( کِسّہ رنگ )
زِندگی مدان مدان ءَ دیم پہ مِنزل ءِ پاند ءَ جُنزان اَت ءُ من آئی پدرنداں رھادگ۔۔۔۔۔۔۔۔۔۔۔۔، ھمے پند ءَ کمیں دیر ءَ پد سما کپت کہ اے تھنائی ءِ بیمّناکیں جنگل ءَ من، مِھری، بیوانکیں سپر ءُ مھلب چکاریں شپ۔۔۔۔۔۔۔۔
ما چہ وتی میتگ ءَ دُور دیم پہ مِنزل ءِ پاند ءَ گام جنان اِت اِیں کہ مِھری ءِ کندگ ءُ مزاکاں شپ دِگہ رنگے ءَ سینگارتگ اَت، بلے چہ سپر ءُ پند ءَ گیش مِھری ءَ شپ ءَ چہ سک بیمّ اتک۔ من ءَ مُدام گونجت ءُ گْوشت ئے کہ مِھر من وَ نہ زان آں کہ اے چونیں تُرسے منی جان ءَ کپتگ ءُ چہ شپ ءِ تھاری ءَ پرچا بیمّ کَیت۔۔۔۔۔۔۔۔؟
گُڑا من مِھری ءِ پسّو نہ دات ءُ دیم پہ مِنزل ءِ پاند ءَ رھادگ اِت اِیں کہ مِھری ءَ پد ءَ الھان کُت ءُ گْوشت: مِھر ما انگت سر نہ اِیں وتی مِنزل ءَ۔۔۔۔۔۔۔۔۔۔۔؟
من ءَ سک تُرسگ ءَ اِنت، پہ سِتک ءُ دِلجمی بِہ گْوش ما چینچو ساھت ءَ پد وتی مِنزل ءَ سر بَہ اِیں۔۔۔۔۔۔۔۔۔؟
چہ مِھری ءِ اے رِد پہ رِدیں جُستاں پد من وتی بے تواری پُروشت ءُ گْوشت: مِھری اِد ءَ ھِچّ نیست، ما زُوت وتی مِنزل ءَ سر بَہ اِیں، بلکیں پہ دِلوارگی ما ھِچّ رنگ ءَ مِنزل ءَ آسر نہ کن اِیں، وت ءَ مُھکم کن ءُ اے تُرس ءَ چہ دِل ءُ دیدگاں ولگوج کن، اگاں نا اے تُرس ءَ کہ وھدے مئے مجگ ءَ جاہ کُت گُڑا ما ھِچّگی نہ بَہ اِیں۔۔۔۔۔۔۔۔۔۔۔۔۔
ساھتے ءِ بے تواری ءَ پد مِھری ءَ گوں نرمیں گالوارے ءَ منی جُستانی پسّو ترّینت ءُ گْوشت: مِھر من نہ زان آں اے چونیں تُرسے منی باتِن ءَ اِیر کپتگ، چوناھا ءَ منی گاماں من ءَ چِد ءُ ساری دْروہ اِتگ، بلے تئی سِکین ءُ دِلبڈّیاں من ءَ اے کچّ ءَ کُتگ، اگاں نا من گوں اولی گام ءَ واتر بوتگ اِت آں، چی ءَ کہ منی چمّ کہ کُجام دیم ءَ کپ اَنت۔۔۔۔۔۔۔شپ ءِ بیمّناکی من ءَ امباز اِیت ءُ تھاری ءِ تُرس باتِن ءَ چُونڈان کنت، پمشکا من ھیران آں کہ اے چونیں تُرسے منی باتِن ءَ اِیر کپتگ ءُ من ءَ وتی چنگُلاں داشتگ ئے۔۔۔۔۔۔۔۔۔۔۔۔؟
