اے بتلے یا تنزیہ گالبندے۔ بلے ما اے بتل چہ وتی کماشاں اش کُتگ ءُ مئے کماشاں چہ وتی کماشاں اش کتگ۔ اے بتل چہ کرناں بلوچی لبزانکے بھر اِنت ءُ تاں روچ ء مروچی اے بتل ھمے رنگ ءَ گْوشگ بیت۔ بزاں کہ مردمے ءِ دست ءَ کہ کارے آسر کنگ مہ بیت گُڑا ھمے بتل ءَ گْوش اَنت کہ “تو کابُل پَتِھ کُت!”۔ اے بتل ءَ چہ اے پدّر اِنت کہ کابُل ءِ پَتِھ کنگ سک گْران بیتگ یا چو بہ گْوش اِت کہ ممکن نہ بیتگ۔ ساسانیاں، تاتائیاں، منگولاں، انگریزاں ءُ روسی کبزہ گیراں کابُل ءِ پَتِھ کنگ ءَ وتی بیڑ باز براں بُرتگ۔ بلے کابُل اِش پَتِھ کُت نہ کُتگ۔ بلوچ ءِ اے بتل یا گالبند ھر کس ءَ کہ گْوشتگ یک ءُ ٹک ءَ راست اِنت۔ بلوچی بتل چوناھیگا بے درور اَنت بلے بتل گْوش ئے لِبز ءِ پیگمبر بیت۔ باز ناں بلے اے سرھال ءِ سر ءَ کمّے گْوست ءَ چارین ءُ پٹ ءُ پول کنیں۔ وھدے کہ روس ءَ کابُل ءِ سر ءَ اُرش کُت ءُ جْوانیں آشوبے آؤرت۔ کرناں شاھی ترز ء سرکار چہ بُن ءُ کْورّ ءُ ھُنڈالاں ولگْوج کُت ءُ اُلسی جمھوری سرکارے جوڑ کُت۔ بلے بد بھتی ایش اَت کہ راج ءِ لس
مھلوک سرپد نہ اَت۔ ءُ راج ءَ نہ زانت کہ چے یے بوت۔ اے آشوب لھتیں راجی رھشون ءُ سروکاں آؤرت۔ ءُ راج اِش وتی ایتماد ءَ نہ زُرتگ اَت۔ ءُ راج سربتگ بوت۔ دنیا ءِ زورگیر ءُ سامراجی زور ءُ آشوب دژمنیں مُلک یکجاہ بیت اَنت ءُ روس ءِ آشوب اِش بے سوب کُت۔ روس ءَ یک شپی توکے شپ لِک کُت ءُ چہ اوگانستان ءَ درکپت ءُ شُت ءُ زورگیراں مُلّایانی سرکار جوڑ کُت ءُ اے مُلّایاں مھلوک ءُ راج ءَ را تِین ماں دل ءَ دات۔ وانگ ءُ زانگ اِلم ءُ رُژنائی ءِ سر ءَ پابندی جت ءُ زالبولانی سر ءَ اِلم ءُ زانگ اِش ھرام کُت ءُ زالبول اِش لٹ ءُ کُٹ ءُ بے پردگ کُت اَنت وڑ وڑیں زلم ءُ زوراکی اِش کُت۔
اوگانستان ءِ مُلّایانی سرکار ءَ دنیا ءُ جھان ءِ دھشتگردیں گل جاگہ دات اَنت۔ زرّ ءُ مال دات اَنت۔ دھشتگردی ءِ سکین دات اَنت۔ ھر جاہ دھشتگردی ءَ ردوم زُرت۔ بلوچ گْوش اَنت کہ تولگ ءِ مرگ کہ کَیت گُڑا دیم پہ بازار ءَ روت۔ ھمے مُلّایاں کہ امریکہ ءِ مدت ءُ کمک ءَ اوگانستان ءَ ھاکم جوڑ بیتگ اِت اَنت ایشاں امریکہ ءِ سر ءَ اُرش کُت ءُ امریکہ ءِ ورلڈ ٹریڈ سنٹر اِش گوں بالی گُراباں جت ءُ پْروشت کساس سے ھزار امریکی کُشت۔ گُڑا امریکہ بھادر ءَ سک بد بُرت ءُ گْوشت ئِے کہ شُما باریں بانک ءُ کروس ءِ کسّہ کُت!۔ بلوچی بتلے وھدے کہ کروس مرگ ءَ زُرت گُڑا وتی بانک ءِ پیشانیگ ئِے تُک چِت۔ بزاں کہ مُلّایاں وتی کد شمُشت۔ امریکہ ءَ اے مُلّایانی ھلاپ ءَ بلاھیں پوج کَشّی یے کُت۔ ءُ پاکستان آلی جناب ءَ مزنیں لبّ ءُ ملامے دات ءُ گوں وت ھمراہ اِش کُت۔ بلوچی بتلے کہ تولگ ءَ پہ لنگاسی ءَ وت کار اِنت۔ پاکستان آلی جناب ءَ پہ ڈالرانی ھاتر ءَ وت ءَ بھا کُت۔ بلوچی بتلے کہ ھپتار ءَ گلے چِت کہ جاپر ءَ ھرے گپت۔
