بلوچ سرڈگارءِ آجوئی ءَ پہ جنَگ گوں گشادی ءَ برجاهَ انت چُک ءُ کماش، مات ءُ گُهار، ورنا ءُ وانندگ گوں زند ءِ ھمک پڑ ءَ بندوکیں لس بلوچ ھمک روچ چست کنگ ءُ گار بیگواه کنگ بیگ ءَ ات انت، کَسے ءِ جون ماں گیابانے ءَ دور دیگ بیت ءُ کسے ءِ ماں کوچگ ءُ وریرندگان ءُ کَسے ءِ جون پجّارگ نہ بیت ءُ بے نامی ءَ کل کنگ بیت چوناھا گوش انت بلوچ وھدے گلام کنگ بیتگ گڑا ھما روچ ءَ اے درچ برجا انت ھمک روچ چہ دومی روچ ءَ پہ بلوچ ءَ ترندتر ءُ نگوم تر انت بس بلوچ انت گلامی انت ءُ آجوئی ءِ جنگ انت۔۔
اے زوراکی داں منی هوش ءَ بگر روچ ءِ مرچی بلوچ سر ڈگار ءَ یکشل ءَ برجاهَ اِنت ءُ یکیں ھساب ءَ روان انت۔۔
چوناھا مئے رهشۆن گوَش انت جنگ په وت رهشۆن پیداک کنت، بلوچ ءِ دراج کَشّیں جُنز ءَ بازیں مردُمے پُروشت ءُ بازینے ءَ چه ریاست ءِ زوراکی ءَ وت ءَ یک کر کُت ءُ بے ترک ءُ تواری ءَ نشت ءُ زمین ءِ کلونڈگ ءَ گلائیش بیت، اے ھم گوں پرشتگیں مھلوک ءَ شمار بنت۔
ماما جان ۔۔ !
بازینے ءَ چو تئی پیم ءَ دست ء وت وتی چُکّانی لاش هم دست گپتگ انت ءُ زمین ءِ میار کتگ انت، نیکہ آ پروشتگ انت ءُ نیکہ بے تواری ءِ چادر اش پوش اتگ بلکیں چو تئیگ ءَ گیش مھکم تر بوتگ انت ءُ جنز ءِ ھمراہ داری کنگ ءَ انت۔۔
بگندئے ماما تو په وتی بَزّگی ءَ راج ءِ توار جوڑ بوت ئے زوراکی ءِ بگیری ءَ توار چست کُت کہ تو وتی بچ ءِ لاش کپگ ءَ دیستگ ات تو ھمے درد کہ مار اتگ ات تو لوٹ ات کہ دگه کماش ءُ دگه ماتے ءِ سر ءَ اے نوبت مئیت ءُ منی وڑ ءَ بے کوپگ مہ بیت چُکّ که روت پتانی کوپگ هم پروش انت۔
ماما تو زانتگاَت چُکانی روگ سکّ گران اِنت پتانی کوپگ ءِ پروشگ ءُ ماتانی چمانی چراگانی روگ سکّ گران انت
ماما ترا آپرین اِنت پہ پرے بَزّگیں راج ءَ تئی جھد هچبر بے ھیال کنگ نہ بیت شال ءِ انسرک بستیں سردی بہ بیت یا کہ کراچی ءِ گرم تبیں لِوار ترا مُدامی یاد کن انت۔۔۔
بلوچستان ءِ همُک بے وسیں مات ترا یات کنت ماما تو درُست پُرسیگَ کُت انت ءُ شُت ئے چوناھا مرگ و بَرهَکّ انت تئی روگ مزنین تاوانے په هما ماتاں که تو دائم آیانی سگّ ءُ ھمت بیتگ ئے آیانی کوپگ بیتگ ئے۔۔
انّوگیں جاورانی تہ ءَ ماما تئی وڑیں کردانکی مردُم کزا یکّے ودی بہ بیت چه بلوچستان ءَ کہ اے زوراکیں رستر ءِ دیم ءَ اُوشتات بہ کنت ءُ مہ پرُوش ایت ءُ وتی جُھد ءَ یکشل ءَ برجاه بہ دار ایت۔
ماما تو تَمردیں جُھدکارے ات ئے تی دائم نمیران بوگ په سرزمین ءُ پہ راج ءَ شرپے بلے تئی ھورک کتگیں جاہ ءَ کے انت کہ بہ گیپت ءُ ھورکی ءَ میل ایت، ماما تئی نام هما ناماں چہ یک نامے هچ بر گارَ ءُ بیگواه کنگ نہ بیت بلے مرچی ماما تئی جاگه هورک بیت، گھگیری ءِ چیدگ تا ابد نمیران بوت ئے ماما بھشت تئی هنکین بات ءُ تئی جھداں منزلے ۔۔
***
