بلوچ ءُ بلوچستان ءِ راجدپتر ءَ چارے گُڑا ھر دور ءَ بارِیگ ءَ ریاست ءِ داشتگیں چریک کہ بلوچ ءِ دْروشم ءَ مُدام بلوچ ءِ جُنز ءَ را تاوان دیگ ءَ چہ ریاست ءَ دیماتِر بوتگ اَنت۔ انچوش کہ نوزدہ سد ءُ چِل ءُ ھشت ( 1948 ) ءَ مکران ءِ گچکی ھاکم نواب بائیان ھان کلات ءَ را دُوکہ داتگ ءُ پاکستان ءِ پارلیمانی سروک مھمد اَلی جِناہ ءِ ھواری ءَ بلوچستان ءَ را زُورانسری کْوزہ کُرتگ ءُ بلوچانی گار ءُ بیگواھی ءِ سامان یکجاہ کُرتگ اَنت۔
اے ھما داشتگیں چریک بیتگ اَنت کہ وتی سیت ءُ نپّانی ھاتِر ءَ بلوچ ءَ چہ آئی ءِ زمین، آئی مال ءُ مڈّی ءُ میراس پُل اِتگ اَنت ءُ دُژمِن ءِ دست ءَ بندیگ کُرتگ اَنت۔ مرچی ھم ما بچار اِیں گُڑا نواب بائیان ءِ وڑیں سردار ءُ جاگیر دار ھم انچوش ریاستی چانوگر اَنت ءُ وتی سِلّیں کارپداں گوں گُلائیش اَنت۔ پہ درور شھید بابو نوروز ءِ شھید کنگ ءَ دُودا زھری ءِ بدّیں کارپد راجدپتر ءِ تاکاں نبشتگ اَنت۔ گْوستگیں سال ھبدہ اگست ءَ بابو نوروز ءِ تنگوھیں بچّ شھید امان اللہ زرکزئی ءِ شھید کنگ ءَ ریاستی ایجنٹ ثنا اللہ ءِ دست مان بیت کہ دُودک ءِ بے مُرادیں بچّ اِنت۔
اے ثنااللہ تھنا پہ وتی براس ءُ جھدکارانی تاوان دیگ ءُ شھید کنگ ءَ نہ، بلکیں ریاستی چریکانی دست ءَ بلوچ ءُ بلوچستان ءِ ھر ھند ءُ دمگ ءَ یک نہ یک بلوچے ءِ شھید کنگ ءُ گار ءُ بیگواہ کنگ ءَ ھوار اِنت۔ ھمے رنگ ءَ بلوچ ءِ جنز ءَ را انچوک ریاستی چریکاں تاوان داتگ بلکیں من سرپد باں ریاست ءَ نہ داتگ، پرچا کہ آستین ءِ مار باز ھترناک اَنت۔
ھمے وڑ ءَ مرچی یو بی اے ءِ کماندار شھید مئراج پنّام ء ھاکم ھمے ریاستی چریکانی نشانگ ءُ شھید کنگ بیتگ۔
بلوچ ءِ راجدپتر ءِ ھر تاکدیم ءَ ریاستی چریکانی نام ھر لَڑ ءَ ھوار اِنت، بلوچ جھدکار بائِد اول ھمے ریاستی چریکاں سِزا بہ دنت کہ مکران ءُ سراوان ،جھالاوان ءُ بولان ءُ کوہ سلیمان ءِ ھما ڈیتھ اسکوارڈ کہ آئی ءِ پُشت پناھی ءَ ریاست کنگ اِنت۔ بائِد آئی ءِ دوا مرگ بہ بیت، اگاں اے دارگ مہ بَہ اَنت گڑا بلوچ ءِ آؤکیں پدریچ ءِ مزنیں بھرے گار ءُ بیگواہ ءُ شھید کنگ بیت یا کہ گمراہ کنگ بیر۔ پہ چندے سیت ءُ نپّ ءِ واستا اِیشی ءِ دارگ ءُ مکن کنگ ءِ اَمَل یکیں مرگ اِنت دانکہ آؤکیں پدریچ ءُ چاگرد ءِ لس مھلوک بزانت کہ بلوچ ءِ مال ءُ مڈّی، نیلیں زر ءِ رکّینگ ءَ بلوچ ھر وھد ءَ ساجو اِنت۔
آ چریک توری جند ءِ براس ءُ پِت ءِ دْروشم ءَ بِہ بیت یا لس بلوچ ءِ درْوشم ءَ، کسے کہ بلوچ ءِ ھون ءُ گُلزمین ءِ سُوداگر انت بائِد آ مردُم بلوچ ءِ آمیدگِس ءَ مرگ ءِ سزا دیگ بہ بیت ۔
گُڈّی ءَ گوں بلوچ راج ءِ راجی جنگول ءُ جھدکاراں دزبندی اِنت کہ آ وتی گاماں گشاد بہ کن اَنت ءُ بلوچ ءِ لس مھلوک ءُ بلوچ ءِ پُسگاں کہ شھید ءُ گار ءُ بیگواھی ءِ پشت ءَ ھمے چریکانی دست مان اِنت، آیاں الم آیانی گُڈّی آسر ءَ سر بِہ کن اَنت دانکہ پہ دومی ءِ واستا زانت سرّیچیں درونے بِہ مان اِیت۔۔۔۔۔
***
