اگاں ما بِہ چار اِیں اے دُگنیا ءَ جوڑ بُوّگ ءَ رند اِنسان جوڑ کنگ بوتگ ءُ گْوشت کن ئے کہ اِنسان اے دُگنیا ءِ مستریں ءُ شرتِریں بھر اِنت، ءُ اِنسان اے دُگنیا ءَ تہ ءَ یک مزنیں کِردے پیلو کنگ ءَ اِنت۔ اگاں اِنسان مہ بوتیں گُڑا اے دُگنیا ناسرجم اَت ءُ دُگنیا ءَ را ھچ پیمیں بستار نہ بوتگ اَت۔ ھما وھد ءَ کہ اِنسان پیداگ بیت، گُڑا چیزے مُدّت ءَ پد آئی ءِ کَد ءُ کَچ ءَ مزن بُوَگ ءَ ھوار آئی ءِ اَگل ءُ ھُوش ھم وَدّ اِیت۔ پد ءَ آئی ءِ کھول ءَ گوں کار دار اِیت کہ آئی ءِ گِس ءِ مردُم کُجام تب ءِ مردُم اَنت ءُ آیانی دُود ءُ ربیدگ، آیانی نِندگ ءُ پاد آیگ، آیانی پُچ ءُ پُوشاک ءُ زُبان کُجام وڑین اَنت۔
اولی رند ءَ ھر چُکّ وتی گِس ءَ چہ دَربارت، دَربرگ ءَ چہ پد آئی ءِ جِند وت اے چیز ءَ پدّر کنت کہ آئی کھول ءِ مردُم چُونیں تب ءِ مردُم اَنت۔ آیانی تہ ءَ کجام چیز ءِ نِزوری ھست ءُ کُجام چیز ءِ تمردی۔۔۔۔۔۔
اے دُگنیا ءَ جتا جتائیں راج زندگ اَنت ءُ آیانی زُبان ءُ دُود ءُ ربیدگ، پُچ ءُ پُوشاک دُراھیں چیز جتا اَنت، آیان ءَ جتائیں ڈیھ ھست کہ آیانی پِت ءُ پیرکاں ھمود ءَ زندگی گْوازینتگ ءُ وتی ھلک ءُ دَراں پہ آسُودگی نِشتگ اَنت۔ اگاں دُگنیا ءَ کِساس بِہ کن ئے گُڑا سک مزن اِنت ءُ دُگنیا ءِ تہ ءَ ھزاراں راج ھست کہ آیان ءَ جتائیں ڈیھ ءُ جتائیں زُبان ھست کہ آ وتی زندگی ءَ پہ آزاتی گْوازینگ ءَ اَنت۔ آیانی وانگ ءِ زلورت، آیانی نادْوراھجاہ ءُ زندگی ءَ دُراھیں آسراتی سرجم اَنت ءُ آ پہ شاتمانی زندگ اَنت۔
اِنسان یک کَچّے ءَ کَیت کہ آ وتی بدّ ءُ نیک، شَر ءُ گَندگ ءَ پھم اِیت ءُ ھر بنی آدم یک جتائیں پِگرے ءَ گوں وتی وھد ءَ تیلانک دنت۔ ھر اِنسان ءِ ھیال ءُ جیڑہ جتا اَنت، ھر اِنسان یکّے دومی ءَ چہ جتائیں رنگے ءَ پِگر کنت۔ ھرکس وتی زندگی ءِ اَڑ ءُ جنجالاں گوں سر ءُ چیر اِنت، ءُ ھرکس پہ وت وش ءُ وژدلیں بانداتے لوٹ اِیت۔
دُگنیا ءِ کُجام ھم اِنسان بِہ بیت آ لوٹ اِیت کہ من وش ءُ وشھال بِہ بَہ آں ءُ وتی زندگی ءَ گوں آجوئیں دِلے بِہ گْوازین آں، بلے زِندمان ءِ تہ ءَ ھر بنی آدم ءِ اے لوٹ سرجم نہ بَہ اَنت۔ چوش کہ ھر مردُم ءَ را اے مُوہ نہ رس اِیت کہ آ زندگی ءَ وشھال بِہ بیت۔
بلے! ھر راج ءِ نْیام ءَ راجدوست ءُ جُھدکار ھست، بلکیں آیانی جِند ءِ واھگ سرجم نہ اَنت، بلے آ پہ راج ءَ وتی زندگی ءِ روچاں ندْر کنگ ءَ اَنت۔ آیانی مکسد بس ھمیش اِنت کہ مئے جُھد پہ آیوکیں پدریچ ءَ کار ءَ بئیت۔ مئے مروچیگیں جُھد ءِ بَرورد باندات ءَ مئے آیْوکیں پدریچ ءَ وشھال بِہ کنت ءُ مئے راج ءِ لوٹ ءُ گزر کُل سرجم بِہ بَہ اَنت ءُ سرڈگار آجو بِہ بیت۔۔۔۔۔۔۔۔
***
