سر مڑاھداریں پہ مڑاہ رپت اَنت
رُژن ءِ استال چہ آزمان سست اَنت
چہ گُرابان ءُ جَنگی بالگرداں
گْورتگ تیراں چو موسمی ھَوراں
چہ دل ءِ ھوناں ھار کُتگ کَوراں
کرنی تاھاپاں آتک بھارگاھے
کوردپ ءُ تلّاں ھون شلاں بیت اَنت
مُرتگیں پِیتاراں جتگ ناڑے
بَون ءُ گورکاہ سبز اِت اَنت دابے
جنّت ءَ گپت اِش پہ وت ءَ جاھے
چہ گُلامی ءَ زند اِش آجو کُت
گیدی ءِ دلبند ءِ سر ءَ واب اَنت
مکّھیں مات ءِ پاسبان میریں
تنگویں بچ راج ءِ شھمیریں
جنگی سنگر داشتگ اَنت شیراں
تاں وتی زند ءِ گُڈ سری ساہ ءَ
راجپھازاں ماں جنگ ءِ پاسگاہ ءَ
مرگ اِش امباز کُت پہ گل ءُ شاتے
سُھریں آشوب ءَ زندے بکشات اِش
شِیر پَھِل کُرتگ مکّھیں مات ءِ
نام کُتگ زندگ مئے شھیدانی
ھانی ءِ ابدالیں مریدانی
پھر بند اَنت تئی گیدی ءِ ورنا
گوں زیمراں مھگونگ بہ نازین اَنت
موتک ءُ الھاناں اے جگر بُرّیں
سوت ءُ نازینکاں کاڑ کُمار چمّیں
شَیراز پُرسیگ ءُ دْڑامب ارسیگ اِنت
ساھیجی، شاہ گَر، بانسر بژنیگ اِنت
کَلّگ ءُ چَرپان گَورگی نال اِیت
کَلگ کَور، بے پات باگیں ننگارُو
گیر کار اِیت تئی ھَلمواں شیری
گپّ ءُ دیوان ءُ لھمیں بچکندگ
پمّنی چمّاں تو مدام زندگ
تْرانگ ءُ تھتالاں جگر سوچیں
چہ گم ءُ درداں دل گْوش ئے موچ اِنت
جنّت ءِ باگے تئی نسیب ءَ بات
سرمچاراں گوں گپّ ءُ دیوان بات
سْیاھُک تئی نام دائم ءَ مان اِیت
ماہ ءُ استال داں آزمان مان اِیت
