کوہ دیمیں میتگ ءِ جھمِنند پُلّان کہ آئی ءِ چُکّ ءِ نام کمبر اَت، ءُ پُلّان ءِ گِس ءِ رُو دراَتک ءَ کسانیں جُمپے ءِ سر ءَ نذیر ءِ گِس اَت۔ نذیر ءِ زھگ بس یک جِنکّے اَت کہ آئی ءِ نام ءِ ماھو اَت، ءُ چہ سرجمیں میتگ ءَ نذیر ءِ ءُ پُلّان ءِ گِس پُشت تِر ءَ اَت اَنت ءُ اے دوئیں گِساں چِہ پُشت کوہ اَت اَنت۔
پُلّان دِھکان کارے اَت ءُ پَس ءُ گوکے ھست اَت، زَر ءُ مالی ھالت ءَ نِزور اَت۔ نذیر ماسٹرے اَت، بلے ھما وانگجاہ ءِ ماسٹر کہ نذیر اَت آ وانگجاہ چہ کوہ دیم ءِ میتگ ءَ باز دُور اَت۔ آ وھد ءَ مُوٹل ءُ دِگے آسودگیں اُولاک نیست اَت ءُ نذیر ءَ را ھست اَت ھَرے کہ آئی ءَ وتی ھَر زُرتگ اَت ءُ شُتگ اَت دیم پہ وانگجاہ ءَ گْونڈل وانینتگ اَنت۔
کوہ دیم ءِ میتگ ءَ وانگجاہ ءِ نہ بُوَگ ءِ سَوَب ءَ میتگ ءِ آ دگے مردُمانی چُکّ شھراں وانگ ءَ اَت اَنت، بلے ماسٹر نذیر کہ وتی وانگجاہ ءَ چِہ واتر گِس ءَ اَتکگ اَت گُڑا آئی ءَ کمبر ءُ ماھو وتی گِس ءِ دیم ءَ کاپَر ءِ چیر ءَ وانینتگ اَت اَنت ءُ آ وھد ءَ کمبر ءُ ماھو کسان اَت اَنت۔ کمبر ءَ را کساس دہ سال ءُ ماھو ءَ را نُھ سال بوتگ اَت۔
اے دوئیں گِساں دِگہ گْونڈلیں چُکّ نیست اَت، بس کمبر ءُ ماھو اَت اَنت۔ کمبر ءُ ماھو ءَ دائم یکجاہ گْوازی کُتگ اَت ءُ وتی وھد تیلانک داتگ اَت ءُ ھر دوئین کسان ءُ چہ زندگی ءَ گَل ءُ شات اَت اَنت۔
مدان مدان ءَ وھد پِرگْوزان بوت ءُ کمبر ءُ ماھو ھر دوئیں جوان بُوت اَنت ءُ ھر دوئینانی کسانی ھور گْوستگ اَت۔ یکے دومی ءِ واستا مھروان اَت، ءُ کمبر ءَ ماھو سک دوست اَت ءُ ماھو ءَ کمبر۔۔۔۔۔۔۔
یکروچے کمبر ءُ ماھو ءَ وتی پس پہ چارینگ ءِ ھاتِر ءَ کوہ ءِ تہ ءَ بُرت اَنت، ھمے چارینگ چارینگ ءِ تہ ءَ یک آپی یے لمبے ءَ نِشت اَنت ءُ گْوات پہ دابے کَشّگ ءَ اَت ءُ آزمان جمبراں سرجم ءَ ماں پوشتِگ اَت۔ گپّ گپّ ءِ سر ءَ کمبر ءَ ماھو ءَ را درّائینت ءُ گْوشت: ماھو! بِچار مرچی موسم چینچو دلِکش اِنت ءُ اے گْوات کہ شِیکگ ءَ اِنت، چِنکس زیبا اِنت۔۔۔۔۔۔
ماھو ءَ بِچکند اِت ءُ گْوشت: کمبر! تو مُدام وتی میتگ ءِ دْرچک ءُ دارانی اَنچوش سِپت ءُ توسِیپ ءَ کن ئے گْوش ئے زان ءَ دنیا ءَ چِہ جْوانتِریں ھنکین وَ تئی میتگ اِنت، اِد ءَ کدی بچار آپ نیست، کدی بچار ڈُکّال اِنت ءُ ناکہ جْوانیں وانگجاہ ءُ نادْرواھجاھے ھست، ھُشکیں سْیاہ ڈَن ءُ سْیاھیں کوہ توسِیپ نہ کرز اَنت۔۔۔۔۔۔۔۔
چہ اے ھپّاں پد کمبر ھاموش بوت ءُ جیڑگ ءَ لگ اِت۔۔۔۔۔۔،بلے ماھو ءَ را اُوپار نہ شُت ءُ درّائینتے ھاں کمبر! تو ھاموش ئے، نوں منی پسّو ءَ بِہ دئے ترا چی ءَ اے سْیاہ ڈَنّاں گوں اِینچو مھر اِنت۔۔۔۔۔۔۔۔۔؟
دمانے ءَ پد کمبر ءَ پسّو دات کہ اے زمین منی پِت ءُ پیرکی میراس اِنت۔۔۔۔۔، من چہ ھپت پُشت ءَ ھمے میتگ ءَ وتی زندگی گْوازینتگ ءُ اے زمین ءِ گرم ءُ سارت، تبد ءُ لِوار ، کوہ ءُ بُزگلاں گوں من ءَ بے کساس مھر اِنت ءُ اے زمین ءِ واستا منی ساہ کُربان۔۔۔۔۔۔۔۔۔۔۔
پد ءَ ماھو ءَ کمبر ءَ را گْوشت کہ کمبر! من ءَ ھم تئی گوم ءَ بے کساس مھر اِنت۔۔۔۔۔، اگاں تو وتی ساہ ءَ پہ زمین ءَ کُربان کن ئے گُڑا منی زندگی برباد بیت۔۔۔۔۔۔۔۔۔۔۔۔
من بے تو زندگی کُت نہ کن آں۔۔۔۔۔۔۔، ھمے وھد ءَ کمبر ءِ ارس دَر اَتک اَنت ءُ پسّوے دات ءُ گْوشت کہ ماھو من وتی زمین ءَ مُوک آں۔۔۔۔۔۔۔۔۔۔گُڑا پد ءَ من ءُ تو وش ءُ وشھالیں زندگی یے گْوازین اِیں۔ ماھو ءَ کمبر ءِ گپّانی اِشکنگ ءَ پد سر چنڈّینت ءُ گْوشت شرّیں! من داں ھما روچ ءَ تئی ودار ءَ نِنداں کہ تو پُلّیں زمین ءَ آجو بِہ کن ئے ءُ پہ من واتر بہ بِہ ئے۔۔۔۔۔۔۔۔۔۔۔
چیزّے مُدّت ءَ پد ماھو پہ وانگ ءَ شھر ءَ رپت، ءُ کمبر شُت کوہ ءَ، نوں کمبر ءَ را چار سال ءَ گیش اِنت کہ واتر گِس ءَ نہ یتکگ ءُ ماھو ھم کمبر ءِ ودار ءَ نِشتگ۔۔۔۔۔۔۔۔۔۔۔۔۔
***