منی سرھال چوناھا ھمے بلوچی بتل اِنت کہ تو کابُل پَتِھ کُت!۔ من کسّہ ءَ دْراج نہ کناں۔ چوناھیگا اے سرھال ءِ سر ءَ کتابے ھم نبشتہ کنگ بیت۔ بِل ایشی ءَ ءُ بگر آئی ءَ کہ ھمے زوراوراں کہ اوگانستان ءِ آشوب پْروش داتگ اَت۔ مُلّاھاناں اوگانستان ءَ ھاکمی داتگ اَت۔ پد ءَ ھمے زوراور مُلّایانی ھلاپ ءَ یکدست بیت اَنت ءُ دوست بیت اَنت ءُ پاکستان آلی جناب ءَ بلوچستان ءِ چیزے ھند ءُ دمگ، بالی پٹ ءُ پہ زرّ ءِ ھاتر ءَ گوں امریکہ بھادر ءِ دست ءَ رھن کُت اَنت ءُ ڈالر گپت ءُ وارت۔ اوگانستان ءِ ھلاپ ءَ جنگ بندات کُت ءُ اے جنگ ءَ کساس بیست سال ءَ داشت۔مزنیںمالی ءُ جانی تاوانے چہ دوئیں نیمگاں بوت۔ بیست سال ءِ جنگ ءَ چہ پد امریکہ بے سوب بوت ءُ امریکہ شپی توکے چہ کابُل ءَ درکپت پہ رُزوائی شُت کہ جنگی گْوستانک ءِ مستریں پْروش اِنت۔ اے گپ ءِ امریکی کماندار وت منّوگر اَنت۔
دنیا ءِ لس مھلوک ابکّہ ءُ ھیران بوت۔ مُلّایاں پد ءَ وتی شُتگیں ھاکمی دست گپت ءُ بنگاں بروت اَنت ءُ اوگانستان ءِ ھاکم اَنت۔ نی بلوچی ءِ ھمے بتل ھرجاہ نامدار بوت کہ “تو کابُل پَتِھ کُت!”۔
منی گْرانمھزبیں وانوکاں،
اسل گپ ایش اِنت کہ دگر ءِ زمین دگر ءِ آب ءُ ھوا، دگر ءِ کوہ ءُدمگ ءُ آپ بند، دگر ءِ دود ءُ دودمان درامد ءَ کبول نہ کن اَنت۔ کجام یک تمردیں زوراکیں، مالداریں زورگیرے بہ بیت۔ پہ زبردستی ءُ زوراکی دگہ راجے مُجّتی وتی گُلام داشت نہ کنت۔ داں وھدے کہ راج ءِ زمیر زندگ اِنت۔ آئی ءِ سوچ، سما ءُ سسّا گُلام نہ اِنت۔ آ راج گُلام نہ بیت۔ مروچی بلوچ ءِ اے بتل یا گالبند پہ اے دگہ ایردست ءُ گُلامیں راجاں بلاھیں سکینے۔ کہ پہ زورانسری ءُ سلاہ ءِ زور ءَ دگر ءِ گلزمین پہ زور ء شمشیر گُلام دارگ نہ بیت۔ چوناھا اے بتل ءِ مول ءُ مراد ھمیش اِنت۔ “تو کابُل پَتِھ کُت!”۔ سید ھاشمی گْوش اِیت۔
راہ مئے بستگ اگاں کوہ ءُ تلار ءُ گْریشگاں
گوں وتی سرپنجگاں شیری رھے بُرّان کن اِت
چو گروک ءُ بیر ءُ نپت ءُ آس گْواریں جمبر ءَ
دژمن ءِ اے زید ءُ میتّاپیں لداں سوچاں کن اِت
تپاکی آجوئی ءِ مانزمان اِنت
بلوچستان آجو بات