من تسلّا دات ءُ گاماں دیم ءَ شھار دیان اِت اِیں داں کنڈگے ءَ بالا بوت اِیں، من کہ وت ءَ گوں ھیسک ءُ ھمپانی ءَ دیست، تہ مِھری ءِ ھیال گیش اتک کہ آئی ءَ سک دمبرتگ۔ من گوں مِھری ءَ ھلوت کُت گْوشت کمیں دم کن اِیں ءُ نوں دیم ءَ جُنز اِیں، تو چے گْوش ئے۔۔۔۔۔۔۔۔۔۔؟
چاراں مِھری ءَ سرچنڈینیت ءُ ھو کُت، گُڑا ما کنڈگ ءِ بالائی ءَ نِشت اِیں داں سارتیں کَوش ءِ چِڑکّہ پُرشتگ اَت ءُ یاتانی درے بُتکگ اَت۔۔۔۔۔۔۔۔۔۔، کسانی، میتگ ءِ دمک ءُ زھگانی لیب ءُ گْوازی، کاڑانی چاپ ءُ نازینک، کماشانی دیوان ءُ کِسّھانی درشان، پِیرزالانی شکر گالیں لیلو، ماھِکانیں شپ۔۔۔۔۔۔۔۔۔۔۔۔، دمانے ءَ پد سما کپت کہ اے تھنائی ءِ ابیتکیں جنگل ءَ من ءُ مِھری، سارتیں کَوش ءُ مھلب چکاریں شپ اِنت کہ یاتانی گْرنچ ءَ بوجگ ءَ اِنت۔۔۔۔۔۔۔۔۔۔۔۔۔
من کہ وتی چمّ پہ مِھری ءِ اناریں دْروشم ءُ برپیں بالاد ءَ شانک دات آں، چاراں مِھری ءَ سک دمبرتگ ءُ گوں سارتیں کَوش ءِ لھمیں شیکّگاں مُلمہ اِنت، انچو سما بیت کہ واب کپگ ءَ اِنت، پمشکا من شاکار اِت ءُ گْوشت: مِھری! اُو مِھرجان! پند ءَ ترا ژند ءُ پند کُتگ ءُ کَوش ترا واب گیجگ ءَ اِنت، تب ءُ میل چون اَنت۔۔۔۔۔۔۔۔۔۔؟
مِھری ءَ سر سُرینت ءُ گْوشت: ھو مِھر کَوش من ءَ واب گیجگ ءَ اِنت، چی ءَ کہ سک دمبرتگ۔۔۔۔۔۔۔۔۔۔۔۔۔، مئے مِنزل انگت ءَ نزّیک نہ اِنت۔۔۔۔۔۔۔۔۔۔۔؟ اے تھاریں شپ ءِ تُرس کد چہ باتِن ءَ ولگوج بیت۔۔۔۔۔۔۔؟
من لوٹ اِت کہ مِھری ءِ جُستانی پسّوھاں پہ دِلبڈّی ءُ تسلّا بِہ دیاں، بلے من ءَ مِھری ءَ موہ نہ دات ءُ چِڑکّھے کُت، مھر! اُو مھر! تو منی پسّھاں بِہ دے، مھر تو زان ءَ واب شُت ئے۔۔۔۔۔۔۔۔۔۔؟، مھر نوں من ءَ سک تُرسگ ءَ اِنت۔۔۔۔۔۔؟ لھتیں دریں زُبان ءِ مردم اَنت کہ گپ جنگ ءَ اَنت، اُو مھر
بس کن نوں ھِچ مہ گْوش کہ رستراں مارا سر ءَ زُرتگ۔۔۔۔۔۔۔۔
مھر من ءَ سک تُرسگ ءَ اِنت، مھر من چمّاں پچ نہ کن آں کہ رستراں من ءَ گِپتگ ءُ داشتگ، مھر منی چمّاں سْیاھیں پٹّی بندگ ءَ اَنت۔ مھر! اُو مھر! من ءَ اے برگ ءَ اَنت۔۔۔۔۔۔۔۔۔، مھر تو ھمد ءَ ئے۔۔۔۔۔۔۔۔۔۔۔؟، مھر من ءَ بُرت اِش۔۔۔۔۔۔، مھر من ءَ پسّہ بِہ دے۔۔۔۔۔۔۔۔۔۔، مھر من ءَ پسّہ بِہ دے۔۔۔۔۔۔۔۔۔۔۔
