نہ زان آں شپ اَت یا کہ روچ ، بلے تھاری ءِ ھاکمی گوں وتی گُروناکی ءَ ھما روچ ءَ بگر دانکہ مرچی برجاہ اَت۔ تھاریں کُوٹِی ءِ راستیں پاند ءَ ھیسک ءُ ھمپانیں توارے جبڑگ ءَ اَت کہ دِلجم بُو! من سانکلاں بوجان ءُ تئی زیبائی ءِ کِسّو ءَ کاراں کہ تو چینچو زیبا ئے۔
پہ تئی زیبائی ءَ ھزاراں شیدا چو منی داب ءَ تھاریں کُوٹِیاں بندیگ ءُ ھزاراں کوہ ءُ اگاراں وئیل ، ءُ ھزاراں درانڈیھیں زِند ءِ گْوازینگ ءَ لاچار اِنت۔ ءُ ھزاراں دِیوانگ ءَ پہ تئی دیمدرائی ءَ سر سوگات کُرتگ اَنت ءُ تئی مھر ساچانیں دِلبند ءَ وتی سر اِیر کُرتگ ءُ وش واب اَنت۔
اے تئی زیبائی اِنت کہ من ءَ وتی ھستمان ءِ رکّینگ ءَ چابُکے کُتگ ءُ مرچی تھاریں کُوٹی ءِ اندر ءَ وڑ وڑیں سکّی ءُ سُوریانی دیمپان آں ۔ ءُ برے برے من جیڑ آں کہ اے کھرانی آسگْوات منی زِرد ءِ اھوالاں چو سمین ءَ بارت ءُ منی ھنکین ءَ سر کنت کہ منی دیدار ءِ اُمیت ءَ کسے نِشتگ ءُ تْرونگلیں ارساں شلینگ ءَ اِنت ، کسے ءَ پن ءُ لالی ، مِسک ءُ مھلب ، ھِنّی ئیں نِگار ءُ سُرمگ ، شادِھیں روچاں ڈکّمیں بیکّانی رندگ یل داتگ۔ کسے ابّا ابّا کنت ءُ واب کپ اِیت۔
گوں اے گپّانی ھلاسی ءَ ھوار آسگْواریں چیھالے پُرشت ءُ پد ءَ سرجم ءَ بے تواری بوت، اے بے تواری ءِ مْیان ءَ منی باتِن ءَ ھاجت ءِ کْوھنیں تلب ، گِندگ ءِ ژند ءُ ژولیں اُومان نوک ءُ دیدگاں ارسانی کتارے شیپ گِپت ءُ سما ءِ سِستگیں چیلّک تاب وران بوت۔
من ءَ پہ راستی انچو گُمان بوت کہ اے ھیسک ءُ ھمپانیں توار ءِ تہ ءَ منی زِندمان ءِ گْواچن ءُ لھڑیں جبین ءِ آسشانیں پاھارانی سوزمانیں درد ءِ کِسّہ درشان بوتگ ، چی ءَ کہ من ءَ ھم مزنیں مُدّتے بیت کہ من تھاریں کُوٹی ءِ اندر ءَ گوں تھاری ءَ سنگتی کنگ ءَ آں۔ نوں من گوں اے تھاری ءَ انچو آشنا آں کہ رُژن ءِ ھیال کلھے ھم نیاتکگ کہ من چہ اے تھاری ءَ ابید دِگہ زیبائیں جھانے ءِ پُولکار آں ، بلے مرچی اے ھیسک ءُ ھمپانیں توار ءَ من ءَ ڈانگرینت ءُ باتِن ءَ نوکیں سسّایے ودی کُرت کہ من پرچا اے تھاریں کُوٹی ءَ بندیگ ءُ گوں تھاری ءَ منی سنگتی یے جوڑینگ بوتگ۔۔۔۔؟
سما کپت کہ تو زیبا ءُ ازگاریں ڈگار ءِ نیزگاریں پُسّگ ئے ، ءُ تئی ازگاریں ڈگار درآمداں چامپ اِتگ ءُ چو ناھار ءَ گاڑینگ ءَ اَنت دانکہ باندا پہ تو ھِچّ پش مہ کپ اِیت کہ اے گُلزمین ءِ نام بلوچستان ءُ آئی واھُند بلوچ بوتگ ، بلکیں آ ترا چہ اے ڈگار ءَ ولگوج کنگ لوٹ اِیت کہ تو پہ مُدیمی بے نام ءُ نِشان بِہ بَہ ئے۔۔۔۔۔۔۔
