بابُل لطیف
تیرماھیں شپ ءُ لیڑھانی دِریپگ اَت ، مچکدگ بانکلینک ءُ میسکپُلّاں آتار اِتگ اَت۔۔۔۔۔۔۔۔۔
جَوہ ءُ گندیمانی سبزکیں بالاد ءَ جُوپاگ ءِ زیبائی وتی کوار ءَ کماتگ اَت ءُ دِھکان آپبندگ ءَ گُلائیش اِت اَنت۔۔۔۔۔۔۔۔۔
من وتی گندلانی سر ءَ سر کہ سرجاہ ءِ کُوپگ ءَ اِیر کُتگ اَت واب ءَ وتی واگ بُتکگ اَت ءُ چمّانی دریگ ءَ ھیالانی شمال ءَ مان بستگ اَت۔۔۔۔۔۔۔۔۔۔زِرد ءِ دَر ءَ ژامبلینگ ءَ اَت۔۔۔۔۔۔۔۔۔۔۔۔۔۔۔۔
دانکہ نھنگام ءَ من پہ واب ءِ امبازگ ءَ وتی وس ءُ واک ءَ وت ءَ اُبینگ کُت ، بلے واب چہ منی دیدگانی ھنکین ءَ ھز اِتگ اَت۔۔۔۔۔۔۔
گیشیں جیڑگ جیڑگ ءَ دِل ءَ ھُلّ کُت بُرو کرگین ءَ کندیل ءَ روک کن ءُ کاگدے سیاہ کن ۔ من دِل ءِ ھبر زُرت ءُ کرگین ءَ پُتِرت آں۔۔۔۔۔۔۔۔۔
باکس زُرت ءُ دْرتکگیں کندیل روک کُت ، چہ برونک ءِ چیر ءَ وانگی کش اِت آں ءُ تاکے گوں ند ءَ زُرت ءُ کندیل ءِ کش ءَ نِشت آں کہ چیزّے نبشتگ بِہ کن آں۔۔۔۔۔۔۔۔۔۔۔۔۔۔
ھمے نبشتگ کنگ ءِ نیمون ءَ ھیال ءُ لیکہ ، جیڑگ ءُ مارِشت ءِ دگ ءَ دو شانک کش اِت۔۔۔۔۔۔۔۔۔
"ساھریں نِگاھانی ھُدابُند ” ءُ ” نیزگاری ءِ تبدیں ساھگ ” ، من باز جُھد ءُ کُوشست کُت کہ وت ءَ چرئے جیڑھاں بِہ گیشن آں ءُ دگ یکّے بِہ بیت ، بلے کِشک راہ بُرّگ ءَ نہ اَت۔۔۔۔۔۔۔
ھمے جیڑگ جیڑگ ءِ مْیان ءَ من وت ءَ کندیل ءِ کش ءَ تِکّو دات ءُ ند ءُ وانگی کونڈ ءِ سر ءَ اِیر کُت اَنت ماں ھیالانی گیابان ءَ ویل بوت آں۔۔۔۔۔۔۔۔
ھمے دمان ءَ من ءَ سما نہ کپت من چتور واب کپت آں کہ مات ءِ گْوانک ءُ توار ءَ من ءَ جھ سرّینت۔۔۔۔۔۔۔۔
من کہ بُست کُت چاراں بام ءَ داتگ ءُ مات ءَ پہ چاہ ءَ کرہ پِر کُتگ ءُ آس جمبول اِنت ، منی بُست کنگ ءَ ھوار مات ءَ دِرّاھینت منی بچّ ترا ھیر اِنت تو گِس ءَ بتّی روک کُتگ ءُ نِشتگ ئے۔۔۔۔۔۔۔۔
