ماسٹر ایسا انسان بالیچائی ءِ یات ءَ | میجر مجید

0
278

دنیا کَشے ھانُل کشے
شاھیم مَلّ اِیت انگت تُشے
امروز ءَ نیست درور گُل ءِ
ھوریگ جنت دْروشم گُش ئے
چہ دیدگاں ساہ دوست تر اِنت
ھانُل چہ ساہ دیم ءَ گُش ئے
ھر کس گُل ءَ دلمانگ اِنت
دل پنت دنت انسان کُش ئِے
(ایسا انسان)
بلوچ راجی جنز ءِ تہ ءَ بازیں سرھیل ءُ سرمچار گْوستگ اَنت کہ مروچی اے بے رھمیں دھر ءِ دنز ءُ مُج ءُ موریکاں اندیم کتگ اَنت۔ ماسٹر ایسا انسان بالیچائی چہ ھما بامرداں یکّے۔ واجہ ءَ مُدام رُژن ءِ چراگ بالینتگ۔ بلے مرچی واجہ کوراسی ءِ آماچ اِنت۔ اگاں ماسٹر جھد ءِ کاروان ءَ شمشُتگ۔ بلوچستان ءُ مکران ءَ واجہ ڈالچار کُتگ۔ بلے بژنی گپّے کہ بالیچاہ ءِ وانندہ ءُ ورنا، لبزانکی ءُ سیاسی جھدکاراں ھم ماسٹر ایسا انسان بے ترانگ کُتگ۔ زندگیں راج وتی بامرداں دائم ءَ زندگ دار اَنت۔ نہ کُش اَنت اِش۔ کم چہ کم سال ءِ سر ءَ یا دو سال ءِ سر ءَ بالیچاہ ءِ ورنایاں واجہ ءِ یات ءَ یک دیوانے بہ داشتیں داں کہ پدریچ ءَ واجہ ءِ جھد ءُ واجہ ءِ جند ءِ بارو ءَ بہ زانتیں۔ ءُ پد ءَ ماسٹر ایسا بلاھیں سیاسی ءُ آشوبی جھدکارے بیتگ ءُ ھمے وڑ ءَ واجہ چاگردی بزاں سماجی جھدکارے ھم بیتگ۔ واجہ ءَ وتی چاگرد ءِ دلگوش مدام گور بیتگ ءُ چاگرد ءِ گھبودی ءِ ھاتر ءَ باز کُربانی ئِے ھم داتگ۔
اگاں چوش بہ گْوش ئے کہ ماسٹر ایسا انسان بالیچاہ ءِ ابد ستّار ایدی بیتگ مردم رد نہ بیت۔ پرچا کہ واجہ ءَ چاگردی جیڑہ ھم وتی کوپگاں زُرتگ اَنت۔ ءُ شھید گلام مھمد ءِ جھد ءِ چہ بُنُکّی سنگتاں ماسٹر ایسا انسان یکّے بیتگ۔ جھد ءِ پڑ ءَ واجہ ءَ ناں شپ چار اِتگ ناں روچ۔ بی این وائی ایم BNYM ءَ بہ گر داں بی این ایم BNM ءِ دور ءَ ماسٹر ایسا مدام
جھد ءِ اولی سْرپ ءَ گندگ بیتگ۔ داں مُرت ءُ شُت بلے جھد ءِ مادنیں کشک ئِے یلہ نہ کُت۔ وتی وژنامی ئِے داں کبر ءَ بُرت گوں۔ جھد ءِ کاروان باید اِنت کہ وتی بُنُکّی ءُ ایمانداریں سنگتاں مہ شموش اِیت۔ بلے انچوش کہ من پیش ءَ گْوشت۔ بلوچ گْوش اَنت کہ
"وارتگیں وان ءُ مُرتگیں مرد ءَ نیست شرپ”
اگاں ایسا انسان ءِ جھد مکران ءَ یا بلوچستان ءَ شمُشتگ۔ بلے بژنی گپّے کہ بالیچاہ ءَ ھم وتی مھسن وتی جھدکار شمُشتگ۔ پرچا کہ واجہ ءِ ناپگ ماں بالیچاہ ءَ کَلّ اِنت۔ ءُ واجہ ءِ جند ھم بالیچاہ ءَ کبر اِنت۔ آئی ءِ ارواہ ماں بالیچاہ ءِ مچکدگ ءَ ویل اِنت۔ بالیچاہ ءِ بازیں سنگت کہ آ روچی ما دیستگ اَنت گوں ایسا انسان ءَ ھمرکاب بیتگ اَنت۔ چہ ھمایاں لھتیں یزیدی لشکر ءُ سرکار ءِ کارگُشاد اَنت۔ زرّ ءِ جوپو ءَ کپتگ اَنت۔ ھر جاہ ماڑی اِش بستگ۔ آ وھدی سنگتاں لھتیں شھید بیتگ لھتیں بیگواہ کنگ بیتگ۔ لھتیں بھا بیتگ۔ لھتیں داں روچ ء مرچی جھد ءِ ھمراہ اِنت ءُ ایماندار اِنت۔ ھر کس زانگ بیت۔ انچوش کہ ھدامرزی ئیں گلام ھسین شوھاز گْوش اِیت
ھر کس زانگ بیت چہ وتی بیھ ءَ
من چتور بکشایاں ترا ڈیھ ءَ
بلے من ھمے سرپد باں کہ ماسٹر ایسا انسان ءِ کبر بالیچاہ ءِ راجی چیدگ اِنت۔ ءُ پجّار اِنت۔ من ھما ورنایاں، وانندھاں بالیچاہ ءِ کْوھنیں جھمننداں دزبندی کناں کہ ماسٹر ایسا انسان ءِ جھداں، کُربانیاں مہ شموش اَنت۔ آئی ءِ کربانی پہ گلزمین ءَ پہ راج ءِ ھاتر ءَ داتگ اَنت اے دابیں جھدکار بلوچ ءِ مڈّی اَنت۔ باید اِنت کہ اے دابیں جھدکار اھد ءِ دنز ءُ مجاں اندیم مہ بنت۔ سال ءِ سر ءَ یا دو سال ءِ سر ءَ یک بیگاھے ءَ آئی ءِ نام گرگ بہ بیت داں کہ پدریچ وتی ایمانداریں جھدکاراں گیر بیار اَنت۔

تپاکی ءِ آجوئی ءِ مانزمان اِنت
بلوچستان آجو بات

***

LEAVE A REPLY

Please enter your comment!
Please enter your name here