بلوچستان ءِ ھکّانی جُنز | میجر مجید

تاں جَرَس آواز نہ کنت کوچی
مَھری ماں راھان نہ بنت کتّار
بے شپانک ءَ کہ روت رمگ ڈن ءَ
تو بزاں وت کہ سوب کنت ھپتار
شانک دنت پونڑے کہ جنوزامے
کدّ ءِ یک بمبے ءَ بہ کنت کوکّار
مولانہ روابند
مرچی ماسی زینی ءُ اے دگہ زالبولانی شانک داتگیں پونڑ ءَ بمبے ءِ وڑ ءَ آسلوت کُتگ۔ ماسی زینی ءِ شانک داتگیں پونڑ رسانکدراں چو بمبے ءِ وڑ ءَ پیش داشتگ۔ ماسی زینی ءِ شانک داتگیں پونڑ ءِ بْرمش تاں میاں استمانی ھلکواں سر بیتگ۔ ءُ مروچی مولانا روانبد ءِ ھمے لوٹ پیلہ بیتگ کہ جنوزامے ءِ شانک داتگیں پونڑ کدّ ءِ یک بمبے ءَ کوکّار بہ کنت۔ اد ءَ سوشل رسانکدرانی جھد ستا کرز اَنت۔ ماسی زینی ھم سرپد اِنت کہ بلوچ ءِ ھک جنگ بیتگ۔ نی بلوچ وتی ھک ءُ ھساب ءَ لوٹ اِیت۔ ماسی زینی ءِ دزگْوھار ، چُک ءُ نماسگ ءُ راج ءُ کوم ھم لس بلوچ مھلوک گوں ماسی زینی ءِ لوٹ ءَ تپاک اِنت۔ گْوادر ءِ شیرزالانی روانک ستا کرز اِیت۔ اے روانک ءَ کُلّیں میڈیا وتی نیمگ ءَ دلگوش کُتگ۔
گوادر ءِ مھلوک ءِ ھکّانی گرگ ءِ جُنز ستا کرز اِیت۔ زورگیر پھک ءَ لپرزگ اِنت۔ بلوچستان ءِ سوبائی سرکار سربتگ اِنت۔ پرچا کہ ماسی زینی ءَ پہ جار ءِ بادشاھی گْوشت کہ نی ما وتی کُلّیں ھکّاں چہ تو لوٹیں۔ ما وتی ھکّانی گرگ ءِ ھاتر ءَ مرگ ءَ مڑایے گون کنیں۔ ایشی ءَ گْوش اَنت کومی جنز، راجی بیداری یا راجی آگاھی۔ بلے زورگیر گڑ ءُ منج اِنت کہ چے بہ کناں؟ بلوچ گْوش اَنت کہ "وارتگیں دپ ءَ سبزیں زھم”۔ بزاں وارتگیں دپ پہ گپ ءُ تْران ھک نہ دات سبزیں زھم لوٹ اِیت۔ بلے ماسی زینی ءِ زبان ءُ آئی ءِ سما ءُ سسّا ءُ مولانا ءِ ھمّت ءُ جوانمردی گْوادر ءِ لس مھلوکءِ ایمانداری چہ سبزیں زھم ءَ ھم تیزتر اَنت۔ ءُ بلوچ مھلوک نی بلکُل چارج اِنت۔ بس رھشونی لوٹ اِیت۔ ءُ ایمانداریں رھشونے لوٹ اِیت۔ مروچی زربار ءِ براھندگاں، ھمل جیئند ءِ پدریچ ءَ تپاکی ءُ ھمکوپگی ءِ سبوت داتگ کہ پہ کُلّیں بلوچستان ءَ یک مسالے۔ کیچ ءَ ھم اے وڑ ءَ بیت کنت۔ پنجگور، ھاران، ھُزدار، نال ءُ شال ءَ ھم اے وڑ ءَ بیت کنت۔ بلے چو ماسی زینی وڑیں شیرزالے لوٹ اِیت، چو مولانا ءِ دابیں ایمانداریں رھشونے لوٹ اِیت۔ ءُ مئے ھمے واھگ اِنت کہ اے جنز دیم ءَ جنزان کنت ءُ بلوچ ءِ ھر ھلک ءُ دمگاں سر بیت بیت۔ زورگیر ءِ پرنٹ ءُ الیکٹرانک میڈیا انچوش لاچار اَنت کہ اے جاورھالاں کوریج بہ دے اَنت۔ من اے سرپدباں کہ اے یک نوکیں امیتے پہ بلوچ جنز ءِ باندات ءَ۔ کہ بلوچ جنز ءِ رھشونی ءَ ناں سردار لوٹ اِیت ناں جاگیردار ناں نواب ناں تمندار۔ بس یک ایمانداریں رھشونے لوٹ اِیت۔ آ تُری گریبے بہ بیت، پوریاگرے بہ بیت، یا سردارے بہ بیت۔ بلے شرت ایش اِنت کہ ایماندار بہ بیت۔