من گاسگ گاسگ ءِ تہ ءَ مات ءِ پسّو ترّینت ءُ گْوشت ھو ماتی! ھیر اِنت ۔ من دوشی وتی ماشٹر ءِ داتگیں سبکّ نبشتگ کُتگ ءُ کمّیں کندیل ءِ کش ءَ تِکّو بوتگ آں کہ واب کپتگ آں۔۔۔۔۔۔۔۔۔۔۔دِگہ ھَیر اِنت۔۔۔۔۔۔۔۔۔
گوں منی اے گپ ءِ ھلاسی ءَ ھوار مات ءَ گْوشت مرچی آدینگ ءِ روچ اِنت شُمئے چُٹّی اِنت ، پادا کُوپے چاہ بور ءُ برونک ءِ دیم ءَ تئی نپاد تالان اَنت کمّیں تچک بُو۔۔۔۔۔۔۔۔۔
من گْوشت ماتی چاہ دِل نئیت من رو آں وپس آں۔۔۔۔۔۔۔۔۔۔
من کہ نپادانی سر ءَ تچک بوت آں ءُ سر ماں بالشت ءِ سر ءَ اِیر کُت ، پد ءَ دگ ءِ دوھیں شانکاں من ءَ امباز اِت ءُ ھیالانی گیابان ءَ بُرت۔۔۔۔۔۔۔۔۔۔۔
من پہ دِل ءِ سھڑینگ ءَ چم بند کُت اَنت بلے واب گْوشگ ءَ اَت منی کِرّ ءَ میا۔۔۔۔۔۔۔۔
بس دیدگانی آتراپ ءَ دگ ءِ دوھیں شانکاں ” ساھریں نِگاھانی ھُدابُند ” ءُ ” نیزگاری ءِ تبدیں ساھگ ” گوں وتی زیبائی ءُ ملوری ءَ جیڑگانی سر شِنگینتگ اَت۔۔۔۔۔۔۔۔۔۔
کلاکے ءَ بُرز من گوں ھمے ھیالاں گِر ءُ چیل اِت آں کہ گُلناز ءِ مات مئے کرگین ءَ پُتِرت ءُ گوں مات ءَ دست ءُ دْروت بوت ۔گُلناز بی بی گُل ءِ دزگْوھار ءُ منی مکتب ءِ ھم تبکّ اَت ، بی بی گل چہ مارا یک تبکّے دیم ءَ وانگ ءَ اَت۔۔۔۔۔۔۔۔۔۔
منی ساھریں نِگاھانی ھُدابُند بی بی گُل اَت ، اے گپ ءَ تھنا میتگ ءِ تہ ءَ گُلناز سرپد اَت کہ منی ءُ بی بی گُل ءِ مْیان ءَ مھرانی جھانے وت ءَ سمبرینگ لوٹ اِیت۔۔۔۔۔۔۔۔۔
بلے وھد ءِ ھمراھی ءَ من ءَ ازگاری ءِ دامُن ءَ نیزگاری ءِ چَولاں انچو پتات ءُ لیپگ کُت کہ سر گوں سواساں پِر نہ بوت۔۔۔۔۔۔۔۔
گُڑا اے ھبر ءَ من ءَ مُدام چُنڈُک پاتک کہ ماشٹر کمالان پرچا مُدام گْوشتگ شُما ازگاریں ڈگار ئِے ءِ واھُند اِت ، بِہ وان اِت ءُ وتی سرڈگار ءَ چہ بدواھاں موک اِت ، اگاں نا باندا بے نام بَہ اِت۔۔۔۔۔۔۔۔۔۔۔
بلے پہ گْواچن ءُ راستی من ءَ اے ھبر ءِ مارِشت ھما روچ ءَ بوت کہ منی نیزگاری ءِ سَوَب ءَ بی بی گُل ءِ سُھریں بشانگ مِکّ بوت ءُ چاپانی توار ءَ تانسریں میتگ جکسّینت ، شاھُو ءِ پاد چہ گَل ءَ زمین ءَ دْرنگ اِت اَنت ءُ وشیانی زِر ءَ اُوژناگ اَت ۔ منی تلکاریں لُنٹانی سر ءَ گیمُرتگیں بچکندے ھم پہ سْرپگ ءَ گِندگ نہ بوت۔۔۔۔۔۔۔۔۔
