کِسّہ رنگ
من یک تھاریں کبرستانے ءِ تہ ءَ بند آں، منی کِرّ ءَ بس لھتیں یات ءُ تْرانگ، یک کِتابے ءُ تھنائی۔۔۔۔۔۔۔۔۔۔، بلے تو سرپدے کہ من ءَ گوں تھاری ءَ مھر اِنت۔
پرچا کہ تھاری منی تھنائی ءِ ھمراہ اِنت، ءُ من ءَ ھمے سما بیت کہ من یک مُردگے آں۔ چی ءَ کہ کبرستان ءَ ھمینچو تھار اِنت ءُ ھمینچو تھنائی اِنت، بلے لھتیں منی پیمیں مُردگ اُوں اُود ءَ کَلّ اِنت۔
من ءَ انچو سما بیت کہ آ اُوں چو منی پیم ءَ ابیتک ءُ بے چاڑ۔۔۔۔۔۔۔۔، کَسے اُوں مئے ھال ءِ جُست ءَ نئیت۔۔۔۔۔۔۔آ دگراں گوں من وَ گِلّہ نہ آں، بلے مات وَ بائِدیں کہ بِہ یتکیں منی ھال پُرسی ءَ۔ من مُدام ودار کن آں کہ بوت کنت مات بئیت وتی مُردگیں چُکّ ءِ چارگ ءَ۔۔۔۔۔۔، داں پد ءَ ھیال ءَ کپاں کہ مُردگانی چارگ ءَ وَ کس نئیت۔
بلے بائِدیں مات وَ چو مہ کنت، برے برے من گوں مات ءَ سک گِلّہ کن آں، ءُ برے برے گوں وت ءَ گِلّہ کن آں کہ پرچا۔۔۔۔۔۔۔۔۔؟؟
چی ءَ کہ من آ وھدی مردمے بوتگ آں، من ءَ کس ءَ مھر نہ داتگ ءُ ناکہ نوں من مُرتگ آں، من ءَ کَے جُست کنت۔۔۔۔۔۔۔
نوں من ءَ گوں وت ءَ سک مھر اِنت، من کسی مھرانی لوٹوک نہ آں۔۔۔۔۔۔۔، بلے تھنائی برے برے من ءَ سک دِگہ وڑ کنت۔ انچو سما بیت کہ اِد ءَ کس نیست۔۔۔۔۔۔۔۔۔، بلے چو نہ اِنت، چی ءَ کہ لھتیں منی پیمیں مُردگ ھست کہ آ اُوں گوں وتی یات ءُ تْرانگاں کَلّ اَنت۔۔۔۔۔۔۔
ءُ تھاری من ءَ بے کِساس تاھیر دنت کہ من ءَ پنچ سال اِنت ھمے کبرستان ءَ کَلّ آں کہ منی کِرّ ءَ ھِچّ نیست۔۔۔۔۔، بس تھنا لھتیں یات ءُ یک کِتابے ءَ چہ ابید کہ دیر انت دِرتگ ءُ تاک تاک اِنت، بلے اے کِتاب سکّیں وپادارے۔۔۔۔۔مُدام گوں من ءَ نِند اِیت ءُ گپ جنت ءُ منی تھنائی ءَ کمتِر کنت۔ ءُ من ءَ مِدام گْوش اِیت کہ مھرل من ھستاں تو تھنا نہ ئے۔۔۔۔۔۔۔،بلے تھنا کِتاب اِنّا! بلکیں تھنائی اُوں باز وپادر اِنت۔۔۔۔۔۔۔۔۔۔۔کہ من ءَ مُدام ھمے تْرانگ ءَ گیجیت کہ مھرل تو مُردگے ئے۔۔۔۔۔۔ءُ برے برے منی کش ءِ مردُم گوں من ءَ گپّ اُوں جن اَنت ءُ جُست اُوں کن اَنت۔۔۔۔۔۔۔۔۔
