وائے وتن ھُشکیں دار | میجر مجید

فقط داناؤں سے مُرادیں بھر نہیں آتیں
ضرورت ہے کہ ان داناؤں میں کوئی دیوانہ ہوجائے
میر ایسُپ ازیز مگسی
وتن ءُ وتی ماتیں گُلزمین ءِ مھر ءُ دوستی ھمک زانتکاریں انسان ءِ ھون ءَ ھوار اِنت۔ وتن چو مکّھیں مات ءِ وڑ ءَ دوستناک اِنت۔ وتن ءِ ھر چیز دوستناک اِنت چوش کہ دْرچک ءُ دار، زید ءُ مسکیں کھچر، کَور ءُ آپ، ڈنّ ءُ ڈگار، کوہ ءُ تلار، زربار ءُ کوچگ، ۔ انسان ءِ دوستیں چیز ارواہ اِنت۔ بلے پہ ماتیں وتن ءِ پھازگ ءُ سربُلندی ءِ ھاتر ءَ وتن ءِ تنگویں بچ وتی ارواہ ءَ ھم نہ پھریز اَنت۔ بلوچ ءِ وتن دوستی ءِ کسّہ ءُ داستان بلوچ ءِ راجدپتر ءِ تاکانی سپاہ اَنت۔ مئے شائری اندر ءَ مرواردیں گال روچ مرچی زندگ اَنت۔ ھر وھد ءَ کہ وتن ءَ توار جتگ، گُڑا وتن ءِ تنگویں بچّاں وتی لانک بستگ، سراں کپن بستگ۔ ءُ وتی وتن ءِ پانک جتگ۔ تاں روچ مرچی ھمے دابیں جاورھال مئیگ ءُ شُمئے دیم ءَ اَنت۔ وتن ءِ شیر بیمّیں بچّاں وتی زند ءِ کُلّیں وشی ءُ شادہ پہ وتن ءِ آجوئی ءَ ندْر کُتگ اَنت۔ ءُ مرگ اِش پہ مڑایے وشّاتک کُتگ۔
نمیرانی سید ھاشمی گْوش اِیت،
ھانُل ءِ ھاتر ءَ سید انگت
گران تریں گم وتی سر ءَ زیراں
اد ءَ سید ءِ ھانُل آئی ءِ گُلزمین اِنت۔ کہ وتن ءِ ھاتر ءَ سید گرانیں گمانی زیرگ ءَ چک ءُ پد نہ بیت۔ مئے کْوھنیں ءُ نوکیں شائری ءِ اندر ءَ وتن دوستی مستریں راج چیدگ اِنت۔ انچوش کہ زیکیں شائر ءَ گْوشتگ مرچیگیں شائر ھم ھمے رنگ ءَ گْوش اِیت۔ اے درگت ءَ بلوچ شائراں بے دروریں گال ءُ گُپتار گْوشتگ۔ وتی راج کُلوہ ءُ پیگام داتگ، ڈاہ داتگ۔
مست توکلی گْوش اِیت،
کونْج کتار اَنت من گوں کتاراں رواں
کونج پہ سِند ءَ من پہ سیوی ءُ ڈاڈراں
بزاں کونجاں پہ سِند ءَ زھیر کنت بلے من ءَ پہ سبّی ءُ ڈاڈر ءَ۔ کونجاں وتی وتن من ءَ وتی وتن۔ وتن ءِ مھراں مست توکلی انچوش مست کُتگ کہ گوں کونجاں ھمراہ بیت ءُ روت۔ پرچا کہ وتن ءِ دلبُرّیں زھیراں مست سک بے وس ءُ ناچار کُتگ۔ مروچی بلوچ اگاں امریکہ یا کہ یورپ ءِ کجام ملکے ءِ کہ جھمنند اِنت۔ آ مُلکاں زند ءِ کُلّیں آسراتی ھست۔ بلے انگت آئی ءِ دل پہ وتی ھنکین ءَ وتی وتن ءِ ھُشکیں داراں ھم تلوس اِیت۔
یک بلوچ گْوھارے وتی تنگویں بْرات ءَ نازین اِیت۔ چہ ھاوند ءَ لوٹ کنت۔
الّا من ءَ بْراتے بہ دے
تِیرے چِناں لانک ءَ ئِے دیاں
اِسپر ماں شیری پنجگاں
ھمّیل گوں تیراں سُھر سریں
گوں لشکر ءَ ئِے ھمراہ کناں
کجام لشکر؟؟؟ ھما لشکر کہ پہ وتن ءِ ھاتر ءَ سلاہ بند اِنت۔ گْوھار پھر بند اِیت کہ منی تنگویں بْرات گُلزمین ءِ پانکو اِنت۔ بلوچ زالبول ءُ ماتیں گْوھارانی وتن دوستی بے درور اِنت۔ اے دابیں درور مئے راجدپتر ءَ سک باز اِنت۔ کہ مئے بلوچ زالبولاں ھم وتن ءِ ھاتر ءَ لانک بستگ۔
