کنگ ءَ اِنت ءُ آواں وتی زِندان ءَ بَرّگ ءُ آزار دیگ ءَ اِنت آوانی سر ءَ دُروگیں وتکش اُرشکاری ءِ بُھتام جنگ ءَ اِنت۔

مارا کُلّاں یکمُشت بُوَگ ءِ زُلم ءِ بگیری ءَ چو مُھریں کوہ ءِ وڑ ءَ مُھر بُوَگ لوٹ اِیت ءُ وتی راج، مات ءُ گْوھار چہ رستریں لشکر ءَ رکّینگی اَنت، اگاں مارا جھان ءَ وتی پجّار دارگی اِنت گُڑا دُرستاں پیش مارا وتی دود ءُ وتی زُبان دارگی اِنت، وتی راج چہ گُلامی ءِ زند ءَ آجو کنگی اِنت، ما ھما وھد ءَ آجو بَہ ایں کہ زُوراک ءِ زلم ءِ زُورانسری ءِ بگیری ءَ یکمُشت بہ بہ اِیں۔۔۔۔۔۔۔، اگاں نا ناتِپاکی مارا چہ اندر ءَ چو رمیز ءِ وڑ ءَ وارت ءُ ما سھیگ نہ بَہ اِیں۔۔۔۔۔

***

LEAVE A REPLY

Please enter your comment!
Please enter your name here