ھست اَت بادشاھے | میجر مجید

ایڈمن
ایڈمن
4 Min Read

کتاب ءِ نام ۔۔۔۔ ھست اَت بادشاھے
شوھازکار۔۔۔۔۔۔۔ فقیر شاد

پرچا سر جن ئے اِد ءَ اود ءَ ھمبل
راز دْراھیں پھمیان اَنت کتابانی تہ ءَ
سئید ساھل

فقیر شاد ءِ قصھانی نوکیں کتاب "ھست اَت بادشاھے” منی دیم ءَ اِنت۔ واجہ ءِ باز منّتواراں کہ آئی ءَ یک تاکے پمّن سوگات کُتگ کہ پمّن بے کیمتیں نِبرھے۔ فقیر شاد ءِ لبزانکی پٹ ءُ پول منی توسیپ ءُ ستا ءِ مُھتاج نہ اِنت۔ بلے ھر کس کہ شرّیں ءُ جْوانیں جھدے پہ بلوچ ءِ لبزانک ءَ بہ کنت۔ توسیپ کرز اِیت ءُ توسیپ ءِ ھکدار اِنت۔ فقیر شاد ءَ ھما گاریں لال ءُ مُروارِد شوھاز کُتگ ءُ راج ءِ دیم ءَ پیش کُتگ اَنت۔ آ کْوھنیں گیدی شائری بہ بیت، مھر ءُ دوستی ءِ نمیرانیں کارِست بہ بنت۔ فقیر شاد ءَ پہ وَزمے پول اِتگ اَنت۔

فقیر شاد ءِ کتاب "میراث” بلوچی لبزانک ءِ بے دروریں مڈّی یے۔ اے کتاب مدام ابدمان اِنت۔ آئی ءَ وتی لبزانک ءِ تمردیں کُمَیت پہ وزمے تاتکگ۔ بلے مرچی منی سرھال فقیر شاد ءِ نوکیں کتاب "ھست اَت بادشاھے”( کہ بے دروریں گیدی قصھاں چکار اِنت) ءِ سر ءَ اِنت۔

قصہ مئے لبزانک ءِ مزنیں بھرے۔ ھمے وڑ ءَ کہ شائری، آزمانک. کسمانک، رجانک ءُ اے دگہ تھر اَنت۔ ھمیشانی وڑ ءَ لبزانک ءِ یک تھرے۔ مئے دودمان ءَ یا چاگرد ءَ اھدی زمانگاں ھمے گیدی قصھاں لُنجیں زمستانی شپ روچ کُتگ اَنت۔ وھدے کہ شپاں سُندگْواپی یا تگردگْواپی بیتگ یا پاتگْواپی بیتگ۔ یا بیمارانی سر ءَ پانگی بیتگ۔ کجام ھم راجی جیڑھے بیتگ گُڑا اود ءَ قصہ گْوشوکاں قصہ گْوشتگ۔ اے دگہ مردماں وتی کار کُتگ۔ بلوچ ءِ دودمان ءَ قصھانی بلاھیں ارزشتے۔ انچیں قصہ ھست اَنت کہ مردماں وتی قصھاں چہ سان زرتگ وتی زند ءِ گْوازینگ ءِ بھر جوڑ کُتگ۔

اے وڑیں قصھاں چنگ ءُ نزّارگ بلاھیں دلسیاھی، مزنیں کارے۔ بلے قصھانی اندر ءَ انسان ءِ زند ءِ راز ھم چیر اِنت۔ گیشتریں قصھانی آسر گوں جْوانیں آسرے ءَ در کپ اِیت۔ چوناھا قصہ سپر ھم کنت۔ بازیں دری راجانی قصہ مئے قصھاں گوں ھمدپی کن اَنت۔ چوش کہ یونانی بازیں کہ گْوش ئے ھمے گیدی قصھانی رنگ ءَ اَنت۔ پولکارانی گیشتریں بھر گْوش اِیت کہ قصہ سپر کنت۔ مئے بازیں قصہ چوش کہ جِن، بلاہ ءُ گلمتانی قصہ چو یونانی قصھانی وڑ ءَ ھمدپ اَنت۔

وھدی زمانگاں قصہ وھد تیلی ءِ مستریں سببے بیتگ۔ زمستانی شپاں وھدے کہ ما آس ءِ سر ءَ نشتگیں گُڑا بلّکاں قصہ جتگ۔ ما گوش داشتگ ءُ مزا زُرتگ۔ برے برے قصھانی سر ءَ مکابلہ ھم بیتگ۔ یک بلّکے ءَ قصھے گْوشتگ۔ پد ءَ دگہ بلّکے ءَ قصھے گْوشتگ۔ ھمے مکابلہ ءِ میان ءَ زمستانی لُنجیں شپ روچ بیتگ اَنت بلے مردماں وھد ءِ سما نہ بیتگ کہ شپ چوں شُت۔ وھدے کہ بلوچ گیدی قصہ بُنگیج بیت۔ مردم گیروشگ بیت ءُ ودار کنت کہ اسل کارست کدی دیم ءَ کَیت۔ ھمے وڑ ءَ قصہ روان کنت ودار ودّان کنت۔ داں کہ قصہ آسر بیت۔ بلے چہ آسری ءَ پیش تو سرپد بہ ئے کہ قصہ ءِ اسل کارست کے اِنت۔

گُڈ سر ءَ من گْوشاں کہ فقیر شاد ءِ اے قصھانی کتاب وانگ کرز اِیت۔ جوانیں کتابے۔ بلوچی قصھانی گال گنج ءَ یک بلاھیں گیشی یے

بلوچی سبز ءُ مَیزران بات

بلوچستان آجو بات

***

Share This Article