چی ءَ کہ ناکو شھداد ءَ منی ھمراھی ءَ وتی لاڑیں جَنِکّ بی بی گُل ءِ زِرد ءِ ارمان ءُ زِند گْوازینگ ءِ واھِشتانی دیم ءَ مال ءُ متاہ ءِ دِیوال مِکّ کُت ، نے اے چارت کہ من آئی برات دِلدار ءِ بچّ آں ، نا آئی ءَ بی بی گُل ءِ مھرانی سمبھینتگیں مھرانی کلات چارت۔۔۔۔۔۔۔۔۔۔
گُڑا مُدام ھمے ھیال من ءَ مجگاں چو رِمیز ءَ وران اَت ءُ نیزگاری ءِ تبدیں ساھگ ءَ مانپُوشتگ اَت کہ اے نیزگاری ءِ بدّیں اِلّت ءِ درمان چی اِنت۔۔۔۔۔۔۔۔۔۔؟؟؟
ھمے راز ءِ پُولگ ءَ ماشٹر کمالان ءِ گْوشتگیں دانک ءَ ھر رھسر ءُ چارراہ ءَ من ءَ گْوانک جت ءُ وتی اکس پیشداشت ، بلے پہ منی نِزوُر ءُ بے دانیں بالاد ءَ اکس ءِ رنگانی پھمگ اِنچو ارزان نہ اَت۔۔۔۔۔۔۔
وھد وتی سُبکّیں گاماں دیم ءَ شھار دیان اَت کہ بیگاھے منی سر ناکُو دِلوش ءِ دُکّان ءِ نیمگ ءَ کپت ، چہ دُور ءَ چاراں دُکّان ءِ دیم ءَ مزنیں مُچّی یے جُمب اِتگ۔۔۔۔۔۔۔۔۔۔
من اول اجکّا بوت آں ءُ پد ءَ وتی گام گُشاد گُشاد ءَ شھار دات اَنت دیم پہ مُچّی ءَ ، وھدے مُچّی ءِ گْور ءَ سر بوت آں چاراں لاگریں ورناھے تگرد ءِ سر ءَ نِشتگ ءُ گپّ ءَ اِنت دیوان ءَ پہ دِلجمی وتی گُوش سْراپینتگ اَنت ۔ من ھم پہ دِلجمی مُچّی ءِ ھواری ءَ گُوش سْراپنت آں ءُ لاگریں ورنا ءِ گوھریں دانکانی گُوشدارگ ءَ مُلمہ بوت آں۔۔۔۔۔۔۔
لاگریں ورنا گْوشگ ءَ اَت اگاں ما وتی ماتیں وتن ءِ پھازگ ءَ بے سوب بِہ بَہ اِیں گُڑا پہ ما اے دُگنیا ءَ ھِچّ پش نہ کپ اِیت کہ مئے درداں ساٹ بِہ کنت ۔ گھ ھمیش اِنت مرچی پاد بِیا اِیں ءُ وتی کبلہ ءَ تچک بِہ کن اِیں دانکہ باندا وتی پُسّگ ءُ آیوکیں پدریچ ءِ دیم ءَ سرجھل ءُ میاریگ مہ بَہ اِیں ، اگاں ما مرچی اے نگیگیں جاور ءُ بدّیں ساھتانی دیمپانی ءَ جاڑِیگ بوت اِیں گُڑا اے نوبت پہ ما کدی نئیت کہ ما راجدپتر ءِ تاکدیماں رُزوا ءُ آیوکیں پدریچ مارا پِٹّ ءُ لانت بِہ کنت۔۔۔۔۔۔۔۔۔۔۔۔۔