ءُ مروچی اے جنز ءَ اے گپ سابت کُتگ کہ ناں مولانا جاگیردارے، ناں نوابے ناں کہ ڈاکٹر الّا نزر سردارے۔ ناں کہ ماسی زینی تھت ءُ تاج ءِ بانک اِنت۔ بلے لس مھلوک ایشاں گوں ھمکوپگ اِنت۔ ھرکس وتی جھد ءَ وتی وڑ ءَ بہ کنت۔ مھاتما گاندی ءَ دو سد ءُ پنجاہ کیلو میٹر ءِ لانگ مارچ کُت انگریز ءِ وادانی ھلاپ ءَ۔ کہ انگریز ءِ واد ءَ مہ زیر اِت وت واد جوڑ بہ کن اِت۔ ءُ گاندی ءَ پارلیمنٹ ءِ جھد کُت ءُ دومی نیمگ ءَ بگت سنگ ءَ گوں سباش چندر باس ءَ مزاھمت کُت۔ ءُ بلوچستان ءِ جھد ھشت پھناتیں جھدے۔ ھر کس وتی جھد ءَ بہ کنت۔ بلے شرت ایش اِنت کہ ایماندار بہ بیت۔ لبزانکی جھد ھم جھدے۔ وتی دود ءُ ربیدگانی جھد ھم جھدے۔ سائل ءُ وسائل، وتی گار ءُ بیگْواھیں سنگتانی بابت ءَ جھد لوٹ اِیت۔ آ ھم جھدے۔ وتی سیمسرانی جھد کنگ لوٹ اِیت۔ وانگ ءُ زانگ ءُ چاگردی گھبودی۔ اے کُل جھد اَنت۔ چاگرد ءِ سلکاریانی ھلاپ ءَ جھد کنگ لوٹ اِیت۔ پرچا کہ یک جوانیں چاگردے ءَ چہ یک تمردیں راجے جوڑ بیت۔ بلوچ راج چہ باز چکّاساں گْوستگ۔ ءُ بلوچانی سر نود ءُ نُھ دیگ ءَ گْرستگ۔ بلوچ نی شَر ءُ شِر ءِ پرک ءَ زانت۔ باید اِنت نی بلوچ رھشون گوں راج ءَ تچک بہ بیت چپ ءُ چوٹ مہ بیت۔ بلوچ گْوش اَنت کہ
"چہ کنگ ءَ گھتر اِنت کانگی سیاہ
کہ رنگ ءُ کارپد ئِے یکّین اَنت”
گوادر ءِ اے نندانک ءُ روانک ءَ مردم کہ چار اِیت۔ دل گْوش ئے گرگے جنت۔ اے روانک ءَ ھچ پارٹی ءِ بیرک تو نہ گند ئے۔ اے روانک بلوچ ءِ روانک اِنت۔ بلوچستان ءِ ھکّانی لوٹ کنگ گناھے نہ اِنت۔ اے جھد لس بلوچ ءِ جھد اِنت۔ اے دابیں زھرشانی ءُ روانک ءُ نندانک بلوچ مھلوک ءَ جھد ءِ سکین ءَ دنت۔
سربلندانی سر بلند بات اَنت
دژمن بے سوب ءُ کور ءُ لنگ بات اَنت
ھمل ءِ زربار ءُ تیاب لُنجیں
زرپھازانی بیرک دْرنگ بات اَنت
مئے یک سنگتے ھپیز دشتی گْوش اِیت ” باید اِنت ایمانداریں رھشون ھکّانی جھد ءَ lead بہ کن اَنت۔ آ تری کجام ھم پارٹی ءِ بہ بیت۔ پرچا کہ لھتیں راج دوست پارٹیانی رھشون گْوھتگ کُتگ اَنت۔ ءُ گْوھتگ کُتگیں پد ءَ شر نہ بنت۔ شریں گْوھتگ بنت بلے گْوھتگیں شر نہ بنت۔ گُڈ سر ءَ من گْوادر ءِ لس مھلوک ءَ سوبمندیں زھرشانی ءَ مبارکی دیاں۔
تپاکی آجوئی ءِ مانزمان اِنت
بلوچستان آجو بات