نوشتہ:ارنسٹو چے گویرا
دا ساہتا کنے باز ہیت یاد بننگءِ کنے ہمو دے ہم یاد بننگے کہ اولی دے آ ای نے ماریا انٹونیا نا اُراغا خناٹ و نی کنے بننگ نا صلاح خلکُس و انقلاب نا تیاریک، مسلاک کُل اسٹ اسٹا یاد بننگو۔
اسے دور اس ہمو اسک کہ ننے جُست کننگ مس”کہ کہنگاں پد دیرے حال تننگ مرے”؟ دا ہیت نا گواچی نا خُلیس ننے تینا خاخرٹی ہفیس اس۔ دا ہیت راست اس اسک کہ انقلاب نا کسرٹی اِرا کسرو اسٹ کامیابی یا کہنگ و دا جہد ٹی ننا باز سنگتاتے موت تینا کریسس۔
داسا کہ ننا فکری ردُم محکمے حالتاک موہان نا وڑ قصہ آسینا رنگ اَٹ افس۔
کیوبا نا انقلاب نا ہرچ زمہ داری کہ کنا کوپاغاتا مسونے ای تینا وس اٹ کُلے کرینٹ داسا ای ہندا فکر کرینُٹ ہمو فرض کہ کنے کیوبا نا انقلاب و گلزمین توں تفوک کرینے اود پورا مسونے داسا ای نیاں و تینا کامریڈا سنگتاتے آں و مخلوک آں اجازت خواوا اینو ای تینا راجی پارٹی و راجی لیڈرشپ نا عہدہ فوج نا میجر و کیوبا نا شہری سے آں جتا مریوا۔
وختس ای تینا زند نا کتاب نا درو نا تاخے لیٹیفیوا کنے ہندا احساس مریک کہ ای انقلاب کن تینا اُستاں کاریم کرینٹ و ہچ وڑنا قربانی آں تینے خیر کتنٹ اسے ردی اس مسونے او دا کہ ای شروعات نے سمجھیتانٹ اوخس بھروسہ کتنُٹ کہ کروئی مسونے ای نا انقلابی رہبریءِ باز ہوریا پوہ مسونُٹ ای نا و نا کیوبا نا راج توں باز یادگارو وخت گدریفین اُٹ ای کیوبا نا جہد ٹی اواریءِ تینکیں اسے فخر اس سمجھیوا۔
داسا کنے دنیا نا ایلو مظلوما مخلوک توار خلنگے و نی کنتوں دا سفر ٹی اوار مننگ کپیسا انتیکے نا کوپاغاتا کیوبا نا قوم نا پگاءِ داسا ننا کسرک جتاو۔ ای دا ہم پاننگ خواوا کہ دا کسر ٹی سر ہلینگ کنکے ارزان افک ای دا کاریمے خوشی و دردنا جزبہ توں اوار کننگ اُٹ۔ ای تینا خیرا تینا تغ،امیت و مہروانینگاں بنداغاتے یلا کننگ اُٹ۔ ای دا گلزمین نا ہمو بندغاتے یلا کننگ اُٹ کہ اُفک کنے تینا چُنا پارینو ای باز دردی اُٹ۔۔۔
ای امر ہندا سیکوکا جنگی ہنراتے پوسنکو جنگجاہ اسیا دننگ اُٹ۔ ای ہندا انقلابی روحے ایلو مخلوکے تننگ خواوا۔ دشمن نا خلاف آ جنگے ای تینا کُلاں بلا فرض سمجھیوا و دا جنگ کنا پوسکنا ٹپاتے ہم درمان کیک ای دا ہیتے پاننگ خواوا کہ داسا کیوبا کنا ہچ کاریم نا محتاج افک اگاں ای کہنگ نا وخت پین سرزمین آسیا مسٹ کنا خنک کیوبا و اونا مخلوک کین مہر نشان ترور۔ ای نا باز منتوار اُٹ کہ ای نیاں باز گڈا سکان اُٹ و آخری دم اسکاں نا وفادار مروٹ ای ہر وخت کیوبا نا خارجی پالیسی تاں مطمین مسنُٹ ای ارانگ ہم مریو تینے کیوبن جہدکار اس پوہ مریوہ۔
کنے دا ہیت نا ہچ غم افک کہ ای تینا زئیفا و چوناتیکیں ہچ گڑاس خیرا ایلنگ افٹ ای اوفتا خاطرا نیاں ہچ خواپرہ ای چاوا کہ کیوبن حکومت اُفتا خیالے تخو اُفتا کُننگ،خواننگ،تولنگ نا خیالے تخو۔
ای نیتوں و کیوبا نا قوم توں باز ہیت کننگ خواوا بلے کنا خیالا دا ضروری اف انیتکے لبز او احساساتے بیان کننگ کپک کہ ای اُفتے پاننگ خواوا۔
نن مُدام انقلاب نا نیمغا قدم خلیسا کینا۔۔۔
ای انقلابی و آشوبی جزبہ توں نیتوں بغل گیر مریوا۔
ا(رنسٹو چے گویرا)
