مادر ءِ کلات ءُ پاکستان ءِ دْرندگی | زباد بلوچ

پُلیں یاسمِین ءِ تیر سُپتگیں جون وھدے تّنّیگیں جیمڑی ءِ دِلبند ءَ گوں تیراں دوچگ ءُ بَلوچ راج ءَ را سوگات کنگ بیت ، گُڑا مارا ھمے پَیام ءُ باور دَیگ بیت کہ تو گُلام ئے۔ پرے ھاتر ءَ گُلامیں راج ءُ آئی ءِ ایردستیں چاگرد پہ زور ءُ تاکتمندیں کْوزہ گیر ءَ ھِچ بستارے نہ دار اِیت، چی ءَ کہ تئی ھرچ توار پہ دُژمِن ءَ بیھار ءُ پاتْراپے ۔ پمیشکا دُژمِن نہ لوٹ اِیت کہ تو سر ءَ چِست بِہ کن ئے ءُ پہ وتی زند ءِ آسراتیاں یک مُھکمیں توارے  بِہ بَہ ئے۔
دُژمِن زانت ءُ سرپد اِنت من ترا اے ھاتریگ گُلام نہ داشتگ کہ تئی زند ءِ آسراتی سرجم ءُ برجم مہ بہ آں ، وھدے کہ تو سرجم ءُ مھکمیں توارے بہ ئے پہ راج ءُ راج ءِ ایردستیں چاگرد ءَ ، گُڑا پمّن نہ وشیں روچ ھمود ءَ چِہ بِندات بیت۔ ھمے وڑ ءَ پنجاپی کْوزہ گیر اے کدی نہ لوٹ اِیت گُلامیں چاگرد وتی باتن ءَ شھزانتیں زانت ءُ سرپدی یے ودی بِہ کنت کہ پمّن جنجال ءُ وبالے جوڑ بِہ بیت باندا بلوچ ءِ کْوزہ ءُ زُور گِپتیں سرڈگار پمّن تَنک تامور کنّگ بِہ بیت کہ پہ ساہ کشّگ ءَ ساھگے مہ گِنداں۔ چی ءَ کہ ما دیستگ دُژمِن ءَ وتی مُھکم ءُ سِلکاریانی تالان ءُ شِنگ کنّگ ءِ ھاتِر ءَ بلوچ چاگرد ءِ تہ ءَ سمیر سبزل ءِ گونگیں ڈُنگ ،  بےآپ ءُ بے ھیا رُودینتگ پرچا۔۔۔۔۔۔۔۔۔؟
پہ ھَمے ھاتر ءَ بے لگام ءُ مَھار کُتگ اَنت کہ شُما بلوچ چاگرد ءَ چے رنگیں تاوان دات کن اِت شُمارا رَزا اِنت ، بَلے بلوچ چاگرد ءِ تہ ءَ چوشیں سر ودی بُوَگ ءَ مَیل اِت کہ باندا پمن جَنجالے ودی بِہ بیت۔ اے ھبر ءِ مستریں منّانک ءُ درور ما دیست گوں سمیر ءَ چے بوت۔۔۔۔۔۔۔۔۔؟؟
   ھمےسمیر سبزل ءِ گونگیں نام گِپت ءُ ڈُنگیں بلوچاں وتی گِس ءَ دور کُت وتی مات ءُ گوھار کَم شرپ کُت اَنت۔ وھدے تئی شیرزالیں مات ءُ گوھاراں مرگ امباز اِت ءُ سر دات ، بلے وتی بَلوچی اِزّت نہ دات۔ پمیشکا مروچی سرجمیں بَلوچ راج مات مَلکناز ءَ پہ پھر بَند اِیت  نازینیت،  بَلے سمیر سبزل گوں وتی دُزّ ءُ شتلکاریں ھمکاراں سْیاہ رُو بوت ءُ پہ مَرگ پَیم نہ بیت۔
   بلے بلوچ راج ءَ دیست کہ بدکاریں دُژمِن ءَ وتی کاسَگ چٹّیں سمیر سبزل ءُ آئی سْیاہ رُوھیں  ھمراہ ھَما جاہ ءَ بند کُت اَنت کہ یک سیاسی سروگے ءِ جاہ ھم آ نہ اِنت ، سَاپ ءُ پَلگاریں کُوٹی، وشتامیں وراک، پُر کیپیں مجلِس ءُ دیوان ، نِند ءُ نیاد برجاہ  منت۔ چہ دُژمِن ءِ ھمے ادارُکی شرپ ءُ شیتانی کارپداں راج دُژمِن ءُ راجی سوداگراں سوب کُت ءُ ماہ پدی نہ بوت کہ گْوھار بَانک کُلسوم پد ءَ سرکار ءِ داشتگیں ڈُنگانی دست ءَ کارچ جَنَگ ءُ شھید کنگ بوت ، پرے ھاتِر ءَ پہ راج ءَ یک دگہ تاوان ءُ بیھارے ودی بوت پرچا۔۔۔۔۔۔۔۔؟؟
  چی ءَ کہ ما چہ دُژمِن ءِ بیھار ءُ پادتراپ ،  بیمّ ءُ تُرس ءَ  ھَاموش ءُ بُنڈ ءُ گَندلانی اَمبازاں چِہ در نہ کپت اِیں ، وھدے کہ دُژمِن ءَ ءَ مئے تُرس ءُ چَم جَھلی کیل کُت ءُ دیست گُڑا گْوستیگیں روچ ءَ پنجاپی لَشکر ءَ کیلکور ءِ دَمگ وَ پیسرا وتی انگراں کُتگ اَت ءُ پد ءَ لَشکر کَشّی ءِ وھد ءَ گیشیں لَشکرے توار جَنت ءُ ھَند ءُ مِیتگانی سر ءَ اُرش کنت۔