بِیا اِت ما ءُ شُما ھمدست ءُ ھم سنّتی ءَ دیم پہ سُھر دپیں بانگْواہ ءَ جُنزان بَہ اِیں دانکہ مئے گُلام ءُ اِیردستیں راج چو ھما آجوئیں راجانی داب ءَ وتی آمِل ءِ آپبنداں ، وتی زیبائیں ڈگار ءِ دامُن ءَ وشھال ءُ شاتمانیں زندے بِہ گْوازینیت۔۔۔۔۔۔۔۔۔۔
چرئے گپّانی ھلاسی ءَ پد میتگ ءِ بازیں ورناھاں پہ راجی جُنز ءِ دیم ءَ برگ ءَ جار پِرّینت ءُ گوں بی ایس او ءَ ھوار بُوَگ ءِ اھد ءُ پیمان کُت کہ ما ھم تئی ھمراھی ءَ پہ وتی بزّگ ءُ اِیردستیں راج ءِ آجوئی ءَ جُھد کن اِیں بلے پہ ھلو ھالو مِسکیں ڈگار ءَ بدواھانی سوگاتی نہ کن اِیں۔۔۔۔۔۔۔۔۔۔۔
چہ ھمیشاں یکّے من اِت آں کہ دِیریگیں ھوشام ءِ پُروشگ ءَ سر ماں شیراپیں چمّگ ءَ کپتگ اَت ، چرئے جار ءَ پد لاگریں ورنا ءَ پہ بچکند کچاری ءَ را مُراد باتی دات ءُ گوں گُلگُلیں ارساں مارا گُلائیش کُت ءُ گْوشت ، من جزمّاں!
منی راج ءِ ورنا گوں ھمے توکل ءَ وتی راجی ڈُبّہ ءُ زِمہ واری ءِ پیلو کنگ ءَ جاڑِیگ بِہ بَہ اَنت گُڑا بدواہ گوں وتی بدّیں نیّت ءُ داسپاناں کدی سوبین نہ بیت۔۔۔۔۔۔۔۔۔۔۔
ما کہ ھمے دگ ءِ مُساپِر بوت اِیں گُڑا راجدوستی ءِ لیکہ ءَ باتِن ءِ زنگ ءُ پُولِنگانی شُودگ بِندات ءُ ھر گام ءَ مئے رھشُونی کنان کُت۔۔۔۔۔۔۔۔۔
لاگریں ورنا مئے رھشُون اَت ءُ سے چار ماہ ءِ سر ءَ مئے گِندُک ءَ اَتک ، وھدے مئے گوں لاگریں ورنا ءَ گلی دیوان بوت گُڑا مارا باز پنت ، سوج ءُ سرپدی یے شکسات۔۔۔۔۔۔۔۔۔
ناگھاں یک بیگاھے من گوں وتی گل ءِ سنگت باھُوٹ ءَ نِندوک اِت آں کہ بدّیں اھوالے مئے گُوشاں کپت ، بلے لاگریں ورنا ءَ مُدام گل ءِ دیوان ءُ چونائیں دیواناں اے ھبر گْوشتگ اَت کہ منی لیکوی سنگت ھما اِنت کہ منی مرگ ءَ پد راج ءِ اے گْرانیں بار ءَ وتی کُوپگاں زُور اِیت ءُ دیم پہ مِنزل ءَ رھادگ بیت۔۔۔۔۔۔
