یکّے تْرہ اِیت ماں لندن ءَ
یکّے تچ اِیت واشنگٹن ءَ
یکّے پرانس ءَ موج کنت
گار اِنت سکندر گوں جن ءَ
(بشیر بیدار)
بادشاہ ھداوند وت اِنت۔ اے گیدی کسھے کہ من چہ جان مھمد دشتی ءِ کتاب ءَ زُرتگ۔ کسہ چوش اے وڑ اِنت۔
گْوش اَنت کہ ھست اَت مردے۔ اے مرد ساربانے اَت۔ اے مرد ءَ ساربانی کُت ءُ وتی زھگ والینت اَنت۔ مرد ءَ ھست اَت شرّیں ھُشترے۔ لڈّ ءُ بوج ءُ سواری ئِے ھمے ھُشتر اَت۔ وھداں بلوچے ءَ اگاں ھُشترے یا جُتکے گوک یا بیست دانگ پس لوگ ءِ دپ ءَ بیتگ۔ ھمے ریندواں گوں مردماں وتی وھد تیلانک داتگ۔ گُڑا ساربان ءَ ھمے ھُشتر سک دوست اَت۔ سکّیں شرّیں ھُشترے اَت۔ چیزے وھداں پد ھُشتر سک پِیر ءُ ڈگّر بوت۔ مرد ءِ دل ءَ گْوشت کہ نی ھشتر پیر اِنت۔ بار کشّگ ءُ سواری ءِ کَٹّ ءَ چہ گْوستگ۔ ھُشتر ءَ کُشاں۔ پد ءَ دل ءَ ھیال ئِے کُت کہ دست ء وت اے ھُشتر ءَ چوں بہ کُشاں کہ منی سکّیں کْوھنیں ھمراھے بیتگ۔ پد ءَ مرد ءَ دل ءَ ھیال کُت بھا ئِے کناں۔ بلے پد ءَ جیڑ اِت ئِے کہ اگاں بھا ئِے بہ کناں۔ ھما مرد کہ ھُشتر ءَ زیر اِیت۔ آ مرد ھُشتر ءَ ساٹ اِیت یا ناں۔ لٹّ ءُ کُٹّ ئِے کنت یا ناں۔ گرانیں بار ئِے لڈّ اِیت یا ناں۔ ھمے ھیالاں گوں گُڈ سر ءَ ھمے سوڑگ ئِے کہ کُت کہ بران ئِے کھچرے ءَ یلہ ئِے دیاں مر اِیت زندگ بیت ھرچے بیت بلّے ھمانگو بیت۔ بلے اے ھُشتر ءَ پہ واری ءُ بزّگی منی دل سگّ اِت نہ کنت۔
مرد ءَ ھُشتر مھار ءَ کُت دیم پہ جنگل ءَ شُت۔ وھدے کہ کھچر ءَ سر بوت۔ ھُشتر ءِ سرمھار ئِے کشّ اِت۔ یلہ ئِے کُت ءُ گْوشت ئِے۔
"ھُشتر! سک دیر اِنت تو منی ھمراہ بیتگ ئے۔ چہ مرچیگ ءَ مئیگ ءُ تئی راہ جتا اَنت۔ من چہ تو رازیگاں۔ بلے وتی ھکّاں من ءَ پھل کن۔ کہ من برے برے گْرانیں بار ھم ترا لڈّ اِتگ۔ برے برے ترا لٹّ ءُ کُٹ ھم کُتگ۔ برے برے ترا شرّیں کاہ ءُ کدیم ھم سیر ءَ نہ رس اِتگ۔”
ھُشتر ءَ پسّو دات
"منی کُلّیں ھک ترا پھلّ اَنت بلے یک ھکّے ترا پَھِل نہ اِنت۔”
مرد سک ابکّہ بوت ءُ جُست ئِے کُت
"آ کجام ھکّ اِنت کہ تو من ءَ پَھِل کُت ئِے نہ کن ئے؟”
ھُشتر ءَ درّائینت
"تو یک روچے وتی ھر گَندل کُتگ۔ ھر ءَ سوار بیتگ ئے۔ ءُ منی مھار تو ھر ءِ پاردیماں بستگ۔ شُما پیسر بیتگ اِت ءُ من شُمئے رند ءَ تچان بیتگاں۔ اے ھکّ ءَ ترا پَھِل کُت نہ کناں۔”
سنگتاں!
