اِے راستی یے کہ بلوچ ءِ بازیں زندمان ءِ ھُدابُند گوں لسّھیں کارِستاں بندوک بوتگ ءُ داں رَوَگ ءَ پد مرچی ھم پہ شان ءُ شرپ زِندگ ءُ نمیران اَنت۔ وھدے کہ سیاہ ءُ تھاریں شپ وتی بانزلاں اِیر دنت ءُ پہ گورگیں سُھب ءِ اُمیت ءَ لُڈّان بیت، گُڑا ھاکمیں روچ وتی برانزاں مَکھیں گُلزمین ءِ دامُن ءَ اِیر دنت ءُ یک نوکیں کارِستے ءِ کلوھے شکسا اِیت، ءُ ھمے روچ ءِ سُھر ءُ زردیں برانزانی پُشت ءَ گُلزمین ءِ دلبند ءَ مِھلبیں ھون ءِ وشبو شِنگ ءُ آتار بَہ اَنت۔۔۔۔۔۔۔۔۔۔۔
گُڑا ھمے ساھتاں وڑ وڑیں ھیال ءُ تْرانگ وتی اَمبازاں زِیر اَنت ءُ بے تاھیری یے سَر کشّ اِیت، چہ ھمے بے تاھِیری ءَ پد جُستے ودی بیت، بلے اے جُست پہ بلوچ ءِ زِندمان ءَ نوکیں جُستے نہ اِنت۔۔۔۔۔۔۔۔
چہ ھمے ھوناکیں جاورانی تہ ءَ وھدے کہ گُلزمین ترا توار بِہ جنت کہ من بندیگ ءُ درآمدانی دست ءَ لگتمالاں، گُڑا اے ساھتاں سر ءِ جھل کنگ ءُ نِدارگ کنگ پہ ھانلیں سرڈگار ءِ شے مُریداں نہ بیت کہ وتی چاروچی ئیں زِند ءِ متاھاں گوں گِر ءُ چیلّ بِہ باں ءُ لَجوزیں دُژمن ءِ بیمّ ءَ وتی راجی گُلامی ءِ سانکلاں دست ءِ وت رَنگ بِہ کَن اَنت۔
چہ ھمے راجی شے مُریدانی تہ ءَ یک شیدائیں شے مُریدے باگیں کولواہ ءِ ھَند ماں شاپکول ءَ سرکشّ اِیت ءُ وتی راج ءُ بندیگیں سرڈگار ءِ مُرید جوڑ بیت۔ اے تمردیں راجی پُسّگ ءِ نام شھمیر بلوچ اَت کہ ما مُدام شے ءِ نام ءَ زانتگ اَت۔ اَگاں من کولواہ ءِ پدمنتگی ءِ کِسّھاں بِہ کن آں، اِے راستی یے کہ کولواہ اِیردستیں بلوچستان ءِ پدمنتگیں جاھاں گوں شُمار ءُ زانگ بیت، بلے کولواہ ءَ وتی راجی زُرمبشت ءِ ھاتر ءَ تِیوگیں پدمنتگی پُشت ءَ چَگل داتگ اَنت ءُ راجی لیکہ گوں مُھکمی ءَ پہ وت گِچین کُرتگ ءُ آجوئی ءِ گْراں بھائیں جُنز ءَ را تمردیں بَچّ بَکشاتگ۔ نَتُرسیں سَراں پہ وتی گُلزمین ءِ رکّینگ ءَ گوں مردی توکل ءَ جُنز ءِ بھر بوتگ اَنت ءُ گوں ھون ءِ گُڈّی تْرمپ ءَ چو شھمیریں سرانی وڑ ءَ وتی راج ءُ سرڈگار پھاز اِتگ ءُ دُژمن ءِ دیم ءَ گوں تلار بالادی ءَ مُھکم بوتگ اَنت۔
شھمیر بلوچ (شَے) دو ھزار دَہ ءَ ماں راجی آجوئی ءِ جُنز ءَ مار اِیت ءُ ھَوار بیت، اِے ھما وھد اِنت کہ راجی زُرمبشت ءَ وتی گام شرّیں وڑے ءَ کولواہ ءِ دَمک دَمک ءَ اِیر کُتگ اِت اَنت۔ شَھزانتیں رھشُون واجہ ڈاکٹر منان بلوچ ، چئیرمین خلیل بلوچ ءَ وتی راجی ڈُبّہ پیلو کنان ءَ وتی تَر ءُ تاب ما کولواہ ڈنڈار ءَ کُتگ اَت۔ اِے دو ھزار نُھ اَت کہ راجی رھشوناں یک مُچّی یے ماں ڈنڈار ءَ برجم داشت۔