وھدے مارا لاگریں ورنا ءِ شھیدی ءِ اھوال رست ، منی نِزّ ءَ زمین تنکّ ءُ پیچ۔۔۔۔۔آزمان ڈُرّان اَت۔۔۔۔۔۔۔۔۔۔۔
زِرد ءِ ویرانیں دمکاں تاھِیر ءَ چو سُتکگیں گیابان ءِ شانتُل ءَ بال کُتگ اَت بس کُوکُوھانی درد بکشیں زیمر ءَ چو زامُر ءَ پیڑاتگ اَت کہ ھر دیم ءَ چم کپت اَنت آسریچیں نِدارگے دیدگاں آدینک اَت۔۔۔۔۔۔۔۔۔۔
راستے کہ لاگریں ورنا ءَ گْوشتگ اَت منی مرگ ءَ ارس شلینگ ءِ بدل ءَ گوں آشوبی گامگیجاں راجی جُنز ءَ دیم ءَ بر اِت ، بلے اے ابرم ءِ کِسّو اِنت کہ وت ءَ گوناپ دنت ءُ ارسانی کمان تیر بیت۔۔۔۔۔۔۔۔۔
چہ لاگریں ورنا ءِ شھیدی ءِ اھوال ءَ پد شپ ءَ وتی شار چنڈّ اِت ءُ سر ءَ کُرت ، ھر سھدار دیم پہ وتی کُدُوھاں تیمیچ کنان اَت۔۔۔۔۔۔۔
باھُوٹ ءَ درّاھینت جنگی بِیا سوڑگے کن اِیں کہ لاگریں ورنا ءِ شھیدی ءَ پد مارا چے کنگی اِنت دانکہ ارزانی ءَ دُژمِن ءِ رِپک ءُ پندلانی نِشانگ مہ بَہ اِیں ، دومی پہ شھر ءِ سنگتاں ھم نوکیں گامگیجے ٹھینگی اِنت۔۔۔۔۔۔۔۔مئے نُکس کم ءُ بدواہ ءِ تاوان گیشتر بِہ بَہ اَنت۔۔۔۔۔۔۔۔۔۔۔۔۔۔
راست گْوش ئے باھُوٹ جان ، من ھم گوں وت ءَ ھمے سوڑگ کُتگ! اے راستے آجوئی ءِ جُھد ءُ جنگ ءِ پِڑ ءَ کَولیگی ءُ زِندانی بیت ، بلے مئے جُھد ءُ کُوشست دائم ھمے بِہ بیت کہ بدواہ ءِ گیش ءُ مئے تاوان کمتِر بِہ بَہ اَنت۔۔۔۔۔۔۔۔۔۔۔
اے بابت ءَ مارا گوں نوکیں گامگیج ءُ پیشبندیاں دیم ءَ جُنزگی اِنت ، چی ءَ کہ اے جُھد ءُ جنگ دو روچی جنگے نہ اِنت ۔ بلکیں اے جُھد مارا داں آیوکیں پدریچ ءَ سر کنگی اِنت کہ تئی رُوژناہ ءُ چموکیں آکبت ءِ دگ کُجام گْواش ءَ مِنزل کنت۔۔۔۔۔۔۔۔۔۔
ھو جنگی! راست گْوش ئے۔۔۔۔۔۔۔۔۔
مارا دُژمِن ءِ ھر رِپک ءُ پندل وانگی اَنت ءُ راج ءِ ھمراھی ءَ گل ءِ کُلّیں باسک سوھو کنگی اَنت ، دومی وتی تھ ءُ توکی لیگارانی پلگارگ ءَ ھم شموشکار مہ بَہ اِیں۔۔۔۔۔۔۔۔۔۔۔
ھو باھُوٹ جان!
