کَساب رَھن ءُ کارچانی بْرھنگی سِتر اِت اَنت ، آپ وتی بے رنگی ءَ مانپوشان اَت. کس ءَ گُمان نَہ کُت رھنیں کساب کارچانی الماسیں زِھاں پد ءَ بْرھنگ کن اَنت ءُ سَمین ءِ کَوش ءَ مَکّیں گوشتانی بُوھاں آتار اَنت ، ءُ پد ءَ موسماں ھزین اَنت ۔
کسابانی گُربگّیں نِیّت وتی زِندمان ءِ واھگانی اَرداچ کنگ ءَ اُوں چَکّی نَہ بنت۔. گِسدگْوار ءِ کُجام اِلّت ڈُکُال ءِ نیمونانی گْواچناں چہ کودگاں موک اِیت ءُ بِہ اَشکام اِیت. چراگ وتی باتِن ءِ آزگیں ٹپّاں گوں وانِکیں شپانی سُلّارتگیں کِسّھاں تیمارگ ءَ اِت اَنت. پمیشکا شپ ءِ سْیاھی ءَ چمّاں وت ءَ چراگ پوشتگ اَت ۔چمّ گوں تماشھاں بے وانک اَت اَنت ۔ مارا سما نیست اَت کہ ما گوں انچیں آدینکے ءَ دُچار کپ اِیں ابید مئے نیش ءُ ھیباں دِگہ ھِچّ در ءَ نہ بیت۔۔ مارا ھَمُک سُھب وتی زندمان ءِ ریپنگ ءَ ھیال نوک کنگی اَت. پہ جیڑگ آسر بہ بیت اے نِدارگ کُجام ھیالانی شھرگ اَت . بازار ءِ دمک ءُ در گوں کِسّھانی گُنگی ءَ سر ءُ چیر اِت اَنت ۔۔۔۔ شپ ھما چراگانی میچنتگیں سباہ ءِ رِلّی ءُ گردوانی سر ءَ تلگ ءِ مُرادان اَنت کہ روچ ءَ گوں زیبائی ءِ بْرانزاں نازینگ ءَ اَت . اد ءَ ھر کس پہ مھّر رُستگ ، بلے زندمان انگت ایوک ءَ گْوازینگی اَت گوں جند ءَ گوں ساھگ ءَ ۔ ایوکی وتی داب ءَ وت ءَ وت پیچان اَت ءُ وتی مھرم وت اَت۔
دِگہ یک اکسے ءِ تہ ءَ دو گونڈو ءِ نِدارگ اَت۔
آیائی لیبجاہ ءِ پْرشتگیں دُتُّک ءِ دست ءِ کندیل ءِ مِرمِرانکیں رُژن اَت۔
کہ زندمانی ءِ دْروشم ءَ سَھرا کنگ ءَ اَت …..اِد ءَ ھما کس زندگ مان اِیت کہ آ موسمانی رپکاں سرپد ءُ وتی اُمر ءِ توشگے گون …وتی مانش ءِ لُنج ءُ سنگ مھرمانی بِستار ءَ زانت ۔ آئی ابدمان ءِ چیدگ اِد ءِ ساھگاں چہ گستا اِنت۔ھمے اکس ءِ کارِست گوں من گپ ءَ اِت اَنت ۔ وتی جاورھال ءَ درنگازگ ءَ اِت اَنت ۔ دِگہ اکسے ءِ توک ءَ ھر دُوکیں گونڈواں دُتُّک ءِ دُراھیں نیمگ ءَپُلّ کَل کُتگ اَت ۔پُلّاں چہ جَھل تلکاریں میٹ ایر اَت ءُ یک لکیرے پہ بد ڈول کش اِتگ اَت ءُ گْوش ئے آ وت ماں وت گَپ ءَ اِت اَنت ءُ من تواران اِش کنگ ءَ اِت آں ۔ کہ آ گْوشگ ءَ اَت اے شھر ءِ براہ اِنت ، نوں ابیتک اِنت۔۔۔۔۔۔۔ اد ءَ ما وتی چم جنازہ داتگ اَنت۔ پہ وتی رھن کنگ ءَ وتی موجری بْرھنگ کتگ۔ اِد ءِ مردُم بے سما اَنت چہ وتی گْوست ءُ باندات ءَ ۔۔۔۔۔نہ جیڑ اَنت. بس! مرچی چے پیم ءَ گْوز اِیت ، چے پیم ءَ گْوازینگی اِنت، من کہ سما کُت ۔۔۔۔۔
من اَکسانی نْیام ءَ زندگ اِت آں .