من ھمے رُزمبشت ءِ ھمراہ اِت اِتاں کہ ھمے وھد ءَ من ءَ شھزانت ءُ بلوچ راج ءِ نمیرانیں سر واجہ ڈاکٹر منان بلوچ ءُ چئیرمین خلیل بلوچ ءِ دیدار ءِ شرپ رَستگ اَت، اِے ھبر پَمّنی بالاد ءَ مزنیں شَرپے اَت۔ وھد دیم ءَ رَوان اَت ءُ کولواہ ءِ سنگت گوں وتی راجی جُنز ءِ کاراں مُھکمی ءَ دیم ءَ جُنزان اَت اَنت۔ سرجمیں کولواہ ءَ آجوئی ءِ کلوہ گِس گِس ءَ سر اَت۔
شھمیر بلوچ (شَے) ھمے سنگتانی تَہ یک مُھکمیں جُھدکارے بیت ءُ وتی پَند ءُ شَپ ءُ روچی ئیں تَگ ءُ تاچاں ءُ راجی مَکسد ءِ سوبین بُوَگ ءِ ھاتر ءَ گون بیت۔ شھمیر (شے) وھدے کوزہ گیریں دُژمن ءِ گیشیں زُلم ءُ زوراں گِند اِیت، گُڑا چہ بلوچ نیشنل موومنٹ ءَ پد بلوچ راج ءِ سِلاھبندیں گَل بلوچستان نیشنل پَرنٹ ( بی اِل اِیپ) ءَ ھوار بیت ءُ وتی شپ روچی ئیں جُھد ءُ کُوشِستانی بَرورد ءَ گَل ءِ بازیں کاراں دیمروئی دنت ءُ دیم ءَ بارت۔
شھمیر بلوچ (شَے) جُھد ءِ ھوار بُوَگ ءَ بِہ گر داں شھیدی ءِ گُڈّی روچ ءَ گوں وتی پِگر ءَ مُھکم ءُ ایماندار بیت، لگوریں دُژمن ءِ ھلاپ ءَ بازیں سَنگراں نِند اِیت ءُ جنگ کنت ءُ آؤکیں ورناھاں پہ یک مُھکمیں اُوستے بیت ءُ گُڈّی پیگام ءَ پہ راج ءُ راجی ورناھاں وتی مِھلبیں ھوناں گوں دنت۔۔۔۔۔۔۔کہ گُلامی ءِ پُروش دَیگ ءِ ھاتر ءَ گوں راجی جُنز ءَ ھوار بُوَگی اِنت ءُ لگوریں دُژمن ءِ ھلاپ ءَ جنگ کنگی اِنت۔
اگاں ما بلوچ ءِ زِندمان ءِ رکّینگ ءِ جنگ ءَ وتی مہ کن اِیں ءُ ھوار مہ بَہ اِیں، اے جنگ ءَ الم دیم ءَ بَروک بیت، بلے ما وتی پَرز ءَ بے سَما مہ بَہ اِیں کہ اِے سر ڈگار مئیگ اِنت۔ اِے گْراں بَھائیں سرڈگار ءَ مارا پجّارے داتگ کہ ما مروچی گیدی ءِ دمکاں بلوچ ءِ نام ءَ پجّارگ ءُ زانگ بَہ اِیں، گُڑا اے ھمے بے مٹّیں ڈگار ءِ برکت اِنت۔
شھمیر بلوچ (شے) ھر وھد ءَ دُژمن ءِ پْروش دَیگ ءَ گوں وتی سنگتانی لَڑ ءَ گندگ بیت دانکہ زِندمان ءِ گُڈّی روچ ءَ گوں لَجوزیں دُژمن ءَ ڈِیک دنت ءُ یک ھونریچیں جنگے رُد اِیت، ھمے ھونریچیں جنگ ءَ شھمیریں شَے گوں وتی جنگولیں سنگتانی ھمراھی ءَ جنگ دنت ءُ دُژمن ءِ مزنیں سِپاھیگے مُردار کنت، ءُ شھمیریں شَے پہ مُدیمی راجدپتر ءِ ابدمان بیت۔۔۔۔۔۔۔۔۔۔
***