اے راجی ڈُبّہ ءُ پرز ءِ پیلو کنگ ءَ مئے سنگت ءُ راج ءِ ملّیں کُنگُراں وتی ھونانی شھجو ملّینتگ ، اے ھونانی پلگارگ گوں مئے ھوناں بندوک اِنت ۔ اِد ءَ کسے ءَ اے موکل دَیَگ نہ بیت کہ آ شھیدانی ھوناں لپاشان ءُ راجی نپّ ءُ سیتّاں تاوان بار بِہ کنت یا دُژمِن ءِ ھمراھی ءَ پہ جُھد ءِ بُورّینگ ءَ لانکبند بِہ بیت۔۔۔۔۔۔۔۔۔۔
اے جُھد ءِ کِشار شھیداں گوں وتی ھوناں آپ داتگ ءُ سبزینتگ ، پہ جُھد ءِ گھبودی ءُ دیمروئی ءَ ھزاراں بے مُلّیں سنگت زِندان ءِ تھارونکیاں بندیگ اَنت۔۔۔۔۔۔۔۔۔۔۔
جنگی جان! نوں مارا پہ ڈیھ ءِ پاسپانی ءَ کوہ وتی سنگر کنگ لوٹ اَنت ، چی ءَ کہ مئے دابوئیں دُژمِن وتی منّ ءَ مارا ھِچّ نہ لیک ِاِیت۔۔۔۔۔۔۔۔۔۔۔
اگاں ما وھد ءِ ھمراھی ءَ کمّیں گاماں بدار اِیں گُڑا ما تاوان بار بَہ اِیں ءُ راجی جُنز یکرندے پد ءَ اِیرموش کنگ بیت ، گھ ھمیش اِنت مارا مرچی سُرمگیں بولان ءُ تلاریں ساھجی ءِ ، ماران ءُ تیھریں شاشان ءِ ھساراں نِندگ ءُ بدواہ ءَ را اے پیام ءُ بیھار دَیَگی اِنت کہ تو ستر زُوراک ءُ زُورانسری ءِ کیلو ءَ کیل بِہ کن بلے ما تئی ھر زُلمانی زِر ءَ گْواز کن اِیں ءُ گاماں دیم ءَ شھار دے اِیں۔۔۔۔۔۔۔۔۔۔۔۔۔۔
اے راستی یے باھُوٹ جان!
کوہ مئے سنگر اَنت ، بلے بَہ کَول ءِ کیبرال منی راج کہ جُھد ءِ ھر پِڑ ءَ پہ کُربانی ءِ دَیَگ ءَ ساڑی ءُ ھمگام بِہ بیت گُڑا پہ من راج ءِ ھر گِس ، کُڈُک ءُ گِدان سنگر بیت۔۔۔۔۔۔۔۔۔۔۔۔۔۔۔
پمیشکا مارا کوھاں سنگر کنگ ءَ ھوار راج ءِ راجی سِنچ ءُ بودناکی ھم بالینگی اِنت ، دانکہ آیوکیں پدریچ سرپد بِہ بیت کہ منی راج ءِ ورناھاں اے کوھاناں سنگر پرچا کُتگ۔۔۔۔۔۔۔۔۔۔؟
اے ھیش ءُ نوشیں زِندمان یل کُتگ ءُ گرم ءُ سارت ، جلّیں روچ ءُ نیمروچ پرچا امبازتگ اَنت۔۔۔۔۔۔۔۔۔۔۔۔۔۔۔۔؟؟
وھدے راج ءُ آیوکیں پدریچ سرپد بوت گُڑا پہ سِتک بِہ زان بدواہ کدی مئے ڈگار ءِ دامُن ءَ جلّ اِت نہ کنت ، چی ءَ کہ اے ورنا راجی آکبت ءِ سمبھینگ ءَ مزنیں کِردے پیلو کُت کن اَنت۔۔۔۔۔۔۔۔۔۔
بِیا پہ ھم سنّتی ڈیھ ءِ ھر پاند ءَ اے جار ءَ جن اِیں! دانکہ ارواہ باتِن ءَ اَڑتگ بدواہ کدی پہ شاتکامی نہ بیت۔۔۔۔۔۔۔۔۔۔۔۔
چی ءَ کہ مِسکیں ڈگار مئے راجی زِندمان ءِ مانزمان اِنت ، اگاں نا ڈگار مہ بیت۔۔۔۔۔۔۔۔۔۔۔۔۔۔۔۔؟ گُڑا ھِچّ پشت نہ کپ اِیت۔۔۔۔۔۔۔۔۔۔۔۔۔۔۔۔
پادا کہ سر گِر اِیں۔۔۔۔۔۔۔۔۔۔۔؟؟
پادا۔۔۔۔۔۔۔پادا۔۔۔۔۔۔۔۔۔۔