بلے! اے ھبر نوں ترا جیڑگی اِنت کہ پہ وتی باندات ءَ چے جیڑ اِتگ ءُ کُجام کِشک ءِ مُساپِر بَہ ئے ءُ وت ءَ موک ئے ، اگاں نا باندا پہ ترا ھِچّ نہ مان اِیت کہ کسے تئی گیراں بِہ بیت۔ چی ءَ کہ اے تھاریں کُوٹی ءَ گوں لٹّ ءُ کُٹّاں ھوار من ءَ برے برے بازیں لبّ ءُ لالچ دَیَگ ءِ دْروھاپیں کانیگ ھم پیشدارگ بوتگ کہ ترا زر ءُ کلدار دے اِیں ، وانندگ ءُ زانتکارے ءِ کُجام کہ نوکری ءَ کن ئے ترا نوکری ھم دے اِیں ، ڈنّ ءَ رَوَگ لوٹ ئے گوں وتی زھگانی ھمراھی ءَ ترا دیم دے اِیں ، بلے چہ اے جھودانی پِرّینتگین کار ءَ دزکشّ بو، اگاں نا ترا اے تھاریں زِندان ءِ کُنجے ءَ بے گور ءُ کپن انچو کل کن اِیں کہ کس تئی گْواہ ءَ نہ دنت، انچو کہ ھزاراں ما پیسر ءَ گار ءُ گور کُرتگ کہ دنیگا آیانی کھول نزانت کہ مئے مردُم زندگ یا مُرتگ اَنت ، انچو تئی ھال بیت۔
اے ھرروچیگیں بیھار ءُ پاتراپاں منی بالاد زاھر ءَ پُروشتگ اَت ءُ اندر ءَ تھزد کُرتگ اَت کہ من گامے چِست بہ کن آں ءُ چہ تھاری ءَ در بِہ کپ آں پہ وتی کھول ءُ زھگانی ھاتِر ءَ روژنائیں بانداتے بِہ سینگاراں ، بلے اے ھیسک ءُ ھمپانیں توار ءِ سوزمانیں درد ءَ من ءَ ڈسّ اِت کہ تو اے راہ ءَ کہ پند بُرّگ بُنگیج کُرتگ ، اے ھاتِر ءَ نہ کہ تھنا منی کھول ءُ زھگانی آیوکیں ادارُکی زِندمان اِیمن ءُ وشھال بِہ بیت ، بلکیں اے راہ ءَ تو پند بُرّگ پرے ھاتِر ءَ بِندات کُرتگ کہ منی گُلام ءُ ایردستیں راج ءِ راجی آکبت چہ کھرآماچیں تھارونکی ءَ در بِہ کپ اِیت ءُ آجوئی ءِ بامساریں پدیانکاں پُرمھریں زندے بِہ گْوازینت۔
اگاں تو پہ کلھے جیڑ اِت کہ من ءُ منی کھول ،منی زھگ ءُ پسائندگ ، گُڑا تو پہ سِدک بزان کہ پہ ادارُکی وشھال بَہ ئے ، بلے پہ مُجّتی تھاریں کُوٹی ءَ گوں سانکلاں بندیگ بَہ ئے۔ مرچی بِہ گِندگ ئے اے ھیسک ءُ ھمپانیں توار تئی گُوشاں کپ اِیت ءُ زِندگ بُوَگ ءِ اُومان زنزر اِیت ، بلے باندا تو پہ مرگ ءُ زِند ھردو پیم نہ بَہ ئے۔
ھمے تیجاریں درد اِنت کہ من تھاریں کُوٹی ءَ گوں سانکلاں بندیگ بلے زِندگ بُوَگ ءِ ھاٹیگ گیش توانمند ءُ مُھکم اِنت کہ انگت زِندگ آں۔۔۔۔۔۔۔۔
