”آشوب نہ کہ دوچے، نہ کہ نبشتانکے، نہ کہ ورَگ ءُ چَرَگی دیوان ئِے۔“
1927 آ کہ چائینہ ءِ آشوبی گل ءَ مزنیں تاوانے رَس اِت،ھمے درگت ءَ گَل ءِ سک باز مڑدم زوال بوت گڑا آئی ءِ راھشون ماؤ زے تنگ بُرز ءَ نبشتگیں ھمے گپاں گوں وتی ھمبلاں کنت۔مرچی ایں وھد ءَ بلوچ راجی جنز ءِ تھا وھد ءُ جاور ھمے دروشم ءَ مئے دیما پیداک انت کہ آجوئی جُنز ھون لوٹیت، ھون لوٹیت۔
یک گَلے کہ وتی سرڈگار ءُ وتی راج ءِ رکینگ ءُ آجوئی ءِ جھد ءَ کنت گڑا اے المی انت کہ گَل ءِ ھمبل ءُ ھمراھاں مزنیں کچے ءَ تاوان ھم رَس ایت۔ ما وھدے وتی آجوئی ءِ جنز ءَ چمشانک دائیں گڑا مئے سوبمندی ءِ ھواری ءَ مئے تاوان ھم دیم ءَ کاینت۔ ما وتی آجوئی ءِ جنز ءِ سرا ھورت چاری بہ کن ایں گڑا اے گوستگیں بیست سال کہ یک پیما جھد دیم ءَ جنزان اِنت وت مزیں سوبمندی یے کہ آجوئی ءِ ھمرا ءُ بمبل پہ وتی مکسد ءِ دیم ءَ برگ ءِ جھد ءَ کنگ ءَ اَنت۔ دومی نیمگ ءَ اے گوستگیں وھد ءَ مارا ھمبلانی شھیدی ءَ بلاھیں تاوان ھم رَس اِتگ۔
بَلے آشوبی ھمبل بلوچ راجی آجوئی ءِ جُنز ءِ پِڑا آیگ ءَ پیسر آشوب ءِ درسیں سکی ءُ سوریاں سرپد اِت اَنت کہ مئے سر ءَ چُش ایں وھد الم کیت کہ مارا وتی جان ندر کنگی بنت ءُ وتی ھمبلانء نُگرھیں جاناں ندر بوگ ءَ گند ایں۔
درسیں ھمبل ءُ ھمراہ دوست بنت بلے اے ھم راستی یے کہ لھتیں انچیں ھمبل ھم ھست کہ مدام دل ءِ تہ ءَ نکش بنت۔برے آیانی کندگ،برے زانت،برے اوپار ءُ نہ زاناں اے پیمیں جُھدکارانی کِرد ءِ سر ءَ دگہ چے نبشتہ بہ کناں۔بس ھمے گْوشاں کہ اے وڑیں مردم وتی مَٹ وت اَنت ءُ دگنیا ءَ بس یکبرے ودی بنت۔
ھمے پیمیں یک ھمبلے مَنی دیم ءَ ھم گْوستگ،من ءَ پہ آ ھمبل ءَ ناز اِنت کہ من یازدہ سال گوں اے ھمبل ءَ ھمراہ بوتگاں۔منی بیلی،منی ھمبل،منی ھمراہ ءُ منی راجی راھشون۔۔۔۔۔۔آہ! شھید آگا آبد شاہ،بلوچ نودربر گل(بی ایس او) ءِ دومی کمک سرکماش(جونیئروائس چیئرمین) ءُ بلوچ راجی زْرمبشت (بی این ایم) ءِ باسک،گوں شھید آگا آبد شاہ ءَ منی اولی دیوان سال2000 ءَ بوتگ اَت۔ ایشی ءَ پد مئے دیوان، گپ ءُ تران مدام بوتگ کہ آ پہ پد چہ شھید آگا آبد شاہ ءِ زورگریں لشکر ءِ دست ءَ زورانسری بیگواہ کنگ ءَ ھلاس بوت۔بلے من گوشاں کہ مئے دیوان انگت برجاہ اَنت ءُ آگا آبد شاہ منی دیم پہ دیم ءَ نشتگ ءُ گْوشگ ءَ اِنت کہ جلال جان مئے جُنز ھما پیم ءَ دیم ءَ جُنزان اِنت کہ ھما پیم ءَ ما جیڑ اِتگ، ھما پیم کہ مئے شُمے پولی ٹیکنک کالج منی نوکیں ھاسٹل ءِ کوٹی ءِ تہ ءَ گپ ءُ تران کُرتگ۔ھو آگا جان انی ھم منی دیم پہ دیم ءَ نشتگ ءُ وتی گوں ھمبلاں دیوان کنگ ءَ اِنت،ھمے گپ ءَ اِنت کہ ھمبلاں انوں مئے جُھد انچیں دروشُمے ءَ دیم ءَ شُتگ کہ نوں دگنیا ءِ دُرسیں زوراک یکجاہ بہ بنت مارا بےسوب کُرت نہ کن اَنت۔
