دم جناں منی سینہ سُچ اِیت
من نہ زانت من ءَ ھیروین کُش اِیت
٭سبزل سامگی٭
منی مات ءُ پت ءَ سک گْریت
بست اَنت دست وتی ھر روچ
کن ئے پرچا وت ءَ برباد
منی چُک اے نشہ ءَ سوچ
پت ءِ دولت ھلاس کُت من
منی مات ءَ شت ءُ پِنڈ اِت
من ءَ تریاک ءِ زر دات اَنت
اسمائیل آسپ
برے گوں یکے ءَ گْوازینگ ءَ ئے زندگی ءَ
توئے ھاتُک ترا چرس ماں کٹیر ءَ اَنت
تو ئے پاتُک ترا تریاک ماں پندول ءَ
توئے آسی ترا پوڈر گُشان ءَ اَنت
منی دْرواھیں بدیں کردانی آدینک بس تئی جند اِنت
منزور بسمل
نیلسن منڈیلا گْوش اِیت کہ ”لیڈر وتی اوٹ ءِ پگر ءَ کنت۔ رھشون وتی راج ءُ پدریچ ءِ آکبت ءِ پگر ءَ کنت۔ وتی چاگرد ءِ پلگارگ، چاگرد ءِ سینگارگ ءُ چاگرد ءِ دیمروی ءُ گھبودی ءُ راج ءِ کُلّیں مھلوک ءِ زمّہ دار اِنت۔ پرچا کہ یک جْوانیں چاگردے ءَ چہ یک جوان ءُ تمردیں راجے جوڑ بیت۔ چاگرد کہ سِلّ ءُ نا سلنگاں بہ بیت راج دیمروی نہ کنت۔ راجی دیمروی ھما وھد ءَ بیت کہ راج چہ چاگردی نزوری ءُ ھرابیاں شودگ ءُ پولگ ءُ پلگارگ بہ بیت۔ گُڑا ھما راج مالی، رُبیدگی ءُ چاگردی دیمروی کنت۔ پہ درور ءَ چین ءِ رھشوناں بچار۔ چین ءِ رھشوناں مار اِت کہ تاں ما وتی چاگردی سلکاریانی گر ءُ دار ءَ مہ کنیں مئے راج دیم ءَ نہ روت۔ گُڑا چین ءِ راج ءَ چاگردی آشوبے دیم ءَ آؤرت۔ چہ بندات ھیروین ءُ تریاک ءُ چرس ءَ کُت۔ ھرچ نشھی سامان ھست اِت اَنت گار ءُ گمسار اِش کُت اَنت۔ نشہ ءِ سر ءَ سک باز پابندی جت۔ نشہ چہ جبین ءَ ولگوج کُت۔
مرچی منی سرھال ءِ مول ءُ مُراد بلوچ ءِ چاگرد اِنت۔ ھر وڑیں چاگردی نزوری یا کہ سیلکاری ءُ ناروائی یے کہ بیت کُلّیں راج ءَ تاوان اِنت۔ مرچی اے گپ چہ کس ءَ اندیم نہ اِنت۔ کہ مئے راج ءَ دیر اِنت کہ ھیروین ءُ چرس ءُ تریاک ءُ دگہ بازیں نشہ ءُ نادْراھیانی آماچ اِنت۔ زانتکارے گْوش اِیت کہ ”یک راجے ءَ اگاں نیست ءُ نابود کنگ لوٹ ئے گُڑا آ راج ءَ چہ وانگ ءُ زانگ ءَ بہ پُل ءُ نشہ ءَ ھیلدار ئِے کن۔ راج ءِ پدریچ گیش نشہ ءَ مہ بیت ءُ دیمتر ءِ پگر ءَ کُت مہ کن اَنت۔ نشوی نیلبومیں زر ءَ اوگارگ بہ بنت۔ پہ اے کار ءَ زورگیر ءُ زورگیر ءِ کاسگ چٹ ءُ ربّال ھمرکاب اَنت ءُ ایشاں ھاکم ءُ زردارانی کوت ھم گون اِنت۔ دومی نیمگ ءَ بے وسین بلوچ راج اِنت۔ بلوچ ءِ دژمن باز اَنت بلے دوزواہ کم اَنت۔ نشہ ھر جاہ ءَ رس اِیت۔ پیماز ءُ ٹماٹر ءِ دکاناں ھم چرس ءُ ھیروین رس اِیت۔ نشہ ءِ سر ءَ ھچ گر ءُ بند نیست۔ زورگیر پہ جار ءِ بادشاھی گْوش اِیت کہ نشہ ءِ کار ءُ بار ھلار اِنت۔ بلے آ اگاں چہ ایران ءَ گونی یے آرت کار اَنت یا دہ ڈبّہ روگن کار اَنت گُرا اے بلاھیں جُرمے۔ ءُ پد ءَ گیشتر نشہ زورگیر وت کار اِیت سرکار ءِ کاسگ چت ءُ ربال لوگ پہ لوگ بھا کن اَنت۔ اے بلاھیں پندلے کہ زورگیر ءَ پہ بلوچ ءِ نیست ءُ نابود کنگ ءِ ھاتر ءَ جوڑ کُتگ۔ بلوچستان ءَ بے روزگاری، چاگرد نا برابری وانگ ءُ زانگ ءِ کمّی، مایوسی بازیں گمانی سوب ءَ مھلوک نشہ ءِ آماچ اِنت۔ اے بلاھیں راجی تاوانے۔ اے نشہ انچوش مردم ءَ ناتوان ءُ نابود کنت کہ وتی راجی جیڑھاں زانت نہ کنت۔ گیش ءِ نشہ ءَ نہ بیت۔ کار ءُ روزگار نہ کنت وتی زند ءِ مول ءُ مُراد ءَ زانت نہ کنت۔ انسان اشرف المخلوقات اِنت۔ انسانی زند ءَ مکسدے ھست کہ انسانیت ءِ ھزمت اِنت۔ نشہ بلوچستان ءَ چو کرونا وائرس ءِ رنگ ءَ شنگ بیتگ۔ کرونا وائرس ءِ الاج میزان میزان ءَ در کپگ ءَ اِنت بلے نشہ بے الاج اِنت۔ نشہ ءِ ویکسین چاگردی جھدکار اَنت۔ بلے انچوش کہ جھد بہ کن اَنت۔ نشہ ءِ نادراھی ءَ بلوچستان ءِ ھمک گس ءَ چہ ھلاس بہ کن اَنت۔
چیزے ماہ ساری میر برکت بلیدھی ءِ سرکماشی ءَ نشہ ءِ ھلاپ ءَ یک آشوبے چہ بلیدہ ءُ زامران ءَ بندات بوت۔ اے آشوب ءِ اندر ءَ بلیدہ ءُ زامران ءِ مھلوک یکمُشت ءُ تپاک اَت۔ اے دْرچ ءَ وانندہ، کماش، شائر، ادیب، ندکار، نبشتہ کار ، دینی زانتکار، سول سوسائٹیز ءُ مات ءُ گْوھاراں اے آشوب ءَ بھر زُرت ءُ وتی راجی، دینی، چاگردی بلوچی زمّہ داری پیلہ کُت کہ پہ لس بلوچ مھلوک ءَ جوانیں کلوھے اَت ءُ سکینے اَت۔ اے آشوب تاں بلاھیں کساسے ءَ سوب مند بوت۔ اے چاگردی آشوب ءِ سوب ءَ بلوچستان ءِ اندگہ ھند ءُ دمگاں سکین زرت ءُ نشہ ءِ ھلاپ ءَ وتی جھد بندات کُت اَنت۔ چوش کہ کیچ، دشت، مند، تمپ، گْوادر ءُ پنجگور ءُ دگہ بازین ھند ءُ دمگاں نشہ ءِ ھلاپ ءَ وتی آگاھی مھم گون زور ءُ شور ءَ بندات کُت اَنت۔ مھلوک ڈاہ دات۔ تاں روچ ء مرچی ھمے جھد برجاہ اِنت۔ چاگردی گھبودی ھما وھد ءَ بیت کہ چاگرد ءِ ھرابیاں ءُ نزوریاں جھدکار دیم ءَ بیار اَنت ءُ وتی راج ءَ سرپد بہ کن اَنت۔ مئے یک بلاھیں دگہ چاگردی نزوری یے ایش اِنت کہ مئے مھلوک ھمے ھیروین پروشاں میر ءُ امیر ءُ واجہ گْوش اَنت۔ ھر کس کہ گیشتر ھیروین پروشی کنت آئی ءِ نام ءِ دیم ءَ ”میر“ گْوشگ بیت۔ میر پلانی، واجہ پلانی، کودا پلانی ھمے بلاھیں ناروائی یے۔ میر، واجہ یا کَودا راجی پنّام اَنت کہ شریں بلوچ ءُ بلوچ دوستیں گمواریں مردماں گْوشگ بیتگ۔ نَے کہ ھیروین پْروشاں ۔ پیش ءَ چوش نہ بیتگ۔ باید اِنت کہ چاگردی گھبودی جھداں لس مھلوک ھوار بہ بیت۔ گُڑا ھما جھد سوبین بیت۔ چاگردی جھدکارانی ھر کس وتی وس ءُ واک ءِ ھوالہ ءَ مدت ءُ کمک ءَ بہ کنت چوش کہ اکلاکی کمک، مالی کمک اگاں کسے دست ءَ بیت۔ گُڑا اے جھد سوب مند بیت۔
انچوش کہ مرچی منی سرھال اِنت کہ ”ھر کس وتی گس ءِ پانک ءَ وت بہ جنت“۔ بلوچ ھم اے دیم ءَ شُتگیں وھد ءَ وتی راجی ، چاگردی کٹ ءُ نپاں بہ زانت۔ وھدے کہ راج وتی کٹ ءُ نپ ءَ زانت گُڑا ھما راج ایدگہ راجانی سرپاں اوشت اَنت۔ ایدگہ راجانی اندر ءَ چاگردی گَل ھست اَنت کہ چاگردی سلکاریانی ھلاپ ءَ جھد کن اَنت۔ وتی راج ءَ پلگار اَنت۔ مرچی اے نشہ ءَ مئے راج ءِ ورنا پھک ءَ نیست ءُ نابود کُتگ اَنت۔ ءُ راج ءِ امیت ءُ آکبت راج ءِ ورناہ اَنت۔ کہ راج ءِ پدریچ اِنت۔ وھدے کہ پدریچ نیست ءُ نابود بیت گُڑا راج دیمروی نہ کنت۔ انچوش کہ من پیش ءَ گْوشت کہ ”لیڈر اوٹ ءِ گم ءَ کنت بلے رھشون وتی راج ءِ آکبت ءِ پگر ءَ کنت“۔ باید اِنت چوش کہ میر برکت بلیدھی ءَ بلیدہ ءُ زامران ءِ مھلوک ءِ وڑ ءَ نشہ ءِ ھلاپ ءَ وتی جھداں ھمے داب ءَ تیز بہ کن اَنت۔ بلیدہ ءُ زامران ءِ لس مھلوک ستا کرز اَنت ۔ اے جھدکاراں من سلام گْوشاں۔ کہ وتی چاگردی نزوریانی پلگارگ ءَ لانک اش بستگ ءُ تپاکی ءَ گوں جھد کنگ ءَ اَنت۔ باید اِنت کہ مئے ورنا ، وانندہ، راجی رھشون، سول سوسائٹی، دینی زانتکار، مات ءُ گْوھار مئے شیرزالیں زالبول وتی راجی زمہ داری ءَ بہ زان اَنت ءُ نشہ ءِ ھلاپ ءَ وتی جھداں تیز تر بہ کن اَنت۔
بلوچستان سبز ءُ میزران بات
بلوچ ءِ دژمن سرنگون بات اَنت
بلوچستان آجو بات
بلوچ تپاک ءُ یک دست بات
(انچوش بات)
***