ھَمے چار ءُ پنچ روچی ئیں آپریشن ءُ چُکچینی ءَ پَٹ ءُ پول ءِ نام ءَ مئے مات ءُ گْوھاراں گوں ھَما کاراں کنت کہ گْوستگیں وھد ءَ ھمے پنجاپی لَشکر ءَ بنگلادیش ءِ آجوئی ءِ جَنگ ءِ وھد ءَ لکّانی ھِساب ءَ بنگالی مات ءُ گْوھاراں گوں  ھَمے بَدیں کاراں کنت کہ مَروچی گوں بلوچ ءِ ایردستیں راج ءَ گوں کنگ ءَ اِنت۔
چوش کہ اے بابت ءَ اگاں کیچ ءِ وئیل بِہ بیت یا تجابان ، گْوستگیں روچ ءَ ھوشاپ ءِ دردناکیں وئیل بِہ بیت کہ یک کسانسالیں گونڈلے پنجاپ ءُ ھیرہ منڈی ءِ لشکر وتی ھوسّ ءِ نِشانگ جوڑ کنت۔ گُڑا من اے گپ ءِ گْوشگ ءَ کدی لپرزگ ءُ ملامت نہ بہ آں کہ مَئے یکروچی ئیں توار ءُ کوکار چو گَز ءِ اِشکر ءَ ایرموش ءُ پُر بیت۔۔۔۔۔۔؟
بلے بیا ترا دِگہ دردناکیں وئیلے ءِ بابت ءَ سرپد کن آں کہ زِیکّیں روچ ءَ کْوزہ گیریں پنجاپی لشکر کولواہ ءِ دَمگ مادر ءِ کَلات ( مادگ ءِ کلات)  ءَ سَے گِس ءَ دَور کَنت ءُ پہ ناشرکاری ءُ ھوسّ ءِ بوجگ ءَ دِلمانگ بیت ،  بَلے مات ءُ گْوھارانی بازیں کوکار ءُ جاک ، گھگیری ءَ پہ بے سوبی پَدی بہ اَنت ءُ دیم پہ وتی بُنجل ءَ رو اَنت۔ 
  پرے ھاتِر ءَ من اے درگت ءَ چہ بلوچ راج ءِ ورنایاں اے جُات کنگ لوٹاں کہ مَئے بَلوچی لجّ ءُ گیرت کد جھ جنت۔۔۔۔۔۔؟؟ ما داں کد مَرگ ءِ تُرس ءَ بیمّ ءَ سر ءَ جَھل کن اِیں۔۔۔۔۔۔۔؟ یا ما پہ نام پھر بِہ بند اِیں کہ ما بَلوچ اِیں ءُ چاکر ءِ اولاد ، گْوھرام ءِ دل ءِ بَند ،  مئے  تُرس ءَ زمین لَرزیت ءُ مئے بِیمّ ءَ کلات جَکس اَنت۔۔۔۔۔۔۔۔۔
   یا۔۔۔۔! مئے مات ءُ گْوھار ھر شَپ ءُ روچ ھمے تُرس ءَ چماں بند کُت مہ کن اَنت کہ لَشکر کَیت ءُ مئے سر ءَ دَور کنت ، مارا بے شرپ کنت۔ بلے! مارا چہ گِس ءَ ھَمے گْوشگ بوتگ کہ بَلوچ ءَ ملکموت چم سُھری داتگ ءُ گْوشتگ کہ ” سر بُروت اِزت مَروت” ۔
   بلے! مروچی مَا پہ چار کلدار ءِ ھاتر ءَ وتی چَم بَند کُتگ اَنت ءُ وت ءَ وش واب کُرتگ، پُرس ھما مات ءُ گْوھاراں کہ شُما پرچا بے واب اِت ۔۔۔۔۔۔۔۔۔؟؟
     شُما پرچا وھد ءُ بے وھد ءَ جاک ءُ کوکار کن اِت۔۔۔۔۔۔۔۔؟
گُڑا سما کپ اِیت کہ درد ءُ دور دیمپان بُوَگ پہ بنی آدم ءَ چینچو گْران اِنت ، بے اے آجوئی ءِ دردانی مارگ ءُ آیانی درمان کنگ ءِ وتی کیپ ءُ چاڑے ۔ پمیشکا من گوں بلوچ راج ءِ ورناھاں یکرندے پد ءَ ھمے گْوش آں کہ مات ءُ گْوھارانی لجّ ءُ گُشان ما شُما اِیں ، اگاں ما شُما وھد ءِ ھمراھی ءَ دُژمِن ءِ بدیں کارپد ، درندگی ءُ ناشرکاریانی دیم ءَ دیوال نہ بست ءُ پاد نیاتک اِیں ، گُڑا اے گِلگ باندا پہ کس ءَ پشت نہ کپ اِیت کہ ما ھِچ نہ کُت رپت اِیں ، چی ءَ کہ اے زُلم ءُ زُوراکیانی دیم ءَ اگاں تو مدار ئے ، تئی ھمراھی ءَ راج ھم زوال آماچ بیت کہ ھِچ نہ مان اِیت۔ پمیشکا گْوش آں کہ پادا رند ءَ پشت کپ ئے ، رند ءَ پشت کپ ئے۔۔۔۔۔۔۔۔