ما کہ راجدپتر ءُ گْوستانک ءِ تاکدیماں لیٹینان کن اِیں، گُڑا کلاسیکل شیئر، اھدی داستان ءُ انوگیں نوبت ءِ شیئراں چہ مارا سمّو ءِ مستیں توکلی، ھانُل ءِ دِیوانگیں مُرید ، سسّی ءِ پُرنوریں پُنّو ءَ ھوار بازیں نامے پہ مھر ءِ درور ءَ دز کپ اِیت ءُ آیانی اِشک ءُ مھر ءِ کِسّواں کار اِیں کہ آ پہ وتی وپاھانی موکگ ءَ گوں زِند ءِ کُجام نگیگیں جاوراں دیم پہ دیم بوتگ اَنت۔۔۔۔۔۔۔۔۔۔
بلے! سرمچنڈیں نوبت ءِ تاکدیماں کہ لیٹینان کن اِیں ءُ وانان، مارا گوں مھلبیں ھاک ءَ وپا ءِ جتا جتائیں نام، جتا جتائیں گْواچن ءُ شیشاریں کارِست دز کپ اَنت۔۔۔۔۔۔۔۔
چہ ھمیشاں یکّے پیراں سال ماما ملنگ اِنت کہ ھوناکیں جاورانی مْیان ءَ پہ وتی ھانُلیں ڈگار ءِ موکگ ءَ اھد ءِ زُوراکیں لشکر ءَ گوں دیم پہ دیم بوتگ ءُ جنگ کُتگ دانکہ وتی ھون گُلزمین ءِ دامُن ءَ رِتکگ اَنت ءُ وپا ءِ پاسداری کُت۔
من ماما ملنگ کسانی ءَ وتی جِند ءِ ھنکین ءَ دیستگ کہ گاڑی یے گونے بوتگ ءُ میتگ پہ میتگ گشتگ ءُ کرز بھا کُرتگ ئے، بلے وھدے دو ھزار شانزدہ ءَ کہ کولواہ زِربار ءِ ھند ءُ میتگ مراستان ءَ دیست، چاراں گوں ھما سنگتانی کھولاں ھمراہ اِنت کہ آ ریاستی لشکر ءِ زُوراک ءُ زُورانسریاں چہ وتی ھند ءُ میتگاں لڈّ ءُ بار کُتگ ءُ باگیں کولواہ ءِ دمگ ءَ اتکگ اَنت۔
ھمے داب ءَ وھد دیم ءَ گام جنان اَت، ھرروچ گوں زُورگریں لشکر ءَ آجوئی ءِ جنگولانی جنگ برجاہ اَت۔ جاھے دُژمِن ءِ بشوشگ ءُ لدیگ جھندمی بُوَگ ءَ اِت اَنت، جاھے رستریں لشکر ءِ ھلک ءُ میتگاں بیڑ برگ ءُ زُوراکی ءِ ھال، جاھے پہ وتن ءِ پاسپانی ءَ راجی سرمچنڈانی نمیرانی ءِ ھال اَت۔۔۔۔۔۔۔۔
اے جُنز ھمے دْروشم ءَ گوں وتی تْرندیں گامگیجاں پند بُرّان اَت کہ یکروچے ما نِشتگ اِت اِیں سنگتاں سلام نور سلام ءِ گوں سنگتانی بارو ءَ شھیدی ءِ درگت ءَ ھبر بِندات کُت۔ سنگتے ءَ گْوشت نور سک ءَ شوکیں راجی جنگول ءُ مھروانیں سنگتے بوتگ، بلے من ابید چہ آئی ءِ شائِری ءَ نہ زانتگ اَت کہ نور کَے اِنت، ءُ کُجام میتگ ءِ نِندوک ئے۔ وھدے گوں سنگتاں شھید بوت، گُڑا نور ءِ ساپ ءُ سلّھیں کِردار منی چمّانی آدین بوت کہ نور چہ لبزانک دوستی ءُ شائِری ءَ ابید راجدوست ءُ راجی آجوئی ءِ جنگولے ھم بوتگ۔
