بلوچ راجی جُھد ء آجوئی ءِ جُنز گوں وتی تْرندیں گاماں دیم پہ وتی مِنزل ءِ نیمگ ءَ جُنزان ءُ اَچ ما مئے نُگرھیں سنگتاں سِندان، ءُ اے راستے کہ جُھد ء آجوئی ابید ء کُربانی ءَ وتی بامساریں بُنجل ءَ سر نہ بیت۔۔۔۔پمشکا مارا اے کُربانیانی درچ برجاہ دارگی اِنت دانکہ مئے آیوکیں پدریچ وتی جِند ءِ گُلزمین ءِ سر ءَ آجو ءُ اِیمن بِہ بیت۔
ھمے رنگ ءَ اگاں ما آجوئی ءِ جُھدانی راجدپتر ءَ بِہ وان اِیں ءُ بچار اِیں گُڑا مارا اے ھبر گِندگ ءَ کَیت کہ راجی جُھد ءُ جنگانی تہ ءَ پہ آجوئی ءِ دزگِرگ ءَ ھزاراں جُھدکار ءُ جنگول شھید بوتگ ءُ ھزاراں زِندانی۔۔۔۔۔۔۔، ھمے پیم مئے جُھد ء آجوئی ءِ دْروشم اِنت کہ مئے بازیں سنگت پہ آجوئی ءِ دزگِرگ ءَ شھید ءُ ھزارانی کِساس ءَ گار ءُ بیگواہ ءُ ماں ریاست پاکستان ءِ تھاریں زِندان ءَ بندیگ ءُ وڑ وڑیں زُلم ءُ زُوراکیانی دیمپان، لٹّ ءُ کُٹّ سگگ ءَ اَنت، بلے اے کاروان اُوشت آماچی ءِ بدل ءَ دیم ءَ روان اِنت۔۔۔۔۔۔۔۔۔
اگاں ما وتی اے کسانیں پند ءُ جُھد ء آجوئی ءِ سر ءَ چمشانکے دئیں، گُڑا ھمے جُھد ء آجوئی ءِ تہ ءَ لھتیں انچیں سر ءُ سنگت شھید بوتگ کہ آیانی جاہ داں مرچی ھالیگ منتگ ءُ پُر کنگ نہ بیت۔۔۔۔۔۔
پہ دَروَر بلوچ نیشنل موومنٹ ءِ بُنھِشت اِیر کنوک ءُ بلوچ راجی جُنز ءِ سرکیلیں رھشُون واجہ گُلام مھمد، بلوچ جُھد ءَ را سیاسی دْروشم ءَ روانے ءِ دیوک ءُ نامداریں رھشُون واجہ ڈاکٹر منّان بلوچ، گھگیری ءِ پِڑ ءَ ناماوریں جنگول ڈاکٹر کالِد، جنگ ءِ میدان ءَ تیر وارتگیں شیھک جان کہ وتی تیر وارتگیں بالاد ءَ نہ چار اِیت ءُ بلوچ راج ءِ نام ءَ کلوہ ءَ تامُر ءِ دْروشم ءَ پہ جوانمردی ریکارڈ کنت۔۔۔۔۔۔۔
ءُ ھمے داب ءَ دُژمِن ءِ سر ءَ نپت گْوارکیں پیرک جان کہ گُڈّی ءَ وتی کلوہ ءَ راج ءِ نام ءَ دنت ءُ گْوش اِیت کہ ما ھمیشیں سنگر گِپتگ ءُ گوں دُژمِن ءَ جنگ کنگ ءَ اِیں، اے زانگ نہ بیت کہ ما کلاکے ءَ رند یا ساری پہ ڈیھ ءِ پانپاہی ءَ کولیگ بَہ اِیں، بلے اے جُھد نوں شُمے کُوپگان ءُ ھما جاہ ءَ سرے بِہ کن اِت کہ ھمود ءَ مئے رپتگیں سرانی واب مانا بَہ اَنت۔۔۔۔۔۔۔
ءُ انوگیں وھد ءَ کوہ گردیں مُلّا بھرام جان کہ آ وتی جنگولی ءِ کِسّھاں گوں بلوچ راج ءِ اندر ءَ نامدار اِنت، چی ءَ کہ مکران ءَ چہ دُژمِن وھدے آسیگ بوتگ گُڑا مُلّا بھرام ءِ جنگانی داستان ھِچّ رنگ ءَ شموشگ ءُ بے ھیال کنگ نہ بَہ اَنت، ءُ دُژمِن مرچی مُلّا بھرام جان ءِ نام ءِ سر ءَ بش بش وارت۔۔۔۔۔۔۔۔
