دلگوش: بلوچ آجوئی لوٹوکیں رھشُون ڈاکٹر اللہ نذر بلوچءِ گونءَ انڈین میڈیاآؤٹ لیٹ ءَ گوستگیں روچاں یک گُلگدار ے کتگ۔ اے ہماگلگدار ءِ بلوچی ٹرانسکرپٹ اِنت۔
بلوچ آجوئی لوٹوکیں رھشُون ڈاکٹر اللہ نذر بلوچءَ ماں انڈین میڈیاآؤٹ لیٹ ءَ داتگیں وتی تاجگیں گُلگدار ے ءِ تہا گشتہ کہ وھد ے سی پیک پروجیکٹ بِندات کنگ بوتگ، ما اے گپّ سھرا کُتگ کہ سی پیک تھنا پہ پنجاپ ءُ پاکستان ءِ دیمروئی ءُ گھبودی ءِ ھاتر ءَ جوڑ کنگ بُوَگ ءَ اِنت، مرچی مئے ھما گپّ گْواچن ءُ راست بُوَگ ءَ اِنت۔
ھمے وڑ ءَ چہ دو دھک ءَ پد بلوچستان ءِ ڈیموگرافی ءِ بدل بیت، چی ءَ کہ سی پیک ءِ کش ءُ گْور ءَ مئے مھلوک ءُ مردُماں پہ نِندگ ءَ نئیلگ ءَ اَنت۔ ءُ چرے گامگیج ءَ مھلوک گیش درانڈیھ، آئی ڈی پیز ءُ Internal displacement بُوَگ ءَ اَنت۔ ھندی مھلوک ءُ دریا ورد، ماھیِگِراناں ھم یل کنگ بُوَگ ءَ نہ اَنت۔ ما ھمے سرپد بَہ اِیں کہ سی پیک تھنا پہ چین ءُ پنجاپ ءِ سیت ءُ نپّانی واستا اِنت، ءُ بلوچستان ءِ ونڈ ءُ بھر ءَ سی پیک ءِ سَوَب ءَ تھنا چُکچینی (نسل کشی) رستگ۔ مئے گْور ءَ کُجا کہ سی پیک گْوزگ ءَ اِنت، مئے مھلوک ءُ مردُماں گار ءُ بیگواہ کنگ ءَ اَنت، چِست کنگ ءُ شھید کنگ ءَ اَنت۔
اگاں دُگنیا بلوچ راج ءِ آہ ءُ پِریاتاں گُوش نہ دار اِیت ءُ چین ءُ پاکستان سی پیک ءِ سرجم کنگ ءَ سوبین بوت اَنت، گُڑا بلوچ یک راجے ءِ بِستار ءَ چہ وتی راجی پجّار ءَ زِبھر بیت۔
من ھمے سرپد بہ آں کہ سی پیک ءِ چینچو پروجیکٹ پہ بلوچانی واستا انوں جوڑ بوتگ یا جوڑ بُوَگ ءَ اِنت، اے تیوگیں چہ پنجاپ ءَ جوڑ بوتگ اَنت یا کمیں باز ماں سِندھ ءَ جوڑ بوتگ۔ سی پیک مئے ھِلاپ ءَ تھنا زُلم ءُ زُوراکی، زُورانسری ءِ یک کارپدے۔
