بنی آدم ءِ زندگی ءَ وڑ وڑیں اڑ ءُ جنجال ودی بیت ءُ زِندمان ءِ بھر اَنت، بلے انسان ایشاں سرپد بیت ءُ وتی سما ءُ سسّا ءِ رِد ءَ آیانی گیش ءُ گیوار ءَ کنگ ءِ جُھد ءُ کُوشست ءَ کنت۔
مرچی ما ھمے بارو ءَ کہ وان اِیں ءُ سرپد بَہ اِیں ، گُڑا زان اِیں کہ ۱۸۳۹ میر مھراب ھان سرپد بوتگ کہ من انگریز ءِ لشکر ءَ پُروش دات نہ کن آں، بلے پہ وتی سرڈگار ءِ رکّینگ ءَ کُربان بوت کن آں دانکہ وتی آیوکیں پدریچ ءَ اے کلوہ بِہ دے آں کہ راستے من دُژمِن پُروش دات نہ کُت بلے وتی ڈیھ ءِ بدل ءَ سر سوگات کُرتگ۔
چرے راستی ءَ مارا ھمے درونت دربرگی اِنت کہ رھشُون ءِ مُول ءُ مُراد ھمیش اِنت کہ آ وتی راج ءَ را مادنیں راھے نِشان ءُ شون نِہ دنت کہ ترا تئی مکسد کُجام کِشک ءُ دگ ءَ دز کپ اِیت۔
پمشکا مارا چہ واجہ مھراب ھان ءِ داتگیں دیمونی ءَ درونت رس اِیت کہ آئی وت ءَ پہ ھما مکسد ءَ کُربان کُرتگ ، آ مکسد راجی زِندمان ءِ مانزمان اِنت۔ گُڑا من ھمے سرپد بَہ آں کہ آجوئی ءِ راہ ءَ پہ ماتیں گُلزمین ءَ ندْر ءُ کُربان بُوَگ مزنیں شرپے زانگ بیت ، ءُ اے شرپ ھما مردُماں نسیب بیت کہ وتی زندگی ءَ راج ءِ امانت سرپد بیت ءُ راجی ڈُبّہ ءِ پیلو کنگ ءَ ھر ساھت ءُ دمان چاڑکّہ بیت۔
پمشکا اے ھبر سددرسد راست اِنت کہ پہ وتی مکسد ءَ ندْر بوتگیں سر کدی نہ مِر اَنت، بلکیں آ راجدپتر ءِ تاکدیم ءُ راج ءِ دِلانی اندر ءَ پہ دائِمی ابدمان بَہ اَنت۔ داں بلوچ ءِ یک پُسّگے اے گیدی ءِ دمکاں مان اِیت ، آیانی نام پہ شرپ گِرگ بیت ءُ یات کنگ بَہ اَنت۔ چی ءَ کہ پہ وتی باندات ءُ راجی زِندمان ءِ ھاتر ءَ کُربانی دَیَگ ھژدری اِنت ، مرچی اے ھزارانی ھِساب ءَ کہ تنگوئیں ورنا شھید بُوَگ ءَ اَنت ، آیانی لیکہ ءُ مکسد گُلامی ءِ چہ ھُنڈالاں ولگوج کنگ ءُ آجوئی ءِ دزگِرگ اِنت دانکہ باندا مئے راج وتی جِند ءِ گدان ءَ درانڈیھ ءُ درآمد مہ بیت۔
گُڑا من اے ھبر ءَ پہ سِدک ء دِل گْوش آں کہ شھیدانی یات کنگ ءِ روچ تھنا اک روچ نہ اِنت ، بلکیں مارا وتی شھید ھرروچ یات کنگ ءُ گیر آرگی اَنت ، چی ءَ کہ آیاں وتی بھاریں زِندمان ءِ ھزار مُرادیں روچ پہ مئے وشیں روچانی ھاتِر ءَ کولیگ کُرتگ اَنت ، پمشکا مارا ھرروچ وتی شھیدانی داتگیں دیمونی یات کنگ ءُ گیر آرگی اَنت دانکہ ما ھم ھمے راہ ءَ سپر بِہ کن اِیں ءُ وتی راجی ڈُبّہ ءُ زِمہ واری ءَ پیلو بِہ کن اِیں داں باندا راج ءُ آیوکیں پدریچ ءِ دیم ءَ ملامت ءُ میاریگ مہ بَہ اِیں ۔
ءُ گُڈّی ءَ من اے ھبر ءَ بلوچ راج ءِ کُلیں گُل ءُ پارٹیاں گْوشگ لوٹ آں کہ پہ ماتیں گُلزمین ءَ ندْر بوتگیں پُسّگ ءُ راجی بامرد ، پُلیں شھید بھر ءُ بانگ بوت نہ کن اَنت ، گُڑا ما پرچا بھر ءُ بانگ اِیں۔۔۔۔۔؟
ما پرچا اے جُھد ءِ دْراجکشیں پند ءَ یکمُشت ءُ یکدست نہ بَہ اِیں۔۔۔۔۔۔۔؟
چی ءَ کہ شھید مھراب ھان ءَ بِہ گر داں شھید گُلام مھمد ، شھید لالا مُنیر ، شھید ڈاکٹر منان ، شھید اکبر ھان ءُ اے دِگہ کُلیں شھیدانی پِگر ءُ پلسپہ آجوئی گوں یکمشتی ءَ دیم پہ مِنزل ءَ ، ءُ یکمشتی ءُ تِپاکی سوبمندی ءِ راستی ءُ نِشانی اِنت۔
ھما راہ کہ مارا شھیداں وتی ھون رِتکگ اَنت ءُ مارا شون داتگ ، آ راہ مئے زِندگی ءِ مستریں مکسد بِہ بیت۔ بیا اِت مرچی گوں شھیدانی رِتکگیں ھون ءُ ماتیں گُلزمین ءَ اھد کن اِیں کہ ھما مکسد ءِ ھاتر ءَ شھیداں وتی سر ءُ ارواہ سوگات کُرتگ اَنت ، ھما مکسد ءِ ھاسِل کنگ ءِ ھاتِر ءَ گوں یکمُشت ءُ تِپاکی ءَ دیم پہ مِنزل ءِ نیمگ ءَ جُنز اِیں ءُ پہ ھر وڑیں کُربانی ءِ دَیَگ ءَ چک ءُ پد نہ بَہ اِیں۔