چوش کہ مرچیگیں منی نبشتانک ءِ بُنگپّ پہ ڈیھ ءِ پاسپانی ءَ ندْر بوتگیں کوہ گرد ءُ راجی جنگول مُلّا بھرام جان اِنت، پمشکا من اے گپّ ءَ ھمے نبشتانک ءِ تہ ءَ نبشتہ کنگ لوٹ آں کہ من آئرا اولی رند ءَ چون ءُ کُجا ڈیک داتگ۔
منی ءُ مُلّا بھرام جان ءِ اولی گِند ءُ گِدار دو ھزار چاردہ (2014) ءَ گوں اُستاد ھیبتان ءِ ھمراھی ءَ بالگتر ءَ بوتگ، من دیست کہ اے سنگت ملنگیں اِنسانے ءُ ھر ساھت ءُ دمان ءَ وتی پارٹی ءِ کار ءُ سنگتانی بارو ءَ جیڑگ ءَ اِنت۔۔۔۔۔۔
پدا ھرکس وتی پارٹی ءِ کار ءُ زمہ واریانی پورا کنگ ءَ درکپت ءُ دیمے شُت، بلے وھد وھد ءِ سر ءَ مُلّا بھرام ءُ آ دِگہ سنگتاں گوں ڈیک داتگ ءُ پون ءِ سر ءَ ھم ھال اھوال برجاہ بوتگ۔
وھدے دو ھزاز شانزدہ (2016) ءَ پارٹی ءِ نیمگ ءَ مکران ءَ منی تر ءُ تاب بَہ اَنت، من کہ مکران ءِ ھند ءُ دمگاں رواں گُڑا اُود ءَ گوں مُلّا بھرام ءَ مزنیں وھدے ھواری ءَ گْوازینت۔ مُلّا یک ملنگ تبیں اِنسان ءُ راجی جُنز ءِ اندر ءَ کاملیں جنگولے اَت، پمشکا مرچی من مُلّا بھرام جان ءِ درگت ءَ کہ نبشتہ بِہ کن آں کم اِنت، چی ءَ کہ آئی ءِ سِپت ءَ آئی داتگیں دیمونی وت کنت کہ آ کَے بوتگ، بلے من یک چیزے مُدام دیستگ کہ مُلّا ءَ را کِتابے دست ءَ، اگاں گوں موبائل ءَ گُلائیش اِنت بزاں کہ کِتابے وانگ ءَ اِنت۔۔۔۔۔۔
یکروچے بیگاہ ءِ ساھت ءَ ما سارتیں ساھگے ءَ نِندوک اِت اِیں ءُ چہ مُلّا ءَ جُست کُت کہ مُلّا جان تئی موبائل ءَ چونیں چونیں کِتاب مان کہ تو وان ئے ءُ مارا سرپدی نہ دئے۔۔۔۔۔۔۔
مُلّا جان ءَ کند اِت ءُ درّائینت کہ چیف تو کُجام کِتاب ءَ لوٹ ئے، منی کِرّا ءَ بازیں کِتابے ھست پہ وانگ ءَ، من ھم پہ کندگ گْوشت گُڑا مُلّا جان تو یک ءُ دو کِتاب ءِ نام ءَ بِہ گِر باریں۔۔۔۔۔۔۔
مُلّا ءَ پدا کند اِت ءُ گْوشت منی گْور ءَ بلوچی کلاسیکل شاھِری ءِ کِتاب، اھدی داستان، واجہ پکیر شاد ءِ کِتاب میراس (میراث)، مُلّا پازُل ءِ کِتاب، تو کُجامی لوٹے ءُ وان ئے۔۔۔۔۔۔۔۔۔۔گُڑا من مُلّا جان ءِ پسّو دات ءُ گْوشت پمّن مُلّا جان واجہ پکیر شاد ءِ کِتاب میراس (میراث) ءَ روان دئے کہ کم کم ءَ وانانے۔۔۔۔۔۔