مھرل تو ھِچّ نہ گْوش ئے، ناکہ تئی کندگ ءِ توارے کَیت، ناکہ تئی گریوگ ءِ توارے۔۔۔۔۔۔۔؟؟
پرچا چو بے تِرک ءُ توار ءُ ھاموش ئے۔۔۔۔۔۔؟؟
ءُ من پسّو دیاں کہ من وَ گوں تھنائی ءَ مُدام گپّ جناں، شُما سرپد نہ بہ ئے زان ءَ۔۔۔۔۔۔؟ منی توار پہ شما نئیت اِنت زان ءَ۔۔۔۔۔۔۔؟
من وَ مدام گوں تھاری ءَ نِشتگ ءُ دیوان کن آں، ءُ تھاری اُوں گوں من نِند اِیت ءُ گپّ جنت ءُ من ءَ پسّہ دنت۔۔۔۔۔
اِنّا مھرل! اِد ءَ ھِچّ توار نئیت اِنت، بس برے برے لھتیں تُرسناکیں توار پاد کَیت چہ تئی تھاریں کبر ءَ۔۔۔۔۔۔درد ءِ توار من ءَ سک بے وار کن اَنت ءُ من ءَ ناکہ واب کَیت ءُ ناکہ آرام، برے برے منی دل گْوش اِیت کہ اِد ءَ چِہ درا دور برو، پرچا کہ من برداشت کت نہ کن آں۔ اے پیمیں درد کہ اِشانی ٹپّ ھچبر درمان نہ بہ اَنت، برے برے جیڑاں من کہ بُرواں اے مھرل تھنا بیت۔۔۔۔۔۔۔۔۔
من پسّو دات اِنّا! من تھنا نہ بہ آں، منی کِرّ ءَ یات، ترانگ، درد، کتاب، تھنائی، تھاری ءِ ارواہ گوں من ءَ ھوار ءُ من گوں اِیشاں آدت کتگ، چی ءَ کہ پنچ سال اِنت گوں ھمیشاں من ھواراں، اے سکّیں وپادار ءُ مھروان کہ من ءَ ھِچّ وڑ ءَ تھنا نہ کن اَنت۔۔۔۔۔۔۔
تو روئے ترا موکل اِنت، بلے ھر وھد ءَ کہ منی مات ءَ گِندئے تہ منی سلاماں بِہ دے ءُ بِہ گْوش کہ تئی بے وس ءُ بے تواریں چُکّ ءَ ترا سلام کُتگ ءُ گْوشتگ کہ یکروچے بیا ترا چاراں کہ پہ تو من ءَ زھیر کنگ ءَ اِنت۔۔۔۔۔۔۔۔۔۔، ترا بلکیں پہ من ءَ زھیر نہ کنت، بلے من ءَ پہ تو سک زھیر کنت۔
بلے! اے گپّ ءَ ھال مہ دے کہ من گوں مات ءَ گِلّہ کنگ ءَ آں، تو منی پسّہ ءَ چی ءَ دَیگ ءَ نہ ئے، من گوں تو گپ کنگ ءَ آں۔۔۔۔۔۔۔؟؟
تو نوں چِد ءَ چِہ رپت ئے، منی کِسّہ انگت سرجم نہ اِنت، کمو بجل کہ ترا دگے لھتیں کلوہ دیاں پہ وتی ھم نپس ءَ، تو پسّہ بِہ دے۔۔۔۔۔۔
