اولی بھر
ماں راجدپتر ءَ وھدیکہ زیردستیں راجاں پہ وتی راجی آجوئی ءِ جُنز بُنگیج کُت انت گُڑا پہ گلامیں راجانی جُنز ءِ بے سوب کنگ ءِ ھاتر ءَ زورگریں دژمناں ھمے راجی آجوئی لوٹوکیں گل ءُ آشوبی راج ءِ سر ءَ وڑ وڑیں پندل، رپک ءُ سِلاہ کارمرز کُت انت ءُ چہ ھمے پندل ءُ رپکاں مستریں سِلاہ انگریزانی نوساچ کُتگیں یک پارمولایے بوتگ کہ نام ئِے ” ڈیوائیڈ اینڈ رول” اِنت کہ چریشی ءَ دژمن راج ءِ رھشُوناں لب ءُ لالچ دنت، راج ءِ تہ ءَ دُزّ، ڈُنگ، دپچٹ، کاسگ چٹّ ءُ راجدْروہ ءِ وڑیں تبکاں اڈ کنت کہ راج ءَ وت ماں وت مِڑائین ایت، راج ءِ چاگِرد ءَ بھر ءُ بانگ کنت ءُ گلامیں راج ءِ تہ ءَ بَکّڑ ودی کنان ءَ رھشُون ءُ راج ءِ آشوبی سروگاناں ھم یک یکی کُش ایت، پد ءَ ورنائیں نودربر راجی جُھدکاراں کُشان ءَ چاگِرد ءِ تہ ءَ یک تُرس لرز ءِ بیمے رُدان بیت ءُ ایشی ءِ آسر ءَ زیردست راج بے اُمیت بیت ءُ راجی آجوئی لوٹوکیں راجانی سِلاھبندیں جُنز پْروش ءِ آماچ بنت۔ چوناھیگا اِے دُراہ ربودگیں وڑ (کنوینشنل میتڈ) اَنت کہ ھر دُژمن اش کارمرز کنت بلے مرچاں پہ زیردستیں راجانی راجی جُنزاں پْروش دیگ ءِ ھاتر ءَ چہ ایشاں مستریں پارمولا ھم گِندگ ءَ کا اَنت۔ بلکیں اِے دُراہ ماں بلوچ چاگِرد ءَ گِندگ کا اَنت کہ بلوچ راج ءِ دژمناں پہ بلوچ راجی آجوئی ءِ جُنز ءِ پْروش دیگ ءِ ھاتر ءَ مُدام بزگیں بلوچ لس مھلوک ءِ سر ءَ کارمرز کُتگ انت۔
چوناھیگا اے وڑیں پندل ءُ رپکانی لَڑ سک دْراج اِنت کہ مئے دوئیں نیمگی (رودرآتک ءُ روایرشُت) دژمن یکشل ءَ بلوچ راج ءِ سر ءَ کارمرز اش کن اَنت بلے من وتی مرچیگیں دْراجیں نبشتانک ءِ تہ ءَ راج ءِ مستریں دُژمنانی سر ءَ گپ کن آن ءُ راج ءَ سرپدی دیگ ءِجُھد کن آں کہ آ چہ تئی بُندری دژمن ءَ گیشتر ھون وار اِنت بلے ما مجگی گلام ایشی ءَ شَری ءَ نہ چارگ ءَ ایں۔
گپ ءَ تچک بہ کن ایں بلوچ راج ءِ مستریں دژمن لھتیں کوڑائیں میر ءُ نواب ءُ لھتیں جاھاں دمگی وتگڑیں سردار اَنت پمیشکا ماں مرچیگیں بُنگپّ ءَ ما بلوچ راج ءِ تہ ءَ کوڑائیں سردار، میر ءُ نوابانی بارہ باوست کن ایں کہ اے میر ءُ نواب کَے اَنت ءُ اِے کئی مردم اَنت؟ زاناں راجدوست اَنت یا راج ءِ دژمن؟
راستی ءَ ما دُراہ جْوان سرپد ایں کہ بلوچستان ءِ وتگڑیں میر ءُ نواب مُدام راجدْروہ ءُ سرکار ءِ کاسگ چٹّ بیتگ انت کہ آیاں ریاست ءِ واھشت ءِ رِد ءَ وتی ٹَک ءِ بلوچ لس مھلوک مُدام وتی زیردستی ءَ داشتگ اَنت کہ بلوچ راج یکجاہ مہ بیت ءُ بلوچ راج ءِ تہ ءَ راجی آجوئی ءِ زرمبشت ودی مہ بیت پمیشکا ھمے نواب ءُ میر نہ وت پہ بلوچ ڈیھ ءِ آجوئی ءَ پاد آتک انت ءُ ناں کہ آیاں گوں وتی ٹک ءِ بلوچاں پہ راجی آجوئی ءِ بابت ءَ گپے کُت بزاں ٹَکری میر ءُ نواباں بلوچ ڈیھ ءِ ڈول ءَ بلوچ راج ھم مُدام بھر ءُ بانگی داشتگ اَنت بلوچ چاگِرد گلامی ءَ مہ مار ایت۔ ایشی ءِ مستریں نشانی ایش انت کہ وھدیکہ 1948 ءَ شھزادگ ابدلکریم ءَ پاکستان ءِ زیردستی نہ منّ اتگ ءُ پہ بلوچستان ءِ آجوئی ءَ دژمن ءِ گون ءَ چیرجنگ ئِے بُنگیج کُت گُڑا ھمے دُراہ میر ءُ نواب سرکار کاسگ چٹّی ملار اِت انت ءُ سرکار ءِ واھشت ءِ رِد ءَ وتی ٹک ءِ بلوچ چاگِرد چہ جنگ ءَ بے سما داشتگ اِنت۔ ھمے داب ءَ وھدیکہ 1958 ءَ پیر سالی ئیں راجی بامرد بابو نوروز ھان پہ راجی آجوئی ءِ ھاتر ءَ تُپنگ چِست کنت گُڑا کِرّ ءُ کش ءِ دُراہ نواب چَمّجهل بنت ءُ بابو نوروز ھان ءِ کُمکّ ءَ دژمن ءِ ھلاپ ءَ سِلاہ نہ زُور انت ءُ ناں کہ آیاں وتی ٹک ءِ بلوچ راج ءَ سکین ءُ پنتے گْوشت کہ بابو نوروز ھان ءِ سروگانی ءَ راجی آجوئی ءِ جنگ ءَ بھر بہ زُور انت بزاں اِے کِرّ ءُ کش ءِ جمالی، مگسی، رِند، رائیسانی، مری، بُزدار، بُگٹی، جھکرانی، لیگاری، گیشکوری، کھوسہ، مینگل، سنجرانی۔۔۔۔۔۔ءُ مکران ءُ رکشان ءِ سرجمیں لس بلوچاں راجی آجوئی ءِ دومی جُنز ءِ سرپدی نیست اَت بلے اِے دُراھیں دمگانی راجدْروھیں نواب ءُ میراں سما ھست اَت کہ سیالکوٹ، ساھیوال، ءُ لاھوری پنجابیانی دست ءَ بلوچ راج ءِ چُکچینی بوگ ءَ انت۔ ایشاں وتی ٹَک ءِ راج ءَ اِے سرپدی ھم نہ داتگ اَنت کہ بابو نوروز ھان ءِ سروگانی ءَ بلوچ راج پہ وتی آجوئی ءَ پاد آتک ءُ نی باید اِنت بلوچ راج یکجاہ بیت۔ بلکیں دُراھیں بلوچستان ءِ میر ءُ نواب ریاست ءِ بڑوا بیتگ ءُ وتی دمگاں بے سُدّئی ءَ نشتگ انت پد ءَ بابو نوروز ءِ زھگ شھید کنگ بیتگ اَنت ءُ بابو نوروز ءِ ھم ماں تھاریں زِندان ءَ وتی گُڈی ساہ آسائینت۔ باید ھمیش اَت بہ گِر کوہ سلیمان ءُ رکشان تا مکُران دُراہ بلوچ راج یکجاہ ءُ یکمُشت بیتیں ءُ بابو نوروز ھان ءِ کُمک ءَ ھوار بیتین اَت بلے سد اپسوز کہ راج ءِ کاسگ چٹّیں میر ءُ نواباں ناں وت راجی آجوئی ءِ جنگ ءَ بھر زُرت ءُ ناں کہ وتی ٹَک ءِ مھلوک ءَ گْوشت اش کہ جنگ ءَ ھوار بہ بنت۔ ھمے داب ءَ، وھدیکہ 1971 ءَ پاکستان چہ ھندوستان ءِ دست پْروش ایت ءُ بنگلہ دیش آجو بیت چہ ایشی ءِ آسر پاکستان مُلکاری، جنگی تب ءُ زرکاری ءَ بے کساس نزور تر ایت گُڑا 1972-79 ءِ زمانگ پہ بلوچستان ءِ آجوئی ءَ یک بلاھیں موھے اَت۔ ھمے زمانگ راجی نمیرانیں رھشُون بابا ھیر بکش مری، اتا اُلہ مینگل ءُ گوس بکش بزنجو پہ بلوچستان ءِ آجوئی ءَ دژمن ءِ ھلاپ سِلاہ چست کن اَنت بلے اِے وشیں موہ ءُ وھد ءَ ھم بلوچ راج ماں دمگی ٹَکاں بھر ءُ بانگ اَت، بِگِند ئے وھدے کہ زورگیر وت نوک پْروشءِ آماچ اَت گُڑا باید اَت ھمے ساھتاں بلوچ راج پہ وتی راجی آجوئی ءُ وتواجھیں ڈیھ ءِ ھاتر ءَ یکمُشت بیتیں بلے چہ سرجمیں بلوچ راج ءَ ھمے راجی جُھد ءِ دیم ءَ بروک تھنا دو ٹَک: مری ءُ مینگل ات ات ءُ کِرّ ءُ کش ءِ زھری، لانگو، ریسانی، رِند، ڈومکی، بُزدار، بُگٹی، جھکرانی، جمالی، مگسی، مزاری۔۔۔کھوسہ، لیگاری، سنجرانی ءُ اُمرانی بزاں من کُجام بدبھتیں میر ءُ نوابانی نام ءَ بہ گِراں کہ ایشاں ٹکءِ راج گلام داشتگ ءُ وت ھر یکے دژمن ءِ کاسگ چٹّی ءَ ملار اَت ءُ آیاں وتی چنگُل ءِ راج ھم پہ راجی آجوئی ءَ جنگ ءَ نہ اشتگ۔۔۔۔
