سْیاہ ءُ بزّیں جمبراں آزمان ماں پُوش اِتگ اَت ءُ ھَور یکشل ءَ گْوارگ ءَ اَت۔ چہ ھَور ءِ گْوارگ ءَ پد کَور ءُ شیپاں ھار کُتگ اَت۔ میتگ ءِ کماش ءُ ورناھاناں کوڈال کُوپگان ءُ دیم پہ ڈگارانی آپینکی ءَ کَور ءَ ماندیان اِت اَنت۔ دِگہ بازیں ورنا ءُ کسانسال کَور ءِ سر ءَ اِنگُر آنگُر چرّ ورگ ءَ اَت ءُ چہ موسم ءِ کیپیں لِذّت ءَ وت ءَ سیراپ کنگ ءَ اَت۔
چہ ھَور ءِ گْوارگ ءَ پد زمین ءِ وشبوئیں ھاک ءِ بوہ ءَ مانشانتگ اَت ءُ تانسریں چاگِرد بھشت ءِ چھرگ ءَ جَنَگ ءَ اَت۔ مچکدگ اَنچو زیبا اَت کہ نام نہ گِرے، مچّ انچو سبز سبز چو ھانُل ءِ دوچی ئیں پشک ءِ پیم ءَ، پمشکا دِل ءِ دیوانگی گیش ودّان ءُ وت ءَ کسانی ءِ یاتانی شائم ءَ تورگ ءَ اَت۔
ھمے ھیال ءُ گْوست ءِ گیرانی اندر ءَ من ءَ انچو سما بوت کہ ما دست پہ دست دیم پہ مھرانی بُنجل ءَ رھادگ اِیں۔ ھمے مْیان ءَ چہ مھر ءِ کیپانی تِنگگ ءَ پد من وتی ھیالانی بادشاہ وت اِت آں، پمشکا سما نہ کپت ءُ پاد ما زمین ءَ کپگ ءَ نہ اِت آں، بچیلے ءَ بُرز گْوش ئے بال اِت آں۔
چی ءَ کہ اے ساھت ءَ آئی ءَ وتی تنکّ ءُ پرپُکیں لُنٹانی بچکند اَنچوش رِتکگ اِت اَنت، گْوش ئے کہ آئی ءِ دل ءِ سر ءَ یک گرانیں اندوھے چہ بُن بیھ ءَ بیگواہ بیتگ ءُ وشیاں آئی ءِ راہ ءِ سر ءَ پُل ریچان کُتگ ءُ پہ مِستاگ ءِ گِرگ ءِ ودار ءَ مھتل۔۔۔۔۔۔۔۔۔۔
بلے! کاگد لُنٹ ءُ بارگ بدن، کمان بُروان ءُ کُمار چَمّ ءَ اے وشیانی تالہ نہ دیست ءُ نیمراہ ءَ ساھکندن وھد ءِ اَمبازاں شُت ءُ واتر نہ بوت۔ من انگت ودار ءِ رھسر ءَ نِشتگ ءُ پہ ودار زِند ءِ ھِسابی ئیں روچاں پہ ودار گیر ءُ یاتانی ساھگ ءَ تیلانک دَیَگ ءَ آں۔۔۔۔۔۔۔۔۔۔۔۔۔۔۔
ھمے داب ءَ! من اَنگت یات کن آں ھما شپ ءَ کہ چہ واب ءَ جھ سرّتاں ءُ کُوکّار کُت، گوں منی جھ سرّگ ءَ ھوار تیوگیں سنگت جھ سرّتاں ءُ من گریت۔ ھما روچ ءَ بِہ گِر داں مرچی دیم پہ تئی شوھاز ءَ ویل بوت آں، نہ شپ چار اِت ناکہ روچ، نا گرم ناکہ سرد، بس راھی بیت آں چو مُرید ءَ پہ تئی شوھاز ءَ۔۔۔۔۔۔۔۔۔۔
برے من پکیری ءُ ملنگی چادِرے پُوش اِت ءُ وت ھانُل ءِ مھرانی پِنڈُوک جوڑ کُت، ءَ برے چو چاکر ءَ زُوراکے بیت آں ءُ زھم ءُ اِسپر زُرتاں۔۔۔۔۔۔۔۔۔۔۔
برے آھوگ گُلؔ ءِ شَیرانی تہ ءَ وتا ءُ ترا شُھاز اِت کہ بِریں مِریں گوں واھگاں، برے گوں مُنھاج مُکتار ءِ تاھِیر بکشیں توار ءَ وت ءَ مست کُت ءُ زِرد ءِ لھڑیں پاھاراناں زُبانے ءِ بکشگ ءِ جُھد کُت، برے گوں اُستاد مُراد ءِ بُلبُلیں سُروز ءَ ساز بیت آں ءُ وت ءَ گیدی ءِ شھسسّائیں گنوگ سرپد بیت آں، بِہ گْوش! ترا من کُجا کُجا نہ پول اِتگ۔۔۔۔۔۔۔۔۔۔۔۔۔۔؟
بلے! نُوں موسم ءَ وتی تب مٹّ کُتگ ءُ من ءَ دُور ماں دِگہ جھانے ءَ سر کُتگ، اِد ءَ کہ من ھر وھد ءَ کوہ ءِ بُرزیں ٹُلّ ءَ نِنداں، گُڑا گْوات وتی داب ءَ کشان کنت ءُ دِل ءِ ڈکّ اِتگیں رازاں تاک تاک کنت۔ من ءَ پد ءَ انچو سما بیت کہ تو منی راستیں کش ءَ نشتگے ءُ چمّ من ءَ سک داتگ اَنت۔ تئی سْیاہ ماریں زُلپ گْوات ءِ چنکّاں ءُ لُنٹ بچکنداں ریچان اَنت۔ تئی اناریں انارکانی سر ءَ تِلاھیں ٹِکّے چو ماہ ءَ دْرپشگ ءَ اِنت ءُ رُژن ھرگور ءَ تالان اِنت۔ پمشکا من گْوش آں کہ من اِد ءَ تھنا نہ آں، چی ءَ کہ گوں من ءَ تئی یات ءُ تْرانگانی مزنیں امبارے ھست کہ من ءَ زِندگی ءِ راہ ءَ ڈسّگ ءَ اِنت۔۔۔۔۔۔۔۔۔۔۔۔
پمشکا من اے ھبر ءِ سر ءَ سِدک ءُ دِلجماں کہ من ءُ تو الم دُچار کپ اِیں، چی ءَ کہ منی ءُ تئی دگ یکین اِنت۔ ءُ اے کھر شانیں ودار الم ھلاس بیت ءُ شادِھانی بام سر ءَ کشّ اِیت ءُ روچ ٹِکّ دنت، گُڑا آ روچ ءَ من ترا اے گپّ ءَ الم گْوش آں کہ منی زِندگ بُوَگ ءِ مستریں کارِست تئی یات ءُ گیر اَنت، اگاں نا مرچی منی مانِش ھم تو نہ دیستگ اَت۔ بیا! من ءَ امباز ءُ ودار ءَ پہ دائِمی پیچ، چی ءَ کہ نُوں چد ءُ گیش گوں من ودار نہ بیت۔۔۔۔۔۔۔۔۔۔