من ءَ سما بیت تو شُتگ ئے، اَو اڑے مھرل اے ھم شُت، نوں تو گوں کَے ءَ کُلوہ دیم دے ءُ پد ءَ تْرانگ ءَ کپت آں داں دِگہ یکّے ھستیں منی دومی نیمگ ءَ، بلے اے چو منی پیم ءَ بے توار ءُ ھِچّ نہ گْوش اِیت۔ برے برے چہ آئی ءِ کبر ءَ گریوگ ءِ توار کَیت، من جیڑاں کہ بوت کنت آ چہ من ءَ اُوں گنتریں، بلے من جُست کُت ئِے نہ کناں کہ آئی ءِ درد پاد کاینت ءُ آ وت دردیگ اِنت۔۔۔۔۔۔۔۔
یکروچے اناگت ءَ آئی ءَ من ءَ توار جت ءُ درّائینت، اُو بے نامیں مُردگ تئی نام کَے اِنت۔۔۔۔۔۔۔؟
من پسُہ دات تھنائیں مِھرل،
ءُ من ءَ گْوشت ئے کہ تھنائیں مِھرل پرچا۔۔۔۔۔۔۔؟
من گْوشت کہ من وَ تھنا آں۔۔۔۔۔۔۔
من ءَ گْوشت ئےکہ تو وَ تھنا ئے، بلے من وت ءَ گوں یات ءُ ترانگانی سانکلاں بستگ۔۔۔۔۔بلکیں تو برے برے منی توار ءَ سرپد بَہ ئے، ءُ من ھرچی کناں اے سانکل ھچ رنگ ءَ گوں من ءَ پچ کنگ نباں۔۔۔۔۔۔۔۔
تو بیا ناں اے سانکلاں پچ کن دے، من ھر کس ءَ کہ توار جناں تہ کس منی پسّو ءَ نہ دنت۔۔۔۔۔۔۔
من گْوشت منی سانکلاں کَے پچ کنت کہ من بیاھاں ءُ تئی سانکلاں پچ بہ کن آں۔۔۔۔۔۔۔۔۔۔؟؟
من اُوں چو تئی وڑ ءَ یات، ترانگ ءُ دردانی سانکلاں گوں بستگاں۔۔۔۔۔۔۔۔،من ءَ پنچ سال سرجم اِنت۔۔۔۔۔۔
اُپّ۔۔۔۔۔۔۔
من ءَ گْوشت ئے کہ تو چہ من ءَ اُوں گنتر ئے، بلے تو ھِچّ نہ گْوش ئے چی ءَ۔۔۔۔۔۔۔۔؟ تئی توار نئیت اِنت پرچا۔۔۔۔۔۔۔۔؟
من گْوشت من وَ سجھیں کبرستان دو کبرستان کُتگ۔۔۔۔۔۔۔
دوبر درّائینت ءُ گْوشت ئے، تو سک ھاموش ئے چی ءَ۔۔۔۔۔؟
کوکار کن، بگریھ، بلّے کہ تئی ترانگ کم بہ اَنت۔۔۔۔، من گْوشت اے یات ءُ ترانگ پہ گریوگ ءُ کوکار ءَ کم نہ بہ اَنت، من کہ ھر نیمگ ءَ بُرواں تہ ھر وڑ ءَ گوں من ءَ ھوار اَنت۔۔۔۔۔۔۔
من ترا گپّے بِہ گْوش آں۔۔۔۔۔۔۔؟
یک وھدے من سک گریت ءُ کوکار جت، بلے نوں دو سال بیت کہ من سک ھاموشاں ھچ توار نہ جن آں۔ بس تھنا نشتگ ءُ گوں وت ءَ گپ جناں، بس گوں تھنائی ءَ نِنداں ءُ دیوان کن آں۔۔۔۔۔
اِووو۔۔۔۔! تو منی گپ ءَ سرپد بُوَگ ءَ ئے۔۔۔۔۔۔۔۔۔؟
تو منی پسّو ءَ نہ دے۔۔۔۔۔۔۔۔؟
منی ھیالاں تو اُوں چداں چِہ در کپت ئے ءُ نوں تھنا پشت کپتاں من۔۔۔۔۔۔۔۔، منی تْرانگ۔۔۔۔۔۔۔، یات۔۔۔۔، درد۔۔۔۔۔، کتاب۔۔۔۔۔۔، تھنائی ءُ تھاری۔۔۔۔۔۔۔۔۔۔۔
***
