بلوچ گْوش اَنت،
“مِید، دنتان، جَن کچیمبَکّیں
ھَر سئینانی آسرے لُکّیں”
مرچی بلوچستان ءَ سیاسی کچیمبَک باز اِنت۔ اردو والا ایشاں “لوٹا” گْوش اَنت۔ بلے زگریں بلوچی ءَ ایشاں سیاسی کچیمبَک گْوش اَنت۔ سیاسی کچیمبَک ھر دَور ءَ بیتگ۔ بلے ناں کہ چو مرچیگیں داب ءَ۔ مرچاں سیاسی کچیمبَک چو مور ءَ باز اِنت۔ وھداں کسے ءَ کہ وتی پارٹی یلہ کُتگ ءُ پہ زرّ ءُ مال ءُ پہ جماداری ءِ ھاتر ءَ دگہ پارٹی یے ءَ شُتگ۔ گُڑا داں سک دیر ءَ مھلوک ءَ ھما سیاسی رھشون ڈوبار اِتگ ءُ شگان ءُ پگان کُتگ۔ مرچاں سیاست سوداگری ءُ کاروبارے جوڑ بیتگ۔ اھدی مردمانی زبان، زبانے بیتگ۔ مُسام، مُسامے (قول) بیتگ۔ رھبند، رھبندے بیتگ۔ آیانی پگر گوں مھلوک ءِ پگر ءَ بندوک بیتگ۔ مُلآ پازل گْوش اِیت کہ
“من وتی جان ءَ پہ نمک پوشاں
سِی نہ مان اَنت ءُ ماں سے ءَ اوشتاں
پچ نہ گرداں چہ وادہ ء دوستاں”
اے سیاسی کچیمبکاں ھمے یکّیں سال ءَ چنچو پارٹی مٹ کُتگ۔ وھدے کہ مردم ءَ سیاسی لیکہ مہ بیت گُڑا ھمے وڑ ءَ پیشی ھپت لوگی بیت۔ کج ءَ ھڈّے کہ گیشین ئِے بہ رس اِیت ھما لوگ ءَ پانیگ بیت۔ بلے دیر ءَ وت ءَ داشت نہ کنت پرچا کہ کچک ھڈّ پٹّ اِیت ھر جاہ کہ ھڈ گیشتر رس اِیت ھمود ءَ میلانک بیت ءُ مِنڈی مِنڈی ءَ ھڈ چُنڈ اِیت ءُ وتی اسلی مالک ءِ سر ءَ راش اِیت۔
اے کسی نہ اَنت۔ اے کسی دوست نہ اَنت۔ اے کسی ھمدرد نہ اَنت۔ اے زرّ ءُ جماداری ءِ گُلام اَنت۔ ھر جاہ کہ زرّ بیت جماداری بیت نوکری بیت اے ھمود ءَ رُمب کن اَنت۔ مرچی بلوچ راج وانندہ ءُ زانتکار اِنت۔ پیشی ھپت لوگیاں شرّی سر ءَ زانت۔ آ زانت کہ سیاسی مردم کجام اَنت ءُ سیاسی کچیمبک کجام اَنت. ءُ مرچی وھد ھم ھمیش اِنت کہ بلوچ وتی دوست ءُ دژمن ءَ بہ زانت۔ راست ءُ دروگ ءِ میان ءِ تپاوت ءَ بہ زانت۔ انساپ، ھک، زلم ءُ زور ءِ تپاوت ءَ بہ زانت۔ من زاناں راج ءَ اے سیاسی کچیمبک اوٹ نہ داتگ اَنت گچین نہ کُتگ اَنت۔ ایشانی گچین کنوک پاکستانی پرشتہ اَنت۔ پرچا کہ اے پاکستان ءِ لاڈُکیں مھلوک اَنت۔ بلے من گوں راج ءَ گُڈ سر ءَ ھمے دزبندی ءَ کناں کہ چہ اے سیاسی کچیمبکاں وت ءَ دیر بہ دار اَنت۔ ایشانی نُھ ٹوپیں دْروگاں گوش مہ دار اَنت۔ آؤکیں پدریچ چہ مارا ءُ شُمارا جُست کنت کہ اے سیاسی کچیمبک شُما مئے سر ءَ پرچا مُشتگ اَنت۔ من ایشانی بارہ ءَ باز نبشتہ نہ کناں پرچا کہ اے نبشتانک ھم نہ کرز اَنت ءُ راج ایشانی بابت ءَ شرّی ءَ پوہ ءُ سرپد اِنت۔ من بس راج ءَ کمّو شیوار کنگ لوٹاں کہ اے سیاسی کچیمبکانی رندگیری ءَ مہ کن اِت ءُ وت ءَ پولنگ مہ کن اِت۔ سید گْوش اِیت
کَے چہ بیرانی ءَ بہ پھریز اِیت
رستریں پاسپان نگھبان اِنت
تپاکی آجوئی ءِ مانزمان اِنت
بلوچستان آجو بات
***
