ماھلیں مات ءِ یکّوئیں بچّ!
کماش ءِ اُوست ءُ پِیری ءِ اَسّا!
گْوھارانی لجّ پانپا ءُ اُمیت ءِ ھونکّیں ساھگ!
زال ءِ لکّی ئیں واھگ ءُ ارمانانی ھساریں سنگر!
راج ءِ سرمچنڈ ءُ جنگولیں جنگی جان ( اِیسّا )!
اے جنگ ءَ تو اُوں گوں وتی راجپانیں بیلانی ھمراھی ءَ ورنائی ءِ سھاریں سُھب ءُ چاڑ مینتگیں بیگاہ، رولہ جلشکیں دِیگر ءُ روزرد، ماھِکانیں شپ ءِ نازینک ءُ اِستالانی لیلو، ھزّامیں واھشتانی گْواڑگیں آپریچ، سارتیں سمین ءِ ھیر بوئیں شیکّگانی زیمریں چِڑکّہ پہ راج ءِ پاسپانی ءَ کولیگ کُت اَنت داں باندا اے ھبر چو البُرز ءُ گِردانک ( گِرادانک:- کولواہ زِرباری دمگ ءَ بُرز ءُ بُلندیں کوھے ءِ نام اِنت ) ءِ کوہ ءَ چیدگ بِہ بیت کہ پہ راج ءِ مُرادانی واستا مُرادیگیں روچانی دیمونی ءِ دَیَگ چی یے۔۔۔۔۔۔۔۔؟؟
جنگی جان ( اِیسّا)!
تو الم جسمانی دْروشم ءَ چہ نِگاھاں رپتگ ئے، بلے پِگرانی دمکاں مُدام گِندگ بَہ ئے۔ ھما سارت ءُ زِمستانیں شپ تو گوں مکھیں مات ءِ ھمراھی ءَ گوں من ءَ۔۔۔۔۔۔۔نادْرھجاہ ءَ گْوازینت، آ سارتیں شپ ءُ نادْرھجاہ ءِ جاک ءُ جلل مرچی منی دیم ءَ سھرا ءُ وتی پُولگ ءِ شوھاز ءَ سرگردان، بلے منی کِرّ ءَ ابید ء یکّیں پسّو ءَ دِگہ ھِچّ نیست۔۔۔۔۔۔۔۔۔۔۔
ھو! تو پہ ماتیں گُلزمین ءِ موکگ ءُ آجوئی ءَ رپت ئے، تو اے نہ چار اِت کہ من مات ءُ پِت ءِ یکّوئیں بچّ، لاڑیں گْوھارانی لاڑُک ءُ تنگھیں برات، لوگبانُک ءِ پُر مھریں زِندمان ءِ ھزار اُمیتیں واھگانی بامسار۔۔۔۔۔۔!
بلکیں تو وت ءَ ماتیں گُلزمین ءُ بلوچ راج ءِ تنگوئیں پُسّگ زانت ءُ کولیگ بوت ئے۔۔۔۔۔۔۔۔۔۔۔۔
بلے! پہ تئی کھول ءَ تئی پُرکّیں زھیر، بے تاھِیریں تْرانگ ءُ تھتال پہ مُجّتی مان اَنت، چی ءَ کہ تئی پُرکّیں زھیر، بے تاھِیریں تْرانگ ءُ تھتال ءِ درمان آجوئی اِنت۔ ءُ آجوئی ھما بے مُلّیں مکسد اِنت کہ تئی ھمراھی ءَ ھزاراں ورنا ھرروچ پہ ماتیں سرڈگار ءِ پانپاہی ءِ جنگ ءَ نمیران بُوَگ ءَ اَنت۔ نمیراں، ندْر ءُ کولیگ پرے ھاتِر ءَ بُوَگ ءَ اَنت داں ما وتی زیرزندیں راج ءَ چہ گُلامی ءِ آپت ءَ بِہ رکّین اِیں ءُ آجو بِہ کن اِیں۔۔۔۔۔۔۔۔
ھمے واھگ ءُ ارمان ءِ پُژدر ءَ!