رھم الی مری گْوش اِیت،
ھَیرانی تَمن ویران اِنت
سیتّ ماں شکّلیں جنگان اِنت
شکّلیں جنگ بزاں کہ گلزمین ءِ آجوئی جنگ بلوچ ءَ سیت ءُ نپ گْوشتگ۔ چوش ھم شائر زانت کہ جنگ ءَ مردم کُشگ ھم بیت۔ بلے وتن ءِ آجوئی ءِ ھاتر ءَ مرگ ھم سیت ءُ نپے۔ مرچی منی سرھال یک کْوھنیں بلوچ ورنایے ءِ کسہ اِنت کہ اے ورنا وتی وتن ءَ چِہ داب ءَ نازین اِیت۔
کسہ چوش اِنت۔۔۔۔ اولی ءُ دومی جھانی جنگ ءَ برتانیہ ءِ سلاھانی پانک جنوک بلوچ لشکر بیتگ۔ اے سلاھانی Depo ماں اراک ءُ بسرہ ءُ بگداد ءَ بیتگ۔ ماں اُمان ءَ راسلھد ءُ مسیرہ ءَ بیتگ۔ اے سلاھانی Depo پانکو بلوچے بیتگ کہ چہ جیونی ءَ انگریز ءَ برتی کُتگ ءُ بُرتگ اَنت۔
گُڑا ھمے لشکر ءَ یک بلوچ ورنایے گون بیتگ (بلے چوش زانگ نہ بیت کہ ورنا ءِ نام کَے بیتگ) بلے چوش زانگ بیت کہ اے ورنا مند ءِ مردمے بیتگ۔ پرچا کہ آئی ءِ شائری گالاں چہ زانگ بیت۔ گیشتر مند ءِ بازار ءُ دمگانی نام ءَ گیپت۔ جیڑہ اے نہ اِنت کہ کج ءِ بیتگ ءُ کَے بیتگ۔ بلے آئی ءِ وتن دوستی بے درور اِنت۔ گُڑا ھمے ورنا یکروچے گْوش اِیت کہ من رواں ملک ءَ۔ من ءَ پہ وتی ھند ءُ دمگاں سک زھیر کنت۔ گُڑا سنگت ئِے باز گْوش اَنت کہ کار ءُ روزگار ءَ ئے انّی مہ رو۔ ورنا جواب دنت کہ من رواں بلے چہ روگ ءَ پیش من شیرے گْوشاں ءُ نی رواں کہ من پہ وتی وتن ءِ دیدار ءَ سک بے تاھیراں۔ وتی سنگتاں گْوش اِیت کہ زر ءُ مال ءُ روزگار ھر چیز نہ اِنت ۔ وتن ءِ مھر ءُ دوستی ءِ بدل زر نہ اِنت۔ بلے من الّم ءَ شیرے گْوشان ءُ رواں۔ گُڑا اے مرواردیں گال کہ انسان ءِ دل ءِ ھمک بند ءُ بوگاں چہ واب ءَ پاد کن اَنت۔ بلے اے شیر ءِ ھمک چھر ءُ شبین ءُ تشبیھ بے درور اِنت۔
بسرہ من رمبینت شھد ءُ شیرانی
ملک من ءَ اومان اِنت کلیرانی
ریدگیں پیش ءُ سیسیگ تلّانی
دار ھما ھشت پانچیں چگردانی
زردُکی گْوبز ءُ شیماز چاتانی
زامر ءُ سبزتاکیں کھیرانی
ساھگ من ءَ وش بنت نہ بُرّان ئِے
منج ئِے ھمرنگ اَنت لال ءِ دُرّانی
شنگر ئِے ھوھنگ اَنت چلمبانی
کُنٹ ئِے گوش ئےسرزان اَنت ھپرکانی
آ مرنجانیں پُشت بھانانی
گنگل ءُ دست بازی جنکّانی
سارت ءُ ھونکّیں کُل امُلّانی
گجّو گوں دروازگ دپیں کُلّاں
ریک ءُ سوراپ ءُ سیرگ ءُ مُلّان
منی دوست ئِے مان اِنت گوں ھلکویں دُرّاں
اد ءَ بچار وتی وتن ءِ کھیر، کلیر، چگرد ءُ زامر چِہ رنگ ءَ پہ چھر ءُ شبین ءَ کارمرد کُتگ اَنت۔
تپاکی آجوئی ءِ مانزمان اِنت
بلوچستان آجو بات
***