بلوچ راج یک انچیں جاگھے ءَ زند گْوزینگ ءَ اِنت کہ مُدام تیر ءُ ٹوپانی دیمپان اِنت، بلوچستان ءِ ھر کُنڈ ءَ بچار بس بلوچانی جون اَنت کہ تالان اَنت۔ بے گناھیں ورناہ اَنت کہ گار ءُ بیگواہ اَنت ءُ چارراھانی سر ءَ پیرزال ءُ بانُکیں گْوھارانی ودارگیں چم اَنت دائمی راھچار اَنت۔ آ دگہ راج وتی زندمان ءَ بادشاہ اَنت ، بلے بزّگیں بلوچ دو وھد ءِ نان ءَ تلوس اَنت۔
بلوچ سرزمین ءِ سر ءَ اگاں کَسے وھد گْوازینگ ءَ اِنت ءُ آ بلوچے، گُڑا سُھب ءَ واب ءَ کہ بُست کنت یک نوکیں دردے ءَ گوں دُچار بیت۔ اگاں جْوانیں ڈولے ءَ بِچارے گُڑا مئے سرزمین دُنیا ءِ سِیر تریں سرزمین اِنت کہ مئے گْور ءَ ھر چیز وت ھست، ما دِگہ کسے ءِ مُھتاج نَہ اِیں۔ سرجمیں دُنیا ءِ چم مارا سَک اَنت، ءُ مارا وت ھُداوند ءَ گنجانی واجہ کتگ ءُ ما ھچ کَسی چمدار نہ اِیں، بلے مئے بدبھتی ھمیش اِنت کہ ما چہ اے دْراھیں مڈّیاں زِبھر اِنت۔۔۔۔۔۔۔۔۔۔۔
وھدے کہ بلوچ ءِ گْوست ءَ بِہ چارے گُڑا بلوچ مُدام جنگانی دیمپان بُوتگ ءُ بلوچ ءَ وتی زندمان ءَ آسُودگیں وھد نہ دیستگ، چی ءَ گُلامی آسودگیں زند ءَ پِلّک اِیت ءُ زندگی ءَ کھرستانے جوڑ کنت، پمشکا آجوئی ءِ جُھد پہ مئے گِلامیں زند ءِ ایرھت ءَ ھژدری اِنت۔
ما مُدام کُرآن ءِ تَہ ءَ اَزّرت مُوسا ءُ پِرھون ءِ کسّہ اِشکتگ کہ پِرھون سکیں ھُون واریں مردمے بیتگ، آئی ءَ مُدام گوں اَزّرت مُوسا ءَ جنگ کُتگ ءُ آ واجہ ھُدا ءِ ھُکم ءِ مَنّوگر نہ بُوتگ ءُ آئی ءَ واجہ ھُدا مُدام اِیر جتَگ ءُ رد گْوشتگ!
بلے ما بلوچ ءِ زندمان ءَ اگاں بِچار اِیں، اے وھد ءِ تُوک ءَ بلوچ ءِ سر ءَ ھم پِرھون دابیں یزیدے ھست کہ آ نہ بلوچ ءَ را آسُودگیں وابے ءِ مُوہ ءَ دنت ءُ ناکہ چُنڈے نانے، بلے کدی کدی مردم جیڑگ ءُ وڑ وڑیں پِگر کنت کہ بلوچ ءِ ھُون ءَ ریچگ اَنچوش آسان اِنت کہ ھر کَس بئیت ءُ بلوچ پرزنداں بِہ کُش اِیت ءُ جُوناں چگل بِہ دنت ، زاناں اے رستراناں وتارا چُک نیست کہ اے دِگہ راجانی پرواہ ءَ نہ کن اَنت، ءُ ھمے داب ءَ زان ءَ بلوچ انسان نہ اَنت کہ چُو جناور ءِ داب ءَ کُشگ ءُ دؤر دیگ بَہ اَنت۔۔۔۔۔۔۔۔۔
شپ ءَ وپس سُھب ءَ بُست کن، داں نوکیں ھالے شنگ اِتگ کہ پلان ھند ءُ جاہ ءَ بلوچ ورنایے ءِ تیر سُپتگیں جونے دست کپتگ ءُ پلان جاہ ءَ یکّے آوار جَنَگ بُوتگ، ھمیش اِنت بلوچ ءِ زندمان ءُ آئی درد چکاریں داستان،
پمشکا! بلوچ راج کموکیں ھمے بارو ءَ بِہ جیڑ اِیت کہ سَوَب چی اِنت کہ ما انچو بزّگ ءُ ایردست اِیں، زان ءَ مئے ھون ءِ ریچگ اَنچوش آسان اِنت کہ روچ پہ روچ چُشیں جیڑہ ودی بَہ اَنت، ھو داں ھما روچ ءَ آسان اِنت کہ ما گُنگ بوت اِیں ءُ ھِچّ نہ گْوشت، وھدے توار چِست ءُ دیم ءَ درکپت اِیں، گُڑا اے زُوراکیں پِرھون مئے آکبت ءَ تھار دیم کُرت نہ کنت، ءُ ما پہ دائِمی گُلام نہ بہ اِیں، پرے مارا گوں یکمُشتی ءَ راجی توار مُھکم کنگی اِنت ءُ دیم ءَ جُنزگی اِنت، چی ءَ کہ بید ء منزل ءِ نیمگ ءَ پند بُرّگ ءَ مارا رُژنائیں بانداتے دز نہ کپ اِیت۔۔۔۔۔۔۔۔
اگاں نا! اے جاور کہ مرچی چو ھوناکیں جمبر ءَ ساچان اَنت، گُڑا پہ دائِمی ساچان ءُ مئے باندات ءَ تھار دیم کنت، گھتر ھمیش اِنت کہ مارا مرچی درکپگی اِنت ءُ راجی پرز پیلو کنگی انت دانکہ باندا میاریگ مہ بہ اِیں ءُ راج ءِ دیم ءَ شِگانی۔۔۔۔۔۔۔۔۔۔۔۔۔۔
***