تو چہ لگور ءُ پدکِنِزگ ءِ بدل ءَ گوں کماشیں ماما ملنگ ءُ پُلیں سنگتانی ھمراھی ءَ سالونکیں سر بائینت ءُ وت ءَ گْوستانک ءِ تاکانی باھوٹ ءُ ابدمانیں کارِستے کُت، ھما ھونانی دْرد کہ تو گوں شیدائیں سرڈگار ءِ بچّاں گُلزمین ءِ شیشاریں دامُن ءُ دِلبند ءَ شلینتگ اَنت، آ ھونانی مُزّ راجی آجوئی اِنت۔ ابید آجوئی ءَ سرانی رون بیت ءُ ھونانی شھکور تچ اَنت، بلے پدکِنِزگ ءُ سرجھل کنگ نہ بیت۔ اے منّانک تو گوں دہ راجی آجوئی ءِ جنگولیں پُسّگاں پیشداشت ءُ مارا شون دات کہ راجی سیت ءُ نپّانی دیم ءَ ادارُکی واھشتانی شیپ ھار نہ کنت۔
مرچی بازیں راجدْرو راجی آجوئی ءِ بگیر ءَ دُژمِن ءِ چانٹ ءِ دپ ءَ نِشتگ ءُ پہ وتی چرپیں دپار ءُ کچکول ءِ پُر کنگ ءَ چاڑِکّہ اَنت، بلے راجدپتر ھر یکّے ءَ گوں وتی کِردار ءُ کارپداں یات کنت ءُ گیر کار اِیت۔
مرچی ھما کہ راجپانی ءِ جنگ ءَ ٹیسریں تیراں وتی ڈوبر ءُ کوھیں بالاد ءَ جاہ دَیَگ ءَ اَنت، ھما بالاد باندا ابدمان ءُ مُجّتی ئیں زِند ءِ مھکان چکّیں کارِست ءُ مکتبانی درونت بَہ اَنت۔۔۔۔۔۔۔۔۔۔۔۔۔۔۔
جنگی جان ( اِیسّا )!
مرچی تئی ماھلیں مات ءُ لاڑُکیں گْوھار الم تئی گِستائی ءِ گم ءَ مار اَنت ءُ پُرکّیں زھیر، تھتال ءُ تْرانگانی دیمپان ءُ ترا مُدام گیر کار اَنت، بلے تئی ءُ ماتیں گُلزمین ءِ پانپاہی ءَ ندْر بوتگیں پُسّگانی ھونانی مُزّ آجوئی اِنت، ءُ ھمے آجوئی باندا تئی ماھلیں مات ءُ لاڑُکیں گْوھارانی آراپیں زیم، درد ءُ دوراں ساٹ اِیت ءُ مُدیمی ئیں اِیمنی یے شکسا اِیت۔
چی ءَ کہ تو پہ راج ءِ مُدیمی ئیں اِیمنی ءَ وتی سر ءُ ارواہ گوں جنگولیں سنگتاں بکشاتگ، پمشکا شُمئے دابیں سرانی شموشگ وتی جِند ءُ آکبت ءِ شموشگ اِنت۔ اے راجدپتر ءُ گْوستانکی راستی یے کہ کُجام راج چہ وتی دیمونی داتگیں سراں شمشکار بوت، گُڑا آ آستے آستے وت ءَ ، ءُ وتی راجی آکبت ءَ شموشاں کنت۔
بَہ کَول ء واجہ سُکرات کہ جاھے گْوش اِیت: ” اگاں چہ آزمان ءَ آجوئی ءِ ھَور بِہ بیت، گُڑا گُلامی پسند چَتری ( چَتر Chatr/ Umbrella ) زُور اَنت ءُ در کپ اَنت” ۔
گُڑا تو پہ سِتک بِہ زان کہ چُوشیں راج وتی تاوان ءُ ابدی ئیں گُلامی ءِ زِمہ وار وت اَنت، بلے مرچی بلوچ راج ءِ ورناھاں سما کُتگ کہ تئی داب ءَ پہ سرانی کولیگی ءَ چک ءُ پد نیاں۔ دُژمِن ءِ سر ءَ پِدائیگیں اُرش کنگ ءِ واستا ھر ساھت ءُ دمان چاڑکّہ اَنت، گُڑا من پہ جزم گْوش آں کہ ریاست پاکستان مارا پہ دائِمی گُلام داشت نہ کنت، ناکہ گوں ھوناں سیراپ کُتگیں ڈگار ءِ سر ءَ جل اِت کنت۔