مرچی بلوچ راج چو ھمے ھُشتر ءِ وڑ ءَ ھر ءِ رند ءَ تچان اِنت۔ اے بلاھیں زُلمے، بلاھیں ناروائی یے کہ مرچی بلوچ ءِ واگ ھما ھرگونگیں مھلوک ءِ دست ءَ اِنت۔ بکشو ءِ اسٹبلشمنٹ چہ اولی روچ ءَ بلوچ ءِ ھونی دژمن اِنت۔ بلے مرچی ھمے پارلیمانی رھشون، ھمے بھا زُرتیں دلّار، مُکبر، ھیرون بھا کنوک، دُزّ ءُ ڈُنگ، چانیگ پِنڈ ءُ بکشو ءِ دَزموش ھم بلوچ ءِ کُشگ ءَ ءُ بیگْواہ کنگ ءَ گون اسٹبلشمنٹ ءَ ھمکار اَنت۔ چوش نہ چار اِنت کہ ما بلوچیں۔ ھمے سرزمین ءِ واھُندیں۔ ما ھم بلوچ ءِ بچّیں۔ بلوچ دود ءُ ربیدگ ءِ پھازوکیں۔ بکشو باندا روت۔ انچوش کہ چہ بَنگال (بنگلادیش) ءَ ولگوج بوت۔ ھمے داب ءَ چہ بلوچستان ءَ ھم ولگْوج بیت ءُ رَوت۔ گُڑا تو شُما کن اِت؟ کج ءَ رو اِت؟ کئی نوان ءِ ساھگ ءَ نند اِت؟ شُما اگاں آجوئی جنز ءَ ھوار بیت نہ کن اِت مہ کن ِت۔ باکے نہ اِنت۔ بلے جُھد ءِ دیم ءَ میلانک مہ بہ اِت۔ وت ءَ بھا مہ کن اِت۔ شُما انسان اِت دلوتے نہ اِت کہ ھرچ روچ چو پس ءُ گوک ءِ داب ءَ بھا بہ اِت۔ انسان بھا نہ بیت۔ ھرچ نھادیگے ءَ شُمئے سودا ءُ بولی جنگ بیت۔
نیلسن منڈیلا گْوش اِیت کہ "پہ راجی جنز ءِ ھاتر ءَ تو زمین ءُ آزمان ءَ بھا مہ زیر بلے وت ءَ بھا مہ کن۔”
تئی ھرچ شَرّین ءُ سلّیں ھبر ءَ راجدپتر پول اِیت۔ چو کپودر ءِ داب ءَ چمّاں بند مہ کن کہ پیشّی من ءَ نہ گند اِیت۔ تئی ھرچ سِلّیں کار گوں سُھریں نَد ءَ نبشتہ بیگ ءَ اِنت۔ سید گْوش اِیت
بژن اِنت کہ وت بْرات ءِ نپس گیری ءَ منّ ئے
ارمان کہ ساہ اِت پہ درامد سر ءُ ساھار
یا کہ دگہ شائرے گْوش اِیت
اُٹھ قومِ بلوچ کی شان بنا
ہر مشکل کو آسان بنا
ہے تو بلوچستاں کی نظر
یہ نام خدا اُٹھ باندھ کمر
مرچی مئے بلوچ زالبول مات ءُ گْوھار ماں شھدگّانی سر ءَ پریس کلبانی دیم ءَ زھرشانیاں نشتگ اَنتءُ وتی بیگْواھیں براتانی ھاتر ءَ دژمن ءِ لگتانی چیر ءَ اَنت۔ ھَور، گوات، سردی ءُ گرمی نہ چار اَنت ءُ کُربانی دیگ ءَ اَنت۔ ھُدامُرزی ئیں مراد ساھر گْوش اِیت
شُد نہ روت پہ میر ءِ چانیگاں
بیا گَدائی ءِ کاسگ ءَ پْروشیں
زورگیر تئی جند ءَ، تئی زبان ءَ، تئی دود ءُ ربیدگاں گار ءُ بیگْواہ کنگ لوٹ اِیت۔ ھرچ زورگیر ءِ یکّیں پارمولہ ءُ پلسپہ اِنت۔ ھمے واست ءَ رھم الی مری گْوش اِیت۔
وروکانی سلاہ یکّ اِنت
چَڑوی ئیں پیشّی ءِ ٹَکّ اِنت
ھمُک ڈونڈ ءَ دپ اِش سَکّ اِنت
گریباں زلم ناھکّ اِنت
تپاکی آجوئی ءِ مانزمان اِنت
بلوچستان آجو بات
***