گوں مھری ءِ اے ارس چکاریں توار ءَ من چہ وت ءَ ھلاس بوت آں، ءُ اے ساھت ءَ من سک بے وس اِت آں کہ چے بِہ کن آں، چی ءَ کہ منی چمّانی دیم ءَ منی نازاکیں دزگْوھار مھری رسترانی دام ءَ کپت، پمشکا من نہ زانت کہ من چے بِہ کن آں۔۔۔۔۔۔۔۔۔۔۔۔
من پہ ھلاھُوشی اِیشانی رند ءَ کپت آں ءُ گْوشگ ءَ لگ اِت آں کہ شُما کَے اِت۔۔۔۔۔۔۔؟ شُما پرچا منی دزگْوھار ءَ برّگ ءَ اِت۔۔۔۔۔؟ شُما پرچا مئے گوم ءَ رستری کنگ ءَ اِت۔۔۔۔۔۔۔؟
ما بزّگ اِیں، مارا پرچا گار ءُ بیگواہ کنگ ءَ اِت۔۔۔۔۔۔۔۔۔؟ زان ءَ مئے گناہ ھمیش اِنت کہ ما بلوچ اِیں۔۔۔۔۔۔۔۔۔۔۔۔۔؟
اِیشانی پد ءَ چہ گیشیں تچگ ءَ منی پادانی سواس سِستاں، بلے اِیشاں منی پسّہ نہ دات ءُ دیم پہ وت ءَ دات ءُ مھری ءِ چو نپت ءَ گُمبوکیں توار ھم گار بوت، بلے منی گُوشاں انگت سُکسُک ءَ اَت۔۔۔۔۔۔۔۔۔
پمشکا من سربتگ بوت آں کہ نوں کجا برواں، چی ءَ کہ اے تھاریں شپ ءَ مُرگانی ھم توار نیست اَت ناکہ مردُمے۔۔۔۔۔۔۔، پرے ھاتِر ءَ من ھمد ءَ نِشتاں ءُ دست سر ءَ کُت آں گوں وت ءَ گپّ بِندات کُت ءُ جیڑگ ءَ لگ اِت آں کہ مئے گوم ءَ چی ءَ چو بُوَگ ءَ اِنت۔۔۔۔۔؟ ما پرچا چو بیوس ءُ نادزرس اِیں۔۔۔۔۔۔؟ ما داں کد انچو بے توار بہ اِیں ءُ نِند اِیں۔۔۔۔۔۔؟ مئے زِند ءِ مکسد چی اِنت۔۔۔۔۔۔۔۔۔۔؟ نِندگ ءُ چارگ۔۔۔۔۔۔۔۔۔۔۔۔؟
گوں وت ءَ باز گِلّہ کُت، چہ گِلّھانی ریچگ ءَ پد من پاد اتکاں ءُ دیم پہ دیمی نیمگ ءَ رھادگ بوت آں، بلے مِھری ءِ ھیالاں چہ ساھتے ھم در نہ یتکاں۔ گوں مھری ءِ آوار جَنَگ ءِ گْرانیں گماں من کُوکار کُت ءُ دیم پہ دیمی نیمگ ءَ دات، چاراں چہ منی گیشیں جاک ءُ کُوکاراں اے نزّیک ءُ گْور ءِ بازار ءِ سجئیں مردُم جھ سرّ اِتگ اَنت ءُ منی رند ءَ کپتگ ءُ پیداک اَنت۔۔۔۔۔۔۔۔۔۔، وھدے من اے میتگ کہ دیست منی رند ءَ کپتگ ءُ پیداک اِنت، گُڑا دِل ءَ ھمے ھیال اتک کہ من الم مِنزل ءَ سر بَہ آں، بِل کہ مِھری ءِ زپتیں گم من ءَ پہ آرام ءُ کرار نیل اَنت، بلے چہ اے کُلیں گماں شپ تھار ءِ گم مارا سرجم ءَ پِلِکّ اِیت، تہ سما کُت! چاراں منی دیستگیں واب ءِ کشّ ءَ راستی میلانک اِنت۔۔۔۔۔۔۔۔۔۔۔۔۔۔۔۔۔۔
***