بلے! مارا جیڑگی اِنت کہ اے کُنٹگ چکاریں دگ ءَ گوں تِپاکی ءَ جُنزگ ءِ چے سیت ءُ نپّ۔۔۔۔۔؟ یکمُشتی ءَ گوں ما جُھد ءَ چینچو مُھکم ءُ دُژمِن ءَ چتور تاوان دے اِیں۔۔۔۔۔۔؟اگاں نا چو بے شِپانکیں رمگ ءَ ما شِنگ ءُ شانگ بِہ بَہ اِیں ءُ دیم ءَ پہ رُنگراھاں بِہ دے اِیں، گُڑا سوب گوں شکّلیں سیتاں نہ بیت، بلکیں تاوان۔۔۔۔۔۔۔۔۔
چی ءَ کہ مرچی جھانی راجدپتر ءُ آئی جنگانی گْوستانک مئے شُمئے کُلانی دیم ءَ چو پچیں کِتابے ءَ اِیر اِنت پہ وانگ ءَ، ءُ دومی روس ءُ یوکرائین ءِ برجاھیں جنگ۔۔۔۔۔۔۔۔۔۔۔۔۔
گُڑا وھد چہ مارا کُجام لوٹ ءَ کنگ ءَ اِنت کہ مارا پیلو کنگی اِنت، بلے پیلو بُوَگ ءَ نہ اِنت۔۔۔۔۔۔۔۔؟؟
جھان ءِ اے نگیگیں جاور مارا شِنگ ءُ شانگی ءِ درونت ءَ وانینگ ءَ اِنت، یا یکمُشت ءُ تِپاکی ءِ۔۔۔۔۔۔۔۔؟؟
اگاں یکمُشت ءُ تِپاکی ءِ درونت ءَ دَیَگ ءَ اِنت، گُڑا ما پرچا پہ یکمُشت ءُ تِپاکی ءَ دیم ءِ جُنزگ ءَ ساجو ءُ جاڑِیگ نہ اِیں۔۔۔۔۔۔۔۔۔۔؟؟
ھمے داب ءَ!
آ کُجام نادْراھی اِنت کہ مئے یکمُشت ءُ تِپاکی ءِ مْیانجی ءَ اڑاند اِنت، ءُ آئی ءِ دارُو ءُ درمان، اِلاج چی اِنت۔۔۔۔۔۔۔۔؟؟
اے تیوگیں جُستانی پہ پسّو کنگ ءَ راج ءِ ورنا ءُ جنگولیں سر ھرروچ جنگ ءِ پِڑ ءَ ندْر ءُ کولیگ بُوَگ ءَ اَنت، بلے ما انگت گوں وتی جِند ءِ گْواز کنگ ءَ گُلائیش ءُ مُلمہ اِیں، پرچا۔۔۔۔۔۔۔؟؟
اگاں ما اے جُستانی پسّو کنگ ءَ دلگوش گْور کُت ءُ چہ وت ءَ گیش راجی جُنز ءِ سیت ءُ نپّانی بابت ءَ جیڑ اِت ءُ پہ اَمَلی گامگیج ءِ زُورگ ءَ لپرزگو نہ بوت اِیں، گُڑا دُژمِن سر ءَ ماں آکوٹے ءَ کشّ اِیت ءُ پہ مُدامی بے سوب بیت۔ اگاں نا! مارا سما گْور بِہ بیت کہ دُژمِن مئے سرڈگار ءِ سر ءَ بنگلہ دیش ءِ داستان ءِ ساچگ ءَ ساجو اِنت، گُڑا باندا رند ءِ اِٹ اڑے ھِچّ درد ءِ درمان نہ بیت، گھتر ھمیش اِنت کہ ما مرچی سما بِہ کن اِیں، چی ءَ کہ بلوچ راج ءِ ورنا پہ سرانی کولیگ ءُ کُربان کنگ ءَ ھر ساھت ءُ دمان جاڑی اَنت۔ بس ما ءُ شُما وت ءَ تچک بِہ کن اِیں ءُ داتگیں دیمونیانی ارزِشت ءَ بِہ زان اِیں، چی ءَ کہ اے ورناھاں سر ماں پِدائی کنگ ءَ کشّ اِتگ، گُڑا اِیشانی دیم ءَ دُگنیا ءُ پاکستان ءِ وڑیں وتگڑیں ریاست ھِچّ رنگ ءَ داشت نہ کنت۔ بس! تِپاکی ءُ یکمُشتی، گوں مُھکمیں پیشبندیاں( پالیسیاں)۔۔۔۔۔۔۔۔۔
***