ما سنگت ھمے گپّ گپّ ءِ تہ ءَ اِت اِیں کہ ھالے رسانکدر ءَ شِنگ ءُ تالان بوت کہ ھوشاپ ءُ تِجابان ءِ کوھی دمگ ساتک کَور ءَ لشکر ءِ لشکرکشّی برجاہ ءُ لھتیں سنگت ءِ شھیدی ءِ ھم ناوشیں ھالے۔۔۔۔۔۔۔۔۔۔۔۔۔، من ھمے جیڑ اِت کہ سنگتانی شھیدی ءِ ھال شالا دُروگے بات، بلے منی ایردستیں راج ءِ راجپان گوں دُژمِن ءَ کہ جنگے ءِ دیمپان اَنت، اے شھیدی الم بیت ءُ دیمونی دَیَگ ھژدری اِنت، پمشکا مارا پہ دیمونی ءِ دَیَگ ءَ ھر گام ءَ ساڑی ءُ جاڑی بُوَگی اِنت، بلے بازیں سنگتانی یکجاہ شھید بُوَگ الم تورناک اِنت۔۔۔۔۔۔۔۔۔
دومی سُھب ءِ سر ءَ ما پد ءَ گوں یکّے دومی ءَ ھمے گپّ ءُ ھبراں مُلمہ اِت اِیں کہ ھال اتک ماسٹر آسِپ ءُ زھیر جاڑو گوں دہ سنگتانی ھواری ءَ پہ ماتیں وتن ءِ پاسپانی ءَ نمیران بوتگ اَنت۔
ساھتے ءَ رند ھال شِنگ اِت کہ ھمے سنگتانی تہ ءَ پیراں سال ءُ بلوچ راج ءِ کُنگُریں پُسّگ ماما ملنگ ھم پہ وتن ءِ پانک جنی ءَ ابدمان بوتگ۔
من کہ سنگت ءَ را پول کُت، ماما ملنگ کَے اِنت۔۔۔۔۔۔۔؟؟
سنگت ءَ ھون میچلیں اکس منی سر ءَ دیم دات کہ من پجّا نیاؤرت، پمشکا دُبر جُست کُت، یار من ماما ملنگ ءَ زانگ ءَ نہ آں۔۔۔۔۔۔۔۔۔؟؟
چہ منی دُبر جُست کنگ ءَ پد دومی سنگت ءَ انچو پہ چِست ءُ چابُک ءَ دِرّائینت، ماما ملنگ ھمیش اِنت کہ مئے شُمئے ھند ءَگاڑی یے گونے بوتگ ءُ کرز بھا کُرتگ ئے۔۔۔۔۔
اُو۔۔۔!! اَنوں پہ گُلزمین ءِ پانپاہی ءَ ندْریگ بوتگیں بیلی ماما ھمے ملنگ اِنت۔۔۔۔۔؟
سنگت ءَ پہ بچکند گْوشت: ھو! ماما ھمے ملنگ اِنت، چی ءَ زان ءَ۔۔۔۔۔۔؟؟
یار دِگہ ھبر نیست! بس اے کماش ءِ کوھیں توکل ءَ بے کِساس سُھریں سلام ءُ دْروت۔۔۔۔۔۔۔۔، چی ءَ کہ اے زُلم ءُ زُوراکی، تْرندیں بیھار ءُ پادتراپ، تڑ ءُ تیلانک، جنگی جاورانی تہ ءَ باز نام گِپتیں سرمچار ءُ راجدوستاں وتی کَول ءُ سوگِند، گوں ماتیں سرڈگار ءَ اھد ءُ پیمان ءِ سر سِستگ ءُ دُژمِن ءِ پادانی دیم ءَ سر اِش جھل کُتگ، بلے ماما ملنگ ءِ کوھیں بالاد ءَ دُژمِن جکسّینت ءُ پہ مُجّتی ابدمان بوت۔
پہ اے دابیں سراں ند ءِ زُبان گُنگ بیت، چی ءَ کہ ماما پہ ھما ورناھاں درونتے آ چہ راجی جُنز ءَ دُور ءُ سرپد اَنت۔۔۔۔، ھرّو بے شرپی ءِ آماچ۔۔۔۔۔۔۔۔، بلے انگت سما واگ نہ بُج اَنت ءُ بے سما اَنت۔ پمشکا مارا زانگ ءُ پھمگی اِنت کہ ماما ملنگ کَے اِنت، ءُ آئی ھونانی ملپداں پند بُرّگ مارا کُجام دمک ءَ سر کنت۔۔۔۔۔۔۔۔۔۔
زِندگی کندیل شُناسیں بالُویے
پہ بلگ اُومان کنت ءُ سنگریت
***