ءُ ھمے وڑ ءَ مُلّا جان مُدام مُلّا کمالان ءِ شیئراں گوشدارگ ءَ اَت، چرئے گپّ ءَ مردُم پھم اِت کنت کہ مُلّا ءِ باتِن ءَ راجدوستی ءِ لیکہ جمبور ءُ پہ وتی ایردستیں راج ءَ آسیں دردے ءِ ھُدابُند بوتگ۔۔۔۔۔۔
اگاں مرچی من وتی اے نبشتانک ءِ اندر ءَ ھمے نبشتہ بِہ کن آں کہ مُلّا یک مزنیں جنگ زانتے بوتگ گُڑا رد نہ بَہ آں، چی ءَ کہ آ مُدام سنگتاناں چیرجنگی ءِ بارو ءَ سرپدی دَیَگ ءَ اَت ءُ آیانی رھشُونی ءَ کنگ ءَ اَت، پمشکا من گْوش آں کہ مُلّا ءِ اندر ءَ رھشُونی ءِ بودناکی ساڑی اَت ءُ کاملیں جنگولے اَت۔
چرئے تر ءُ تاب ءَ پد من دیم دات پہ وتی ھند ءُ دمگ ءَ، بلے لھتیں ماھانی مْیان ءَ من واتر پہ پارٹی ءِ کارانی ھاتِر ءَ زامُران ءَ اتک آں۔ پدا دومی رند ءَ منی گِند ءُ گِدار گوں مُلّا بھرام جان ءَ دو ھزار ھبدہ (2017) ءَ زامُران ءَ بوت۔ گُڑا ھمد ءَ مُلّا بھرام ءِ ھمراھی ءَ یک کسانسالیں گْونڈلے گون اَت کہ مُلّا بھرام جان ءَ گْوشت کہ منی گْوھار زتک اِنت ءُ نامے اِیسّا ( شھید ھزّا ) اِنت، من ھمد ءَ مُلّا بھرام ءَ گْوشت کہ تو اے گْونڈل ءَ وانگ ءَ راہ بِہ دئے۔۔۔۔۔۔۔۔۔
مُلّا بھرام ءَ منی پسّو نہ داتگ اَت کہ ھمے گْونڈل ءَ پسّو دات ءُ گْوشت من وانگ ءَ نہ رواں۔۔۔۔، بلکیں من پہ ماتیں گُلزمین ءُ گُلامیں راج ءَ سرمچارے بَہ آں ءُ جنگ کن آن، پہ بلوچ راج ءُ بلوچستان ءِ آجوئی ءَ جنگ کن آں، اے پاکستان ءِ وانگجاھاں مارا اے زانت نہ رس اِیت کہ جُھد ء آجوئی ءِ تہ ءَ رس اِیت، اے جنگ ءَ مارا اِنچو زانت ءُ اِلم داتگ کہ ما وت ءَ بِہ زان اِیں، پمشکا من پاکستان ءِ وانگجاھاں پہ وانگ ءَ نہ رواں ءُ آجوئی ءِ ھاتِر ءَ جنگ کن آں۔۔۔۔۔
مرچی ھمے کسانسالیں ورناہ اِیسّا جان (شھید ھزّا) گوں راجی جنگول مُلّا بھرام ءِ ھواری ءَ پہ ماتیں گُلزمین ءِ موکگ ءَ، پہ بلوچ راج ءِ وشیں باندات ءَ وتی سر ندْر کُرت، پمشکا من دِلجماں کہ کوہ گردیں مُلّا بھرام ءِ دِگہ بازیں جنگی شاگرد ھستاں ءُ دائم ءَ زندگ باتاں۔۔۔۔۔۔۔انچو کہ مُلّا ءَ دُژمِن ءِ چمّانی واب ھرام کُتگ اَت۔۔۔۔۔۔۔۔۔۔ھمے رنگ مُلّا ءِ پتّر ءَ جنگی درونت زُرتگیں ورناہ ھم دُژمِن ءَ بے آرام کن اَنت دانکہ آجوئی ءِ بام دنت ءُ اِیمنی ءِ مِستاگ ڈیھ ءِ ھرگور ءَ شِنگ اِیت۔۔۔۔۔۔۔۔۔۔۔۔۔
***