08 اگست 2002 ءِ روچ پدا یک یات گِری روچے اَت۔ اے روچ ءَ بلوچ راجی راھشون ڈاکٹر اللہ نذر ءِ شُدکشیں زھرشانی ءَ دہ روچ سرجم بوتگ اَت بلے زورگریں سرکار بلوچ نودربرانی جیڑھاں گیش ءُ گیوار کنگ ءَ جاڑی نہ اَت۔ مئے راھشون ڈاکٹر اللہ نذر ءِ تَب ھم سک ناگیگ اَت۔ وتی راھشون ءِ ناگیگی ھمبلانی گون ءَ اوپار بیگ ءَ نہ اَت،گڑا ھمبل زھور گُل،چیئرمین مالک، ڈاکٹر امداد، شھید کریم جان، شھید ھکیم جان ءُ آ دیگہ ھمبلاں ھمے سْوڑگ کُرت کہ مئے دِگہ لھتیں ھمبل ھم شُدکشیں زھرشانی بہ کن اَنت،گڑا بوت کنت زورگریں سرکار مئے کُرتگیں سْوڑگانی سر ءَ چمشانک بہ دنت۔
منی وش بھتی اَت کہ ھمبلاں ھمے سْوڑگ کُرت کہ بی ایس او آزاد ءِ نیمگ ءَ آگا آبد شاہ ءُ جلال زھرشانی ءَ بھر زور اَنت۔
اے شُد کشیں زھرشانی ءِ مئے سیمی ھمراہ بی ایس او امان ءِ دومی سرکماش(وائس چیئرمین) ڈاکٹر شپی دانش اَت۔
منی وش بھتی اَت کہ من ءُ منی بیلی یکیں منزل ءَ جُنزان بوت ایں، ما چُش ھم سرپد اِتیں کہ اگاں زورگریں سرکار بولان میڈیکل کالج ءِ جیڑھاں گیش ءُ گیوار مہ کنت گڑا مئے مرگ المی اِنت،بلے مئے ھما ھمبل کہ گوں آیاں ارواھی سیادی بہ بیت گڑا اود ءَ مرگ ءِ گُمان کنگ ھم یک شاتکامی یے کہ مردم ءِ کِر ءَ پہ گپ کنگ ءَ دانک ھلاس بنت۔بس دل ءَ ھمے وشیں گُمان ودی بوتگ اَت کہ من ءُ منی بیلی ھوار ایں۔اے وھدا پہ منا مستر پریشانی ایش ات کہ مئے راھشون اللہ نذر ءَ ھچ مہ بیت کہ مئے راج ءِ امیت مئے راھشون انت۔
ما شال پریس کلب ءِ دیم ءَ زھرشانی کنگ ءَ اِتیں کہ ادارے ءَ پد پولیس ءَ مار ءَ دزگیر کُرت ءُ سدر لائن پولیس گِس ءَ بندیگ کُرت۔منا یات بیت کہ آگا آبد شاہ ءِ میدہ شَر نہ اَت بلے ایشی ءَ ابید ھم آگا جان گوں پُرمڑائیں کندگاں مارا دلبڈی دیگ ءَ اَت۔مئے زھرشانی چاردہ اداراں پد ھلاس بوت ءُ زورگریں سرکار ءَ بولان میڈیکل کالج ءِ ورنایانی جیڑہ ءَ ھلاس کرت۔ زھرشانی پد مارا چیئرمین امان اللہ پولی ٹیکنیک کالج ءَ رس اینت، اے وھد ءَ شپ ءِ ادار دو اَت،دُرسیں ھمبل چیئرمین مالک،زھور گل، بشیر زیب، شھید ھکیم جان، شھید کریم جان ءُ آگا آبد شاہ ءِ کوٹی ءِ ملور ملور ءَ نشتگ اِت اَنت۔مارا کہ ھمبلاں دیست گڑا من ءَ یات بیت کہ زھور گل چہ درساں پیش جُست کُرت کہ شُمئے جیڑہ چون بوت ءُ ڈاکٹر اللہ نذر کُج اِنت ءُ چون انت؟۔۔گڑا آگا جان پہ بچکندگ پسو دات کہ واجہ ءِ تب وش نہ اِنت ءُ واجہ شُتگ بولان میڈیکل کالج ءَ مئے راھشون ءِ (ڈاکٹر اللہ نذر) ءِ جھد سوبمند بوت۔
آگا آبد شاہ مرچی ھم یات کَیت گُڑا چمانی اَرس دارَگ نہ بنت،برے برے انچوگمان بیت کہ 2001 اِنت ءُ من آگا جان ءُ آدگہ ھمبل ڈاکٹراللہ نذر پَرمائنگ ءَ بھگت سنگھ ءِ تامُر ءَ چارگ ءَ ایں، برے برے انچو گمان بیت من ءُ آگا جان ڈگری کالج کوئٹہ ءِ دیم پہ دیمی ھوٹل کیپ ایکو ءِ سرا نشتگ ءُ آبدشاہ اے سوت ءَ گْوشگ ءَ اِنت۔
بولان ءِ تَو نام ءَ مہ گِر
بولان بلوچ ءِ دپتر اِنت
ءُ برے توازہ ھم کنگ ءَ اِنت کہ
تو ایکو ءِ نام ءَ مہ گِر
ایکو بلوچ ءِ دپتر اِنت
پد ءَ بچکند ایت۔
ھؤ۔۔۔۔ اڑے آگا آبد شاہ من نُوں کجا چے بیاراں تَئی ٹھک ءُ تَئی وش ایں کندگاں،پہ راج ءِ وشیں باندات ءَ چونے چونے ھمبلاں وتی نُگرھیں جان ندرکرتگ اَنت۔پمشکا گْوش اَنت کہ آجوئی جِنز ھون لوٹ ایت ءُ ھمبلانی ھمے رِتکگیں ھون وشیں باندات ءِ مانزمان اِنت۔
***
