زمانگے ءَ ھست یک بلوچ پیرزالے کہ آئی ءَ را یک بچکّیں چُکّے ھست اَت۔ پیرزال ءِ لوگواجہ مُدّتے ءَ پیسر بیران بُوتگ اَت ءُ پیر زال ءَ را دِگہ ھچ وس نیست اَت، پمشکا آئی ءَ وتی لاپ ءِ درگیجگ ءِ ھاتر ءَ گُددُوچی کتگ اَت ءُ مال ءُ دلوت ھم داشتگ اَت ۔ ھمے دلوْتاں گوں وتی وھد دیم ءَ تیلانک دات۔
چوش کہ پیرزال یک کُوچگ ءِ نِندوکے اَت ءُ پیرزال سرجمیں میتگ ءِ مردماں چِہ لاچار تِر اَت کہ آئی ءِ چُکّ ھم اِیچو مزن نہ اَت کہ مات ءِ گْرانیں بار ءَ وتی بڈّ ءَ بِہ بند اِیت، بلے پیرزال ءَ اے دُرستیں لاچاریاں اَبید وتی دل دَؤر نہ داتگ اَت۔ مُدام وتی کاراں گوں دزگٹّ اَت ءُ کُوچگ ءِ مردُم ھم مھروان اَت اَنت، آیاں مُدام پیرزال ءَ مدت کتگ اَت۔
میتگ ءَ یک وانگجاھے ھست اَت کہ ھمودا داں پنچ تبک ءَ وانینتگ اَت اِش، بلے پیرزال ءَ وتی بچکّ ھجبر پہ وانگ ءَ دیم نہ داتگ اَت، چی ءَ کہ پیرزال ءِ چُک ھمے یکّین اَت ءُ آئی ءَ را ھچ وڑ ءَ دل نہ بُوتگ اَت۔ پیرزال ءَ چُک آئی ءِ چمّانی نور ءُ لوگ ءِ چراگ اَت۔
ھمے پیم ءَ گُڑا یکروچے میتگ ءِ مھروانیں مردمے پیرزال ءِ لوگ ءَ اتک ءُ آئی ءَ را گْوشت ئے کہ نوں تئی بچک مزن اِنت ءُ مئے میتگ ءِ وانگجاہ ءَ وانگ ھم جْوان اِنت، تو چوش کن وتی چُکّ ءَ وانگ ءَ دیم بِہ دے دانکہ تھاردیمگیں آکبتے رُژناہ بِہ بیت ءُ وتی راج ءِ باندات ءَ رُژناہ بِہ کنت۔ یکبرے پیرزال ھچ وڑ ءَ رازی نہ بُوت ءُ آئی ءَ گْوشت کہ منی وس ءُ واک ھمے یکّیں چُک اِنت ، اگاں منی چُک منی چمّانی دیم ءَ چِہ گِستا بِہ بیت، گُڑا من ءَ ھِچّ وڑ ءَ کرار ءُ آرام ءَ نئیت۔ گُڑا ھما مرد ءَ پیرزال ءَ را گُڈّی ءَ رازی کُت ءُ چُک ءَ را وانگجاہ ءَ دیم دات، ھمے ڈول ءَ چُک ءَ چیزے رُوچ ءَ رند وانگ ءِ ھیل چِت ءُ جْوانیں پیمے ءَ داں پنچ سال سرجمے کُت۔
دیم ءَ وانگ ءِ واستا شھر ءَ رَوَگی اَت، بلے چُک ءَ وتی مات یل دات نہ کُت۔ چیزے مُدّت ءَ رند ملک ءِ جاور سک نَہ گِیگ بوھان بُوت اَنت ءُ لشکرکشی بِندات بُوت ءُ زوراکاں سرجمیں کُوچگانی مچکدگ ءُ دْرچک ءُ داران ءَ آس جت۔ تیوگیں میتگ ءِ سبزگ مانداشت اَنت، گریب ءُ بزگرانی لوگ مانداشت اَنت ءُ میتگ ءِ ورنا آوار جت اَنت ءُ پیرزال ءِ چُک ھم بیگواہ کنگ بُوت، پمشکا اے ناوشیں ھال پہ پیرزال گْوش ئے مھشر بُوت۔ ھر روچ ورناھانی تیر سُپتگیں لاش کپان بُوت اَنت ءُ میتگ ءَ واہ ءُ زاری اَت، سرجمیں مھلوک تُرس ءِ آماچ اَت۔
پیرزال ءِ چُک کہ بیگواہ بُوت، گُڑا ھمے یکیں روچ ءَ پیرزال دلترک بُوت ءُ مُرت! دو سئے روچ ءَ پد پیرزال ءِ بے گناھیں چُک ءِ لاش ھم دزکپت۔۔۔۔۔۔
***
