“واجہ سبا مئے میتگ ءِ ھما گُنگ پر تو انگت پُرسیگ اِنت”
واجہ سبا پہ تئی گِندگ ءَ منی بلائیں دلی واھگے بوتگ ، بلے من چہ وتی بد کسمتی ءَ ترا نہ دیست۔ پرچا کہ تو دو رند ءَ مئے میتگ ءَ اتکگ ئے من انگت گوں تو دُچار نہ کپتگ آں ، اے منی بد کسمتی نہ اِنت گُڑا چے اِنت۔۔۔۔
ھیر منی وَ کسمت ءَ وڑ وڑیں ھُنر کُرتگ ، بلے تئی نہ گِندگ منی چہ دُرستاں مستریں بد کسمتی اِنت۔۔۔
من اے وھد ءَ نُھ ءَ وانگ ءَ اِت آں ، پمیشکا شال ءَ شُت نہ کُرت کہ دہءَ پد شال ءَ رو آں ۔ بلے مئے میتگ ءِ مردُم گیشتر وانگ ءَ پہ شال ءَ شُتگ اَنت۔ ائید ءُ رمزان ءَ پہ چُٹّی ءَ اتکگ اَنت ، گُڑا دُرستانی دپ ءَ واجہ سبا تئی نام بوتگ۔ کسے ءَ گْوشتگ واجہ سبا ساھب پہ من ماسے ، کسے ءَ گْوشتگ واجہ سبا ساھب پہ من پِتے ، کسے ءَ گْوشتگ واجہ سبا پہ من رھبرے ، کسے ءَ گْوشتگ واجہ سبا پہ من ھاٹیگ دِیوکے ، کسے ءَ گْوشتگ واجہ سبا پہ من اُستادے ، کسے ءَ گْوشتگ چورھاں پہ ماتے ، نیزگاراں پہ کُمکے ، چی ءَ کہ واجہ سبا ءِ کٹّ ءُ کمائی گیشتر پہ بلوچ راج ءَ اِنت۔
واجہ سبا ءِ ھرچ کار پہ وڑ ءُ ڈول اَنت۔ واجہ سبا ساھب بازیں زُبانانی تہ ءَ گپ ءُ نبشتہ کنگ زانت۔ واجہ سبا بلوچستان ءِ کُنڈ کُنڈ ءَ گشتگ ءُ بلوچستان ءِ زمین ، دود ءُ ربیدگاں سرجم ءَ زانت۔ واجہ سبا بلوچ راج ءِ دوست ءُ دُژمناں پجّا کار اِیت ، ءُ اے ھم زانت کہ راج ءِ راستیں رھبر کَے اَنت۔۔۔۔۔
یکرندے واجہ سبا مئے میتگ ءَ کَیت ، گُڑا گوں گُنگے ءَ ڈیک وارت ءُ گُنگ ءَ گوں اِشارہ ءِ زُبان ءَ گپ جنت۔ بلے گُنگ نہ زانت کہ دنیا چی یے ، زند ءُ مرگ چی یےن، شرّ چی یے ءُ ھراب چی یے ، بلے واجہ سبا ساھب ھما گُنگ ءَ گوں اشارہ ءِ سر ءَ گپ جنت اَنچو کہ آئی لوگ ءِ مردُم جن اَنت۔ واجہ سبا پہ گُنگ ءَ باز مھروان بیت۔ رُکست کنگ ءِ وھد ءَ گُنگ ءِ دستاں چُکّیت ءُ سرائے سمار اِیت ، وھدے چداں چہ روت تربت ءَ شھید الیاس نزر ءِ کبر ءِ سر ءَ پاتیا وان اِیت ، چہ پاتیا ءَ پد دیم پہ شالءَ روت ۔
لھتیں وھد ءَ رند واجہ سبا ءِ شھیدی ءِ ھال کَیت سرجمیں بلوچستاں مُونجائی ءِ آماچ بیت۔ ھما گُنگ ءَ گوں واجہ سبا مھروان بوتگ ، ھما گُنگ کہ وشّی ءُ گم ءَ نہ زانت، ھما ھم پہ واجہ شھید سبا دشتیاری ءَ گریت ءُ کُوکار کنت۔۔۔
واجہ سبا تئی زانت ءُ زانگ ، تئی کد ءُ بالا د ءِ توسیپ کنگ ءِ واستا منی کرّ ءَ لبز نیست ، بلے اے منی دزبندی اِنت کہ یکبرے منی واب ءَ بیا کہ من ترا ھما گُنگ ءِ ھالاں دے آں کہ پرتو پرسیگ اِنت۔۔۔